Read njo 2 CHUBATEM 25 Bible Online

2 CHUBATEM 25 - njo bible

2 CHUBATEM 25

¹ Anungji pa chubaba küm tukububa ita terbuba anogo terbuba nung Babilon chuba Nebukadnezzar aser pa temeranger telok Yirusalem anema aru, aser iba meketa parnoki mitsa yanglu.

²Anungji yimtiji Zedekia chuba küm terka buba tashi makbanga ali.

³Ita pezübuba anogo tuku buba nung yimti nungji ayawara sashia liasü, anungji linük nung nisungtem asoshi chiyungtsü maliasü.

⁴ Idangji yimtiji rakpok aser chuba aser temeranger ajak aonung jara ana tsüngda koba chubar atsüki anasa liasü süngkhümbong lenmang jagi jena ao. Tang Kaldi nungeri yimti anema meketa liasü aser chubaji Araba lenmangi ao.

⁵Saka Kaldi nunger temeranger teloki chuba sülen aria ao aser pa Yeriko lenten nung menepa par temeranger telok ajak pa nungi prokshiadok.

⁶Idangji parnoki chubaji apu, aser Babilon chuba dangi Riblai bener atu, aser parnoki pa madak o bendang agütsü.

⁷ Aser parnoki Zedekia chirtem pa nükdang tepset, aser Zedekia nükjang arokdoktsü aser yinzü agi alener pa Babiloni bener ao.

⁸Babilon chuba Nebukadnezzar küm tertukububa ita pungububa anogo tenetbuba nung Babilon chuba tanüker arkotong Nebuzaradan Yirusalemi aru.

⁹ Pai KIBUBA ki aser chubar ki rongtoktsü aser Yirusalem nung ki tulu ajak pai mi agi rongtokadok.

¹⁰Tanüker madak arkotong den aliba Babilon nunger temeranger telok ajaki Yirusalem jara meketa rakpok.

¹¹Ano yimti nung toktsüba anünga alir nisungtem, aser toktsür ajenertem shirnok Babilon chuba dangi ajen, aser anüngzüka aliba telok, tanüker madak arkotong Nebuzaradani pur ao.

¹²Saka tanüker madak arkotongi linük nung sensaktiba nübur kar tsükmenatzü menünger aser alu ayimertem asütsü toktsü.

¹³ KIBUBA kidang aliba yongmenyin tongshitem, aser tamentakdak aser yongmenyin Tzüyim KIBUBA kidang aliba, Babilon nungeri anüka raksatsü, aser item yongmenyinji Babiloni bener ao.

¹⁴ Aser po, aser tateptsü yinpak, misü mejepba aser chisang aser parnoki benshiba yongmenyin chipo-anpo ajak parnoki bener ao.

¹⁵Aser mi atepba aser susa, kechisa hon aser taribi agi yanglua liasü aji tanüker arkotongi bener oadok.

¹⁶Tongshi anaji, tzüyim kaji aser tamentakdak koba Solomoni KIBUBA ki asoshi yanglu, item chipo-anpo yongmenyinji odangtsü mokoki liasü.

¹⁷Tongshi kaji süklep terti talang liasü, aser iba manung yongmenyin agi tongshibang noksa amenoka liasü, aser tongshibang noksa süklep asem talang liasü, aser noksa mokloka yanglubaji meketa katepba aser jarem naro ajak yongmenyin agi liasü, aser itemi mesüka tanabuba tongshi nungjia mechitepa yangluba liasü.

¹⁸Tanüker arkotong jagi putiunger Saria, aser tanabuba putir Zefania aser kishi nüker asem apu.

¹⁹Yimti nungi raraba nisungtem madak yutsüba teyangluba nisung ka; aser chuba den külemi aliba nisung pungu shirnok yimti nung angu, aser linük nung temeranger telok jatenba arkotong tezüluba, aser yimti nung anguba linük nung alir nisung roker, pai apu.

²⁰Tanüker madak arkotong Nebuzaradani parnok apu, aser parnok Babilon chuba dangi Riblai bener aru.

²¹Babilon chubai parnok Hamath lima Ribla nung tepsetdaktsü. Yamaji Yihuda par lima nungi tepuoker küma bener ao.

²²Yihuda lima nung Babilon chuba Nebukadnezzari toktsüba nübur asoshiji par madaka pai Shafan jabaso Ahikam chir Gedaliaji governor kümdaktsü.

²³Tang temeranger telok arkotong ajaki parnok aser parnok nüburi, Babilon chubai Gedalia governor kümdaktsüogo ta angashidang, parnoki Mizpai Gedaliai dangi aru, Nethania chir Ishmael Karea chir Yohanan Netofat nunger Tanhumeth chir Seraia aser Makat nunger chir Yaazania, parnok aser parnok nübur aru.

²⁴Parnok dang aser parnok nübur dang Gedalia azüngashia ashi, “Babilon nunger tenzükertem asoshi tetsübu; linük nung liang, Babilon chuba tenzükang, aser nenok junga alitsü.”

²⁵ Saka ita tenet buba nung Elishama jabaso Nethania chir Ishmael chubar sosem, pa den nisung ter aru aser Gedalia, aser Mizpa nung Yihuda nunger aser Babilon nunger pa den alirtem tepset.

²⁶ Nisung ajak, tila tulu na, aser temeranger telok madak arkotongtem arameso, aser Ijipi aru; kechiaser parnoki Babilon nunger tsübua liasü.

²⁷Yihuda chuba Yehoiakin pur aoba küm semer tenetbuba nung, ita teranabuba anogo metsür tenetbuba nung, Babilon chuba, Evil-Merodaki, pa chubaba mezüngbuba küm nung, Yihuda chuba Yehoiakin tepuokdak nungi anitet;

²⁸aser pai pa dang meima jembi, aser pa den Babilon nung aliba chubatem menden madak pa nem menden ka agütsü.

²⁹Pai tepuoker sobutsü melen, aser pa arishi tepiyong chuba langbang nung maneni chiyunga ali.

³⁰Pa taküm tepiyong asoshi chubai pa nem anogoshia taa agütsü.