Read njo 2 CHUBATEM 22 Bible Online

2 CHUBATEM 22 - njo bible

2 CHUBATEM 22

¹ Yosia chubatsü tenzükdang pa küm ti liasü; aser pai Yirusalem nung küm semerka chuba. Pa tetsü tenüng Yedida, Boskath nunger Adaia jala liasü.

²Koba KIBUBA nükdang shitak aji pai inyak, aser tebu Dawid lenmang ajak nung pai jaja, aser tajichilen mesüra tabeleni memeyip.

³Yosia küm tertibuba nung tezülur Meshullam jabaso Azalia chir Shafan, KIBUBA kidangi chubai yoka ashi,

⁴“Temaba putir Hilkia dangi, oda sen koba kishinükeri nisungtem nungi bendena, KIBUBA kidangi bener arua ali, pai senji züngdangtsü asoshi tuang.

⁵Parnoki aji KIBUBA kidang ketdangsüa mapa inyakertem ket nung agütsüdakjang. Aser aji parnoki KIBUBA kidang, ki teraksa yanglushitsü aliba mapa inyaker nisung nem;

⁶mistritem, kisürtem, aser lung mistritem nem, aser ki yanglushitsü asoshi süngtsük aser tangentet lung alitsü asoshi agütsüdakjang,

⁷ aji saka parnok ket nung agütsüba senji parnok den mezüngdangtep; kechiaser parnoki ochi shia inyak.”

⁸Temaba putir Hilkiai tezülur Shafan dang ashi, “Ni KIBUBA kidang ozüng kaket nguogo.” Aser Hilkiai kaketji Shafan nem agütsü aser pai aji azüng.

⁹Tezülur Shafan chuba dangi arua ashi, “Ne tenzükertemi kidang anguba sen ajak agiogo, aser aji KIBUBA kidang ketdangsüa aliba mapa inyaker ket nung agütsüogo.”

¹⁰Tezülur Shafani chuba dang ashi, “Putir Hilkiai kü nem kaket ka agüja lir.” Aser Shafani chuba tsüngdang aji azüng.

¹¹Kodang chubai ozüng kaket otemji angashi, pai pa süoshi shisa.

¹²Chubai putir Hilkia, Shafan chir Ahika, Mekaia chir Akbor, tezülur Shafan, aser chuba tenzüker Asaia dang mela-a ashi,

¹³“Nenok oang, ni asoshi aser nübur asoshi, aser Yihuda ajak asoshi iba kaket ngua aliba o indang KIBUBA dang asüngdangang. Kechiyong asenok anema KIBUBA ain tulu adoka lir, kechiaser asen tsüraburi iba kaket nung aliba o, aser asenok indang züluba ajak amaji inyaktsü manga.”

¹⁴Anungji putir Hilkia, Ahikam, Akbor, Shafan, aser Asai sobutsü ayudak tanüker Harhas jabaso Tikva chir Shallum kibutsü Hulda ainkar dangi asüngdangyatsü ao; la Yirusalem nung yimti tasenba nung liasü.

¹⁵Lai parnok dang ashi, “Yamai KIBUBA Israel Tsüngremi ashir, Kü dangi nenok yokba nisung dangji nenoki shiang,

¹⁶Yamai KIBUBAi ashir, ‘Ajiang, ni iba linük madak aser iba nung aliba nisungtem madak oda Yihuda chubai azüngba kaket nung aliba o ajak, amaji tamajung arudaktsütsü.

¹⁷Kechiaser parnoki ni senzüka toktsü, aser parnok teka mapa ajak agi parnoki ni ain adokdaktsütsü atema tangar tsüngremtem dang teronem menemtsü rongogo; aji asünung iba linük anema kü terasaba adoktsü, aser aji mesünemtsü.’

¹⁸Saka Yihuda chuba, shibai nenok KIBUBA nungi asüngdangtsü yok, yamai nenoki pa dang ashitsüla, ‘Yamai KIBUBA Israel Tsüngremi ashir, Nai angashiba o indang,

¹⁹ne mulungjang atsüanem aka nungji aser ne sasa KIBUBA madang ajemalu nungji, kodang ni iba linük anema aser iba nung aliba nisungtem anema oda parnok azüngmeyakdak aser atakatemba ka ta nai angashi, ne süoshi shisa aser kü madang ajeb nia ne dang angashiogo ta KIBUBAi ashir.

²⁰Aji asünung ajiang, ni ne tsürabur dangi na ania arutsü aser na ne leper dangi tesünep nung arudaktsütsü, mesüra ni iba linük madak koba lendong bener arudir aji ne tenük agi mangutsü.” Aser parnoki chuba dangi tanaben osangji bener aru.