Read njo 2 CHUBATEM 4 Bible Online

2 CHUBATEM 4 - njo bible

2 CHUBATEM 4

¹Tang ainkartem chir kibutsü rongnung tetsür kati Elisha dang ashi, “Ne tenzüker kü kinungpu süogo aser ne tenzükeri KIBUBA tsübua liasü ta nai metet, aser ozü chir ana alar südaktsütsü anir aotsüba sentem agütsür arua lir.”

²Elishai la dang ashi, “Na asoshi ni kechi inyaktsü? Kü dang shiangma, ne kidang kechi lir?” Lai langzü, “Totzü bongdang ka dak alema ne kilitsür kidang kecha maka.”

³Idangji pai ashi, “Oang, ne kiyonger ajak nungi bongdang, oda bongdang tazüng apuang, ishikadangbo maputsüla.

⁴Aser na, aser ne jabasotem yiang aser kishi shibangang, aser item bongdang ajak nung totzüji shiokang, aser koba sünga lir aji nai agiena yuang.”

⁵Anungji pa nungi la oa la aser lar jabasotemi kishi shibang; parnoki bongdang la dangi bener aru, aser lai totzüji züoktsü.

⁶Kodang bongdangtemji sünga liasü, lai lar jabaso dang ashi, “Ano kü dangi bongdang ka bener arung,” aser pai la dang ashi, “Joko bongdang mali.” Aser totzüji anen.

⁷Idangji lai arua Tsüngrem nisung dang ashi. Aser pai ashi, “Oang, totzüji yokang, aser ne sentsü ao-ang, aser tanüngba madak na aser ne chir taküm liang.”

⁸Kenü anogo takartsür ka alidak süia Shunami Elisha ao, aser amtsük achitsü lai Elisha dang mepishi. Aser yamai asü, oda pa kwiben anasa süia ao, pa amtsük achitsü ajagi meyip.

⁹Lai la kinungpu dang ashi, “Tang ajiang, asenok anasa maneni süiba ibai Tsüngrem temeshi nisung ka ta ni ajiteter.

¹⁰Yimlibilema asenoki ki tila ka jara dena yanglutsüdi, aser pa asoshi asenoki yipten ka, langbang ka, menden ka, aser milendong ka yutsüdi; aser kodangsa pa asenok dangi arudir, pa ajagi aitsü.”

¹¹Kenü anogo pa ajagi aru, aser taktang jagi ai, aser yangji anisüngzüka ali.

¹²Pai pa kilir Gehazi dang ashi, “Iba Shunamtsür ja-ang.” Aser pai kodang la aja, pa madang la noktak.

¹³Aser pai pa dang ashi, “Tang la dang shiang, ajiang, nai onok asoshi anebalua iba timtem ajak agiogo, na asoshi kechi inyaktsü? Ne indang chuba dang mesüra temeranger tanishir dang shidaktsünür asü?”

¹⁴Aser pai langzü, “Ajangla la asoshi kechi inyaktsü?” Aser Gehazi langzü, “Atangji la jabaso mali, aser la kinungpu tambur lir.”

¹⁵Aser pai ashi, “La ja-ang.” Aser kodang pai la aja, la kishi nung noktak.

¹⁶Aser pai ashi, “Iba mapang nung, kodang tanaben mapang tongdir, nai jabaso ka angutsü.” Aser lai ashi, “Masü, kü kibur, na Tsüngrem nisung, ne kilitsür dang tiyazü ma.”

¹⁷Tetsürji mashisa aküm aser Elishai la dang ashi ama, kodang mapang tanaben tonga aru, iba mapang nungji jabaso ka aso.

¹⁸Tang tanurji tain akümdang pai kenü anogo tebu dangi alururtem dangi ao.

¹⁹Aser pai tebu dang ashi, “Kü kolak, kü kolak.” Aser pai kilir dang ashi, “Tetsü dangi pa anir oang.”

²⁰Kodang pai pa anir ao aser tetsü dangi bener aru, pai anjongmeshi tashi tetsü tepi nung amen, aser asü.

²¹Lai atu, aser Tsüngrem nisung yipten nungji pa ataloka yutsü, aser pa kishi shibangtsü aser oadok.

²²Aser lai pa kinungpu aja aser ashi, “Yimlibilema Tsüngrem nisung dangi ni yakta aotsü aser tanaben arutsü, kilir rongnung ka, aser gado rongnung ka kü dangi yokang.”

²³Aser pai ashi, “Kechiba na tanü pa dangi aotsü? Ya ita tasen mesüra amungnüa[1] masü.” Lai ashi, “Ajungtsü.”

²⁴Idangji lai gado ka nung amen, aser lar kilir dang ashi, “Kara-a meinang, ni ne dang mashi tashi meilungi tejajadaktsü.”

²⁵Anungji la oa Tsüngrem nisung dangi Karmel jagi aru. Kodang Tsüngrem nisung jagi la apiga nung angu, pai pa kilir Gehazi dang ashi, “Ajiang, oagi Shunam tsürlaji lir.”

²⁶Yimlibilema tang lenji asümang, aser la dang shiang, “Na junga lir ma? Ne kinungpu junga lir ma? Tanur junga lir ma?” Aser lai langzü, “Junga lir.”

²⁷Kodang la tenem jagi Tsüngrem nisung dangi aru, lai pa tetsüng nung sot. Aser Gehazi la nungtoktsütsü anasa aru, aser Tsüngrem nisung jagi ashi, “La oda tokjang, kechiyong la tanela telung nung jashiseta lir; aser KIBUBAi aji kü dang nungi miima lir, aser kü dang mashi.”

²⁸Idangji lai ashi, “Kü kibur dang ni jabaso ka asüngdang asü? Ni tashioktsü ta ni meshika ma?”

²⁹Idangji pai Gehazi dang ashi, “Ne nangri kangang, aser ne ket nung kü mechi amang, aser ne lenmangi oang, nai nisung kar ajurura pa nem salem tagütsü; aser kari ne nem salem agütsüra, pa dang tanaben telangzü, aser kü mechi tanur tejak manung ataloka yuang.”

³⁰Tanur tetsüi ashi, “KIBUBA taküm ali nungji, aser ne tanela taküm ali nungji, ni na metoktsütsü.” Aser pa aramesoa la sülen anitak.

³¹Aser Gehazi parnok jakdang ao, aser tanur tejak nung mechiji ataloka yutsü, saka ola mesüra telangzüba maliasü. Anungji pa den ajuruteptsü pai meyip, aser pa dang ashi, “Tanur mesaker.”

³²Kodang Elisha kidangi ait, ajiang, tanurji tasü pa yipten manung ataloka liasü.

³³Anungji pa telungi ai, aser tena madang kishi shibang, aser KIBUBA dang sarasadem.

³⁴ Aser pa atua tanur manung songtoka pa tebang manung pa tebang, tenük manung pa tenük, pa teka manung pa ket atalok, aser pai pei sasa pa madak songtok, aser tanurji shi talem aküm.

³⁵Ajiser pai meyipa aru, aser kidang khen oli aruli ta jaja, aser pa madak songtok, aser tanurji tenetben hachi, aser tanurji tenük lapok,

³⁶Aser pai Gehazi jar ashi, “Iba Shunamtsürlaji ja-ang.” Anungji pai la aja. Aser la kodang pa dangi ait, pai ashi, “Ne jabaso bena arung.”

³⁷Idangji lai ia pa tsüngdang la sasa ali nung apudak; aser lai lar jabaso bena aru aser adok.

³⁸Elisha tanaben Gilgali aru, aser linük nung ayawara liasü, aser ainkar chirtem pa jakdang mena liasü; aser pai par kilir dang ashi, “Ainkar chirtem asoshi chipo tulu tongtakang aser aontzü molu-ang.”

³⁹Aser kati aonsotsü bendentsü moapui ao, aser arem süngzü ka angu aser iba nungi arem meso süpok sünga bendena bener aru aser itemji aontzü metaba po nungji lemsar aso; kechiaser parnoki itemji memetet.

⁴⁰Anungji nisungtem achitsü asoshi parnoki mekepzük, saka parnoki aonji achidang, parnoki ayimtena ashi, “Oh Tsüngrem nisung, chipo nungji tasüba lir!” Aser parnoki aji mechitet.

⁴¹Saka pai ashi, “Ajangla chiyungtsü kar bener arung.” Aser pai aji chipo nung enokja ashi, “Nisungtem asoshi, parnok achitsü mekepzükang,” aser yangji chipo nung tamajung kecha maliasü.

⁴²Baal-shalisha nungi nisung ka arua Tsüngrem nisung nemji mezüng süngjang, barley amtsük metsü, aser mendi sükzükli pa juli nung bener arutsü. Aser pai ashi, “Nisungtem nem parnok achitsü agüjang.”

⁴³Aser pa tenzükeri ashi, ‘Kechi, ni ya nisung noklang ka madak yutsütsü no?’ Saka pai ashi, “Nisungtem nem tachitsü agüjang; kechiyong yamai KIBUBAi ashir, “Parnoki achitsü, aser kar anüngtsü.”

⁴⁴Anungji pai parnok madang yutsü aser parnoki aji achi, aser KIBUBA O amato karbo anüng.