Read njo 2 CHUBATEM 3 Bible Online

2 CHUBATEM 3 - njo bible

2 CHUBATEM 3

¹Yihuda chuba Yehoshafat küm tertibuba Samaria nung Israel madak Ahab jabaso Yeroboami chubatsü tenzük, aser pai küm terana chuba.

²KIBUBA tsüngdang kechi majung pai inyak; saka tebu aser tetsü memesük, kechiyong tebui yanglua aliba Baal temeshi tongshi pai endokadok.

³Aji saka pai Nebat chir Yeroboam temenen dak azüit, koba agi pai Israel temenen menadaktsü iba nungi pai mepila.

⁴Tang Moab chuba Mesha, san metsür ka liasü, aser pai Israel chuba nem san chanu meyi noklang ka, aser san tepung meyi noklang ka tezüng dena agütsü.

⁵Saka kodang Ahab asü, Moab chubai Israel anema apuso.

⁶Iba mapang nung Yeroboam chuba Samaria nungi oa Israel ajak atenshidaktsü.

⁷Aser pa oa Yihuda chuba Yehoshafat dangi yoka ashi, “Moab chubai ni anema apusoogo, na kü den Moab anema tongbangi aotsü asü?” Pai langzü, “Ni atutsü na kechiar nia aji lir, kü nübur ne nüburtem ama, kü kor ne kortem ama lir.”

⁸Pai asüngdang, “Koba lenmangi asenok atutsü?” Pai langzü, “Edom lisem lima lenmangi.”

⁹Anungji Israel chuba o Yihuda chuba aser Edom chuba ao; parnoki anogo tenet meketa jaja, aser temeranger telok asoshi aser parnok sülen anitakba shiruru asoshi tzü maliasü.

¹⁰Israel chubai ashi, “Ayatai! Kechiyong KIBUBAi item chuba asem ya Moab chuba ket nung agütsütsü külemi jaogo.”

¹¹Saka Yehoshafati ashi, “KIBUBA ainkar ka, asenoki pa agi KIBUBA dang asüngdangtsü mali no?” Aser Israel chuba tenzüker rongnung kati langzüa ashi, “Shafat jabaso Elisha shibai Elija ket nung tzü shiloktsü, pa yangi lir.”

¹²Aser Yehoshafati ashi, “KIBUBA O pa den lir.” Anungji Israel chuba aser Yehoshafat aser Edom chuba pa dangi alu.

¹³Elishai Israel chuba dang asüngdang, “Ni ne den kechi inyaktsü? Na nebu ainkartem dangi oang.” Israel chubai pa dang langzü, “Masü, kechiyong item chuba asem Moab chuba ket nung agütsütsü KIBUBAi jaogo.”

¹⁴Elishai ashi, “Atangji temeranger KIBUBA shiba madang ni noktaker, taküm ali nungji, Yihuda chuba Yehoshafat asoshi ni mebilem asübo, ni ne tsütsü mereprangla mesüra na mungula.

¹⁵Saka tang kü dangi ken tener ka anir arung.” Kodang kenteneri kongki atem, KIBUBA teka pa madaki aru.

¹⁶Aser pai ashi, “Yamai KIBUBAi ashir, ‘Iba lenten ongken agi sünga kümdakjang.’

¹⁷Kechiyong yamai KIBUBAi ashir, Nenoki mopung mangutsü mesüra nenoki tzünglu mangutsü, aji saka iba lentenji tzü agi sünga alitsü; aser nenok, nenok nashi telok aser nenok shirurutem ajemtsü.

¹⁸KIBUBA nükdangbo ya atamata mapa ka dang lir, pai ano Moab nunger nenok ket nung bendanga agütsütsü.

¹⁹Nenoki yim lung tsüki shia, aser teshimtet yimti shia atsüngtettsü, aser süngdong tajung shia lensüktsü, aser tzüpokdak ajak anendaktsütsü, aser ali tajung tera aliba ajak lung agi raksatsütsü.”

²⁰Aser anepdang tenla agütsüba mapang nung ajiang, Edom lenmang anasa tzü aru, aser tzü agi alinükji asüng.

²¹Tang kodang Moab nunger ajaki parnok anema chubatem rarai atua lir ta angashi, parnok sasa nangri akangtsü akokba nungi shir temalen külemi sentep aser külen arrtsü nung noktak.

²²Parnok anepdang yakta shishi aser anüi tzü manung puloktsü, idangji Moab nungeri parnok jakdang tzüji azü ama temerem angu.

²³Parnoki ashi, “Ya azü lir, atangji chubatem külemi raratepogo, aser parnok nisung shiai pei medemer tepsetogo, aji asünung, tang Moab oset-tsüset dangi ilungang!”

²⁴Kodang parnok Israel tanendaki aru, Israel nunger aramesoa Moab nunger den rara, anungji parnok jakdang parnok jena ao, aser parnok tejakleni Moab nunger tepsetyonga ajagi ai.

²⁵Parnoki yimtitem raksatsü aser ali tajung tera aliba shia parnok nisung shiai pei lung ontaktsü, aser aji süngdaktsü, aser parnoki tzüpokdak ajak anendaktsü, aser süngdong tajung ajak lensük aser Kir-hareseth nung dang lung anünga yutsü; aji saka lung lijak amertemi aji aria oa parnok denji rara.

²⁶Kodang Moab chubai pa asoshi tongbang kanga mejungi angu, nok asemba nisung noklang tenet, Edom chuba dangi nungpoka aitsü anir ao; saka parnoki makok.

²⁷Idangji pa melen chubatsü aliba par chir tambusang pai agi aser jara manung tarongba tenla agütsü. Aser Israel anema ain tulu adokba aru: aser parnoki pa nungi pila-a oa pei limai meyip.