Read njo 2 CHUBATEM 21 Bible Online

2 CHUBATEM 21 - njo bible

2 CHUBATEM 21

¹Manase chubatsü tenzükdang pa küm terana liasü; pai Yirusalem nung küm tenemer pungu chuba. Pa tetsü tenüng Hefziba liasü.

² KIBUBA madang kechi majung liasü, koba kintem KIBUBAi Israel nunger jakdang jentok parnok tesempatsü mapatem ama, pai inyak.

³Kechiyong tebu Hezekiai raksatsüba pai tenem tekülemdak yanglu, aser Baal asoshi tenladak yanglu, aser Israel chuba Ahab ama Ashera ka yanglu, aser anüng nung petinu ajak külema parnok tenzük.

⁴ Pai KIBUBA kidang tenladak yanglu, koba indang pai Yirusalem nung “Ni kü tenüng ayutsü” ta ashi.

⁵KIBUBA ki kimalen anasü nung anüng petinu ajak asoshi pai tenladak yanglu.

⁶Pai pei jabaso mi nung rongsetdaktsü, aser temaitsü agi tezüba aser arasentsür atakatemba mapa inyak, aser süli aortem aser ainketer arasenertem ama amshi; pai KIBUBA madang pa ain adokdaktsütsüsa tamajung jenti benshi.

⁷ Tenla kidang pai Ashira süngyanglu yanglu, koba indang KIBUBAi Dawid aser par jabaso Solomon dang, “Iba ki nung, aser Yirusalem nung, koba ni Israel kin ajak nungi shimteta lir, ni teti asoshi kü tenüng ayutsü;

⁸mesüra ni parnok dang melaba ama ajak parnoki dang inyakdi süra, aser kü tenzüker Mosai parnok dang melaba ama ajak inyakdi süra, ni parnok tebou nunger nem agütsüba linük nungi Israel tetsüng joko menemzüdaktsütsü ta ashi.”

⁹Saka parnoki manga; aser kintem shirnok Israel chirtem jakdang KIBUBAi samatsü parnok dak alaka tamajung inyaktsü Manase-i parnok mesüzük.

¹⁰KIBUBAi pa tenzüker ainkartem ajanga jembia ashi,

¹¹“Yihuda chuba Manase-i item tesempatsü mapatem inyak nungji aser parnok jakdang aliba Amor nunger dang alaka tamajung inyak aser süngyanglu agi Yihuda temenen menadaktsü nungji,

¹²yamai KIBUBA Israel Tsüngremi ashir, Ajiang, Yirusalem aser Yihuda madak ni tamajung lendong ka arudaktsütsü, oda shibaisa iba indang angashidir tenarong anapronglai asatsü.

¹³Ni Samaria anema tasadangba lisü mesangba ama Yirusalem anema kasa angsüji mesangtsü, kobai Ahab kibong anema asadang. Nisung kati pei chiyungba su aidoker rembanga ayuba ama ni Yirusalem aidoktsü.

¹⁴Ni kü senmanger tanüngba endokadoktsü, aser parnok tsükchir ket nung parnok bendanga agütsütsü. Parnokji tsükchir ajaki tetepsettsü aser rakzükraktemtsü;

¹⁵kechiaser kü madang kechi majung aji parnoki inyak, aser parnok tebou nunger Ijip lima nungi adoker tanü tashi, parnoki ni ain adokdaktsü.”

¹⁶Talisa Manase-i tai makar zü kanga tokshi kobai Yirusalem tatem külen nungi külen tashi süngdaktsü. Iba den ano pai Yihuda nem temenen benshidakja KIBUBA madang temenen inyak.

¹⁷Tang Manase tanüngba mapa aser pai inyakba ajak, aser pai benshiba temenentem, itemji Yihuda chubatem putipuyang kaket nung zülua melika ma?

¹⁸Manase tebu nunger den mejang, aser par tsüki Lizza atsüki nung rema ayu; aser par chir Amoni pa melen chuba.

¹⁹Amon chubatsü tenzükdang pa küm metsür ana liasü; aser pai Yirusalem nung küm ana chuba. Pa tetsü tenüng Yotba nunger Haruz jala Meshullemeth liasü.

²⁰Tebu Manase-i inyakba ama KIBUBA madang kechi majung aji pai inyak.

²¹Aser tebui jajaba lenmang ajak nung pai jaja, aser tebui tenzükba süngyanglutem tenzük, aser itemji külem.

²²Pai tebou nunger Tsüngrem KIBUBA senzüka toktsü, aser KIBUBA lenmang nung mejaja.

²³Amon tenzükertemi pa anema tamajung asa aser chubaji pei kidang tepset.

²⁴Saka Amon chuba anema tasa yanglur ajakji linük nisungtemi tepset; aser linük nüburtemi pa melen par chir Yosia chuba kümdaktsü.

²⁵Tang Amon tanüngba mapa koba pai inyak itemji Yihuda chubatem putipuyang kaket nung zülua melika ma?

²⁶Pa pei leper nung Uzza atsüki nung rema ayu; aser par chir Yosia pa melen chuba.