Read njo 2 CHUBATEM 5 Bible Online

2 CHUBATEM 5 - njo bible

2 CHUBATEM 5

¹ Tang Naman, Siria chubar temeranger telok madak walunir, pei kibur madang kanga tulu aser tetushi aketba nisung liasü, kechiaser pa agi KIBUBAi Siria nem takok agütsü; ano pa tasü tait temeranger ka, saka pa dak zütsüra keta liasü.

²Aser Siria nunger rarai aodang Israel lima nungi tetsür chanu ka pua anir aru; aser lai Naman kibutsü tenzük.

³Lai pei kiburla dang ashi, “Samaria nung aliba ainkar denjiang kü kibura lidaktsünüali angji pai pa zütsüra anebtsütsü.”

⁴Anungji Namani Israel lima nungi aruba tetsür chanui yamai ashi ta pa kibur dang ashi.

⁵Siria chubai ashi, “Tang oang, aser ni Israel chuba dangi shiti ka yoktsü.” Pai pila-a oa pa den taribi mori ter, hon shekel meyi trok aser süoshi temelem ter bener ao.

⁶Pai Israel chuba dangi shitiji bener aru, kong ya zülua liasü, “Kodang iba shiti ne dangi arudir, ajiang ni kü tenzüker Naman, nai pa zütsüra anebtsütsü ne dangi yoka lir, ta metetang.”

⁷Kodang Israel chubai shitiji azüng, pai pei süoshi shisa aser ashi, “Tepsettsü aser taküm kümdaktsütsü ni Tsüngrem asü, oda zütsüra aketer anebtsütsü iba nisungi kü dangi yoker no? Saka shisadangang, oda pai koda kü den rarabangsenteptsü bushir ajiang.”

⁸Saka Tsüngrem nisung Elishai, Israel chubai pei süoshi shisa ta angashidang, pai chuba dangi yoka ashi, “Kechiba nai ne süoshi shisa? Pa kü dangi arudakjang, aser Israel nung ainkar ka lir ta pai metettsü.”

⁹Anungji Naman pei kor aser talungtsü den arua Elishar kishi züngdang noktak.

¹⁰Anungji Elishai osang abener ka pa dangi yoka ashi, “Oang Yordan nung tenetben shitokang, aser ne shi tanaben ne dak adoktsü, aser na merüka alitsü.”

¹¹Saka Naman ain adoka oadok aser ashi, “Ajiang, pai atangji kü dangi adoka noktaktsü aser KIBUBA pa Tsüngrem tenüng nung ajatsü, aser talidak manung pa teka ayipshitsü aser zütsüra aketerji anebtsütsü ta ni bilem.

¹²Israel tzü ajak dang nungi Damaska ayongtem, Abana aser Farpar tajungba masü no? Ni item nungji shitoktsü aser merüka melitettsü no? Anungji pai meyip aser ain adoka oadok.

¹³Aser pa tenzükertem anasa arua pa dang ashi, “Oba, ainkari ne dang mapa tulu kar inyaktsü melara nai aji meinyaki alitsü no? Ajangla, shitokang, aser merüka liang, ta ne dang ashibaji koda?”

¹⁴Idangji pa alu, aser Tsüngrem nisungi ashiba ama, pa sasa Yordan nung tenetben pungoka ai; aser pa shi tanur tila shi ama tanaben aküm, aser pa merüka liasü.

¹⁵Pai Tsüngrem nisung dangi pa aser par telok meyipa arua pa madang noktak; aser pai ashi, “Tang ajiang, ni metet Israel dak alema alima ajak nung Tsüngrem melika; tang aji asünung, yimlibilema ne tenzüker sempet ka agiang.”

¹⁶Saka pai ashi, “KIBUBA taküm ali tashi, shiba madang ni noktaker, ni kecha magitsü.” Aser pai aji agitsü pai pa dang ajungshi; saka pai magizük.

¹⁷Namani ashi, “Aji mesüra ni ne dang mepishir ne tenzüker nem gado ana amena aliba khu agidakjangma; kechiaser ne tenzükeri KIBUBA dang alema tang nungi tarongba tenla mesüra tetepsetba tenla tangar tsüngrem nem magütsütsü.

¹⁸Iba mapa nung KIBUBAi ne tenzüker dang tai tokangma, kodang kü kiburi Rimmon kidangi yangji külemtsü idir, aser pai tepen nung metalokdir, aser ni Rimmon kidang kü sasa apudakdang ni kü sasa Rimmon kidang apudakdir, KIBUBAi iba mapa nung ne tenzüker dang tai tokangma.”

¹⁹Pai pa dang ashi, “Tesünep nung oang.” Anungji pai pa nungi tatsüka pila-a ao.

²⁰Saka Tsüngrem nisung Elisha tenzüker Gehazi-i ashi, “Ajiang, Kü kiburi iba Siria nunger Naman ket nungi pai bener aruba magizüki dang aochiogo. KIBUBA taküm ali nungji, ni pa sülen asümtsü, aser pa nungi langka agitsü.

²¹Anungji Gehazi-i Naman sülen anitak. Kodang Namani pa sülen kar asüma aruba angu, pai talungtsü nungi alua ashi, ‘Ajak junga lir ma?’

²²Aser pai ashi, ‘Ajak junga lir.’ Kü kiburi ni yoka ashir, ‘Ajiang, tangang ainkar jabaso asangur ana Efraim tenem lima nungi kü dangi arua lir, yimlibilema, parnok nem sen mori ka aser süoshi temelen ana agüjangma.’

²³Namani ashi, ‘Hai, pelaseta sen mori ana agiangma.’ Anungji pai ajungshia süoshi temelentsü ana den sen mori ana juli nung aleptsü, aser itemji par kilir ana madang ataloka yutsü, aser parnoki itemji pa jakdang bener ao.

²⁴Kodang pa tenem jagi aru pai itemji parnok ket nungi agizük, aser itemji kidang rizünga ayu, aser nisungtemji pai odaktsü, aser parnok pila-a ao.

²⁵Saka pa telungi ia pa kibur jakdang noktak, Elishai pa dang ashi, “Gehazi, na kolen nungi aru?” Aser pai ashi, “Ne tenzüker kechaia mao.”

²⁶Aser pai pa dang ashi, “Nisungbaji ne den ajuruteptsü pa talungtsü nungi tanaben meyipdang kü mulungjang ne den mao no? Sen agizüktsü süoshi, oliv tsüki, tsükmenatzü lu, san aser nashi, aser kilir aser kilitsür agizüktsü ya mapang asü?

²⁷Aji asünung Naman zütsüraji ne dak aser ne metsü dak teti asoshi alitsü.” Aser pai pa tsüngdang nungi zütsüra aketer ka, rürjeb ama temesüng kümer ao.