Read njo 2 CHUBATEM 6 Bible Online

2 CHUBATEM 6 - njo bible

2 CHUBATEM 6

¹Ainkar chirtemi Elisha dang ashi, “Tang ajiangjo, ne kübok onok alidak, onok asoshi kanga temesü lir.

²Onoki Yordani odi, aser idak nungjagi nisung shia bembi ka ka bendi, aser onok litettsüsa onok asoshi idakji talidak ka yangludi.” Pai langzü, “Nenok oang.”

³Aser kati ashi, “Yimlibilema ne tenzükertem den aotsü mulungangma.” Pai langzü, “Ni aotsü.”

⁴Anungji pa parnok den ao aser parnok Yordani arur süng alep.

⁵Saka kati bembi ka lensükdang, pu kolakji tzü nung tsük, aser pai ayimten, “Aiatai, kü kibur! Kechiyong aji apua aruba lir.”

⁶Tsüngrem nisung jagi ashi, “Kong tsük?” Aser pai pa dang tesemji sayu, pai ajok ka lepzük aser aji yangji enoktsü, aser merang jagi tzüma nung pungdaka ayu.

⁷Aser Pa ashi, “Aji nai bena arung.” Anungji pai pa teka songtoka aji bena aru.

⁸Tang Siria chubai Israel anema rara, aser pai pa tenzükertem den jembiteper ashi, “Iba ama tesem ka nung kü tanendak alitsü.”

⁹Tsüngrem nisungi Israel chuba dangi yoka ashi, “Iba ama tesemi na mesüitsü kümdangang; kechiaser ajagi Siria nunger aludagi.”

¹⁰Tsüngrem nisungi pa dang tekümdangtsü indang ashiba tesem jagi Israel chubai yok; aser pa sasa yangji khen mesüra anaben dang mesüi kümzüka ali.

¹¹Siria chuba mulungjang iba mapa asoshi kanga timatem; aser pai pa tenzükertem aja aser parnok dang ashi, “Asenok rongnung shiba Israel chuba asoshi lir nenoki kü dang mesayutsü no?

¹²Aser pa tenzüker rongnung kati ashi, ‘Shinga masü, kü kibur Oh chuba, saka Israel nung aliba ainkar Elisha, ne yipten taktang nung nai jembiba otem Israel chuba dang pai ashir.’

¹³Pai ashi, ‘Ni yoka pa pua bener arutettsüsa pa kong ali oang aser ajiang.’ Aser aji pa dang metetdakja ashi, ‘Ajiang, pa Dothan nung lir.’

¹⁴Aji asünung pai ajagi kor talungtsü, aser temeranger telok tulu ka yok, aser parnok aonung arua yimtiji meketa lungbang.

¹⁵Kodang Tsüngrem nisung tenzükerji yakta shishir ao, ajiang, kor aser talungtsü den temeranger telok yimti meketa liasü. Aser pa tenzükeri pa dang ashi, “Aiatai, kü kibur! Asenok koda asütsü?”

¹⁶Pai langzü, “Tetsübu, kechiyong shirnok asen den lir, parnokji parnok den alir dang nungi taoba lir.”

¹⁷Aser Elishai sarasadem, “KIBUBA, ni ne dang sarasademer, pai angutsüsa pa tenük lapokjangma.” Aser KIBUBAi asangur nisung tenük lapoktsü aser ajiang, Elisha meketa kor aser mi talungtsü agi tenem sünga liasü.

¹⁸Kodang parnok pa dangi alu Elishai KIBUBA dang sarasadem, “Ni ne dang mepishir, item nisung nükpok kümdakjang.” Aser Elisha o amato pai parnok tenük pokdaktsü.

¹⁹Elishai parnok dang ashi, “Ibai lenmang masü mesüra iba yimtiji masü; kü sülen anidakang, aser nenoki bushiba nisung dangi ni nenok anir arutsü.” Aser pai parnok Samariai anir ao.

²⁰Kodang parnok Samariai aru, Elishai ashi, “KIBUBA, item nisungi ngutettsüsa nai item tenük lapokjangma.” Aser KIBUBAi parnok tenük lapoktsü, aser parnoki angu, aser ajiang, parnok Samaria tiyong nung liasü.

²¹Pai kodang parnok angu, Israel chubai Elisha dang ashi, “Oba, ni parnok tepsetdi ni? Ni parnok tepsetdi ni?”

²²Pai langzü, “Nai parnok metepsettsüla, ne nok aser ne lijak agi shirnok nai tepuoker mekümdaktsü parnok nai tepsettsü no? Parnoki chia jemer pei kibur dangi aotsü asoshi parnok jakdang amtsük aser tzü tokjang.”

²³Parnok asoshi pai benjong tulu renem, aser parnok chiyunga jemer pai parnok yokadok, aser parnok pei kibur dangi ao. Aser joko Siria nunger telok Israel limai mait.

²⁴Iba sülen Siria chuba Ben-hadadi pei telok ajak anitener tua Samaria lungbang.

²⁵Samaria nung ayawara tulu liasü. Yimtiji mapang talangka lungbang nung gado kolak ka nung taribi sen shekel tir yong aser guduru scü[2] marok touzük shilem pezüsü kümer ka nung taribi sen shekel pungu yong mayok tashi maneni parnoki aji lungbanga liasü.

²⁶Israel chuba jara anasa süia aodang, idakji tetsür kati pa dang ayimtena ashi, “Yariang, kü kibur, Oh chuba.”

²⁷Pai ashi, “KIBUBAi na meyarira kong nungi ni na yaritsü? Motsüngnem nungi mesüra tsükmenatzü menüngdak nungi ni yaritettsü asü?”

²⁸Aser chubai la dang asüngdang, “Kechi agi na kangshir?” Lai langzü, iba tetsür yagi kü dang ashi, “Tanü asenok achitsüsa ne jabaso agüjang, aser asüng ozü jabaso achitsü.

²⁹ Anungji onoki kü jabaso aso aser pa achi; aser ni la dang tasüngji ashi, ‘Pa asenoki achitsüsa ne jabaso agüjang, saka lai lar jabaso miimadok’.”

³⁰Kodang chubai tetsürla otemji angashi, pai pa süoshi shisa; tang pa jara anasa süia liasü aser nisungtemi reprang aser ajiang, telunglen pei shi tema nung anem sü liasü.

³¹Idangji pai ashi, “Shafat jabaso Elisha kolak tanü pa dak keta lira, Tsüngremi kü dak yamaji aser tamajungba inyakdakjangma.”

³²Saka Elisha par kidang mena ali aser pa den tamburtem mena liasü; aser chubai pa madang nungi nisung ka yok, saka osang bener pa dangi marudang, pai tamburtem dang ashi, “Nisung tepseter chir iba yagi koda kü kolak bener aotsü yoka lir aji nenoki nguali ma? Saksalemang, kodang osang bener arudir, kishi shibangang, pa jakdang kishi ayubangang, pa kibur jajaba ola pa sülen melika ma?”

³³Aser ano pai parnok den jembia alidang, ajiang, osang bener pa dangi alua ashi, “Ajiang, iba tamajung ya KIBUBA nungi lir; kechiba ni ano KIBUBA asoshi ata-a alitsü?”