Read njo 2 CHUBATEM 23 Bible Online

2 CHUBATEM 23 - njo bible

2 CHUBATEM 23

¹Idangji chubai Yihuda aser Yirusalem nungi tatartem ajak pa dangi aja.

²Chubaji KIBUBA kidangi atu, aser Yihuda o Yirusalem nung alir ajak, putirtem aser ainkartem, nisung ajak, tulu tila na, aser parnok narong nung tezüngzüktepba kaket koba KIBUBA kidang angu item o ajak pai azüng.

³Chubai sabang anasa noktak, aser KIBUBA madang tezüngzüktepba ka yanglu, KIBUBA sülen jajatsü aser pai melabatem benshitsü aser pa ozüngtem, aser pa tzüzüng-ozüngtem, pa mulungjang ajak, pa tanela ajak agi iba kaket nung zülua aliba tezüngzüktepba otem inyaktsü; aser nisung ajaki tezüngzüktepbaji akangshitep.

⁴ Idangji Hilkia putir aser tanabuba putir aser kishi nükertem dang KIBUBA tenla ki nungi Baal, Ashera, aser anüng petinutem asoshi yangluba marok ajak bener adoktsü chubai mela, aser Kidron moapu Yirusalem amung nung pai itemji rongtok aser item autji Betheli bener ao.

⁵Süngyanglu külemba putirtem, shirnok Yihuda chubatemi Yihuda yimtitem tenem tekülemdak aser Yirusalem temeket nung teronem menemtsü arongtsü shimtet, aser ano Baal, anü, ita, petinu lungtenba, aser anüng petinu ajak dang teronem menemtsü arongertem pai anendaktsü.

⁶Pai KIBUBA ki nungi, Yirusalem atena, Kidron ayong dangi Ashera bener adok aser aji Kidron ayong nung rongtok, aser aji auyi küma menüngsa aser autji yimkong leper manung proktok.

⁷KIBUBA kidang aliba jabujaritem ki, kong tetsürtemi Ashera asoshi sepoksü atak pai aji shisatsü.

⁸Yihuda yimtitem nungi putir ajak pai anir aru, aser putirtemi teronem menemtsü arongdak tenem tekülemdak, Geba nungi Beersheba tashi menentsü; aser yimti governor Yihusua süngkhümleni ailen tenem tekülemdak süngkhümtemji pai raksatsü, aji yimti süngkhümi aidang tabelen liasü.

⁹Aji saka tenem tekülemdak putirtemi Yirusalem nung KIBUBAtenladak metenzük, saka parnoki parnok adianu rongnung piyazü meinokba amtsük achi.

¹⁰ Hinnom lenten nung, oda nisung shiai pei jabaso mesüra pei jala, Molek nem mi agi merongsetdaktsütsü atema pai Tofet menendok.

¹¹Yihuda chubatemi anü nem agüja aliba kortem KIBUBA tenla ki lenmang nung, teyangluba nisung Nathan-Melek taktang anasa koba kima temeket nung liasü itemji pai bener oadok; aser anü talungtsütemji pai mi agi rongtok.

¹² Tenladak koba Ahaz taktang temaba nung liasü, koba Yihuda chubatemi yanglua liasü, aser KIBUBA ki kima anatsülen nung tenladak koba Manase-i yanglua liasü aji chubai raksatsü, aser idak nungjagi bendokadok, aser item auyiji Kidron ayong nung proktok.

¹³ Yirusalem anüdoklen tenem tekülemdak koba Israel chuba Solomoni Ashtoreth asoshi, Sidon nunger tesempatsü mapa yanglua ali, aser Kemosh asoshi Moab nunger tesempatsü mapa, aser Milkom asoshi Ammon chirtem tesempatsü mapa, pai raksatsü.

¹⁴Pai temeshi tongshitem anüka raksatsü aser Ashera lepzüka yok, aser parnok alidak nisung teret agi süngdaktsü.

¹⁵ Ano Bethel nung aliba tenladak, aser Nebat chir Yeroboam shibai Israel temenen benshidaktsü, pai tenem tenladak tekülemdak yanglubaji pai raksatsü; aser pai tenem tekülemdakji arong aser auyi küma akusa, aser Asheraji rongdok.

¹⁶ Yosiai meyip aser tenem nung aliba lepertemji angu; pai yok aser leper nungi teret agitet aser itemji tenladak arong, aser Tsüngrem nisung shibai item mapa sangoktsü, KIBUBA O sangoktsüba ama aji menendok.

¹⁷ Idangji pai ashi, “Oagi ni anguba lungji kechi?” Idangji yimti nisungtemi pa dang ashi, “Ibai Tsüngrem nisung leper lir, shiba Yihuda nungi aru, aser Bethel tenladak anema nai kechi inyak item mapa sangoktsü.”

¹⁸Pai ashi, “Pa oda tokjang; shingaia pa teret tagien.” Anungji parnoki Samaria nungi adokba ainkar teret den pa teret oda toktsü.

¹⁹Ki ajak ano tenem tekülemdak yangluba Samaria yimtitem nung aliba koba Israel chubatemi KIBUBA ain adokdaktsütsü yanglu, Yosiai bener oa item dak pai Bethel nung inyakba mapa ajak amato inyak.

²⁰Aser tenem tekülemdak putir ajak shirnok yangji liasü, pai tenladak manung tepset aser item manung nisung teret arong; ajiser pa Yirusalemi shilang.

²¹Chubai nisung ajak dang mela-a ashi, “Tezüngzüktepba iba kaket nung zülua aliba ama KIBUBA nenok Tsüngrem dang Süia Aoba benjong mungang.”

²²Atangji Israel o bendangba aser Bendangertem tensa nungi mesüra Israel chuba mapang ajak nung, mesüra Yihuda chuba tensa iba ama Süia Aoba benjong mamung,

²³saka Yosia chuba küm tertibuba nung KIBUBA dang iba Süia Aoba benjongji Yirusalem nung amung.

²⁴Ano süli aortem tepuar arasenertem kibong tsüngremtem süngyanglutem, aser Yihuda aser Yirusalem nung anguba tesempatsü mapa ajak KIBUBA kidang Hilkia putiri anguba kaket koba nung ozüng zülua liasü, aji Yosiai inyaktettsü atema pai agiendaktsü.

²⁵Pa dang tamalen, pei mulungjang ajak agi, tanela ajak agi, tashi ajak agi, Mosa ozüng ajak amato, KIBUBA dangi meyipba pa ama chuba maliasü; mesüra pa sülen pa mesüka kata madok.

²⁶Aji saka KIBUBAi pa ain Yihuda anema adokdakja ali nungji pa tetsübutsü ain tulu adokba nungi memeyip, kechiaser Manase-i ajungmesoa ain adokdaktsüba agi pa ain adokdaktsü.

²⁷KIBUBAi ashi, “Ni Israel aenshidaktsüba ama ni Yihuda kü madang nungi aenshidaktsütsü, aser koba indang, Kü tenüng yangji alitsü ta ashi ni shimtetba yimti, oda Yirusalem, ni sentoktsü.”

²⁸Tang tanüngba Yosia mapa, aser pai inyakba ajak, itemji Yihuda chubatem putipuyang kaket nung zülua mali no?

²⁹Pa tensa nung Ijip chuba Farao Nekoi Asiria chuba anema Eufrata ayongi atu; aser Yosia chuba pa anema ao; aser pai pa angudang Megiddo nung pai pa tepset.

³⁰Pa tenzükertemi pa talungtsü ka nung Megiddo nungi tasü bener ao, aser pa Yirusalemi bener arua pa pei leper nung arem. Aser linük nüburi Yosia chir Yehoahaz agi, aser pa dak totzü mezütsü aser tebu melen chuba kümdaktsü.

³¹Yehoahaz chubatsü tenzükdang pa küm metsür asem liasü, aser pai Yirusalem nung ita asem chuba. Pa tetsü tenüng Libna nunger Yerimia jala Hamutal liasü.

³²Pa tsüraburi inyakba ajak amato koba KIBUBA madang majung liasü pai aji inyak.

³³Idangji Farao Nekoi Yirusalem nung pa mechubadaktsütsü pa tepuokdak Ribla nung Hamath lima nung ayu; aser linükji taribi seret semermer ozükba ka putisü ayu.

³⁴ Idangji Farao Nekoi Yosia chir Eliakim tebu Yosia melen chuba kümdaktsü, aser pa tenüng Yehoiakim ta melentsü. Saka pai Yehoahaz Ijipi bener aru, aser yangji pa asü.

³⁵Yehoiakimi taribi aser honji Farao nem agütsü, saka Faraoi akhangba ama senji agütsütsü asoshi pai linük madak kangshia ali melen sarutsüsa aküm. Nisung shia nungi Farao Neko nem agütsütsü asoshi linük nübur nungi taribi aser hon pei akaba yari pai agi.

³⁶ Yehoiakim chubatsü tenzükdang pa küm metsür pungu liasü; aser pai Yirusalem nung küm terka chuba. Pa tetsü tenüng Ruma nunger Pedaia jala Zebida liasü.

³⁷Pai pa tsüraburi inyakba ajak amato koba KIBUBA madang majung aji inyak.