Read njo 2 CHUBATEM 24 Bible Online

2 CHUBATEM 24 - njo bible

2 CHUBATEM 24

¹ Pa tensa nung Babilon chuba Nebukadnezzar atu, aser Yehoiakim küm asem pa tenzüker aküm; ajiser pai meyipa pa anema adok.

²KIBUBAi pa anema Kaldi, Siria, Moab aser Ammon nunger telok yok, aser KIBUBA o pa tenzükertem aser ainkartemi jembiba amato, Yihuda samatsütsü parnok yok,

³atangji Manase temenen yong pai inyakba ajak ama, aser ano pai koba tai makaba zü tokshi, kechiyong pai tai makaba zü agi Yirusalem süngdaktsü;

⁴KIBUBAi melaba agi ibai pa tsüngdang nungi agientsü asoshi Yihuda madak ya atalok; aji asünung KIBUBAi tai madok.

⁵Tang Yehoiakim tanüngba mapa, aser pai inyakba ajak itemji Yihuda chubatem putipuyang kaket nung zülua melika ma?

⁶Anungji Yehoiakim pa tsürabur den mejang, aser par chir Yehoiakin pa melen chuba.

⁷Joko Ijip chuba tanaben pei lima nungi madok; kechiyong Babilon chubai Ijip ayong nungi Eufrata ayong tashi, Ijip chuba meyong ajak agir liasü.

⁸Yehoiakin chubatsü tenzükdang pa küm terti liasü; aser pai Yirusalem nung ita asem chuba. Pa tetsü tenüng Yirusalem nunger Elnathan jala Nehusta liasü.

⁹Tebui inyakba ajak amato, koba KIBUBA madang majung liasü aji pai inyak.

¹⁰Iba mapang nung Babilon chuba Nebukadnezzar tenzükertem Yirusalemi atu, aser yimtiji makbang.

¹¹Babilon chuba Nebukadnezzar pa tenzükertemi aji makbanga alidang yimti jagi atu.

¹² Yihuda chuba Yehoiakin Babilon chuba dangi pa aser tetsü pa tenzükertem, par tamarenertem aser par teyangluba nisungtem ao; aser pa chubaba küm tibuba nung Babilon chuba nem bendanga agütsü.

¹³KIBUBAi ashiba amato, KIBUBA kidang nungi pai rongsen ajak aser chubar ki rongsen idak nungjagi bener adok, aser Solomon chubai KIBUBA tenla kidang yangluba hon marok, su ajak anüka lepsatsü.

¹⁴Pai Yirusalem ajak, aser tamarener ajak, tashi tait temeranger ajak, oda tepuoker meyi ter, aser süng mistri aser yintsünger ajak bener oa linük nung sensaktiba nübur dak alema shinga metoktsü.

¹⁵ Pai Yehoiakin Babiloni bener ao; aser chuba tetsü, aser kinungtsütem, aser par teyangluba nisungtem, aser linük nung tongtipurtem, pai Yirusalem nungi Babiloni pur ao.

¹⁶Aser tashi aitba nisung ajak, oda meyi tenet, aser süng mistri aser yintsünger meyi ka, parnok ajak tashi tait aser raratsü tetemsü, parnokji Babilon chubai pur Babiloni bener aru.

¹⁷ Babilon chubai Yehoiakin tebu tanubu Mattania pa melen chuba kümdaktsü aser pa tenüng Zedekia melentsü.

¹⁸ Zedekia chubatsü tenzükdang pa küm metsür ka liasü; aser pai Yirusalem nung küm terka chuba. Pa tetsü tenüng Libna nunger Yerimia jala Hamutal liasü.

¹⁹Yehoiakimi inyakba ajak amato, koba KIBUBA madang majung liasü aji Zedekiai inyak.

²⁰ Kechiyong KIBUBA ain adokba ajanga Yirusalem aser Yihuda nung, pa tsüngdang nungi parnok mejentok tashi ya atalok; tang Zedekiai Babilon chuba anema adok.