Read njo 2 CHUBATEM 7 Bible Online

2 CHUBATEM 7 - njo bible

2 CHUBATEM 7

¹Elishai ashi, “Nenoki KIBUBA O angang; yamai KIBUBAi ashir, Asüng iba mapang nung am tanük touzük ana shekel ka yong Samaria süngkhüm nung ayoktsü.”

²Idangji tanishir shiba ket nung chubai metaloka ali, pai Tsüngrem nisung dang langzüa ashi, “Ajiang, KIBUBAi anüng nung kichibatem yanglutsüdi asüyonga aji takoktsü ama?” Aser pai ashi, “Ajiang, nai ne tenük agi aji angutsü, saka ibaji machitsü.”

³Tang süngkhümi aidakji zütsüra aketer nisung pezü liasü, aser parnok kati ka dang ashi, “Kechiba asenok masü tashi yangi mena alitsü?

⁴Yimti jagi asenoki odi ta asenoki shira, angji yimti nung ayawara lir, aser asenok yangji asütsü, aser asenok ano yangi lidi süra ano asenok asütsü. Tang, aji asünung arung, aser asenok Siria nunger telok tanendaki odi, parnoki asen taküm kümzükra asen taküm alitsü; aser parnoki asenok tepsetra, asenok tasü dang asütsü.”

⁵Siria nunger tanendaki aotsü parnok züngia arameso; aser kodang parnok Siria nunger tanendak anasa jagi aru, ajiang, yangji nisung shinga maliasü.

⁶Kechiyong KIBUBAi Siria nunger temeranger telok nem talungtsü aser kor ola, oda temeranger telok tulu ola ka angashidaktsü, aser parnok kati ka dang ashi, “Angang, Israel chubai asenok anema Het aser Ijip nunger chubatem asen madaki arutsü jaokogo.”

⁷Aji asünung parnok shishi aser züngia alidang ajen, aser parnok süki, parnok kor, gado, oda tanendak koma liasü yamaji toktsü, aser parnok taküm asoshi ajen.

⁸Kodang item zütsüra aketer tanendak anasa aru, parnok süki kati ia chia ajem aser idak nungjagi taribi, hon aser süoshi aben, aser oa aji miima ayu; aser parnok meyipa aru, aser süki tanga kati ia idak nungjagia aben, aser oa aji miima ayu.

⁹Idangji parnok kati ka dang ashi, “Asenoki shitak meinyaker. Tanü anogo ya osang tajung anogo ka lir, saka asenok ola madoki alir, asenoki anepdang sangwa tashi ata-a lira, temerenshi agi asenok meneptsü, aji asünung tang arung, asenok odi, aser chubar kidang metetdaktsüdi.”

¹⁰Anungji parnok arua yimti kishinükertem aja, aser parnoki ashi, “Onoki Siria nunger tanendaki ao, aser ajiang, yangji nisung shinga mesüra nisung ola kecha mali, saka kor aser gado dang sentaka liasü aser sükitem tazüng dang liasü.”

¹¹Idangji pai kishinükertem jaa; aser aji chuba ki telunglen metetdaktsü.

¹²Aonung chubai shishia pa tenzükertem dang ashi, “Tang ni nenok dang Siria nungeri asenok dang kechi inyak shidi. Asenok ayar ta parnoki metet; aji asünung parnoki bilem, kodang parnok yimti nungi adokdir, asenoki parnok taküm aputsü aser asenok yimti-i aitsü, ta bilema parnok tanendak nungi parnok sasa atsüktsü moapui ao.”

¹³Aser pa tenzüker rongnung kati ashi, “Yimti nung aliba nisungtem ya tasürtem den kecha balaka masü. Anungji asenoki anünga aliba kor pungu den nisung kar yokdi, yamaji süra parnok dak kechi atalok aji asenoki metettsü.”

¹⁴Aji asünung parnoki talungtsü ana kor den agi; aser chubai Siria nunger temeranger telok sülen yoka ashi, “Oang aser ajiang.”

¹⁵Parnok sülen parnoki Yordan tashi ao aser tang, lenmang tepiyong Siria nungeri parnok ilunga aodang endokba süoshi aser nok o nü agi sünga liasü. Osang abenertem meyipa aru aser chuba dang ashi.

¹⁶Idangji nisungtem adoka Siria nunger tanendak rakzükraktem. Anungji am tanük touzük ka shekel ka yong, aser barley touzük ana shekel ka yong KIBUBA O amato ayok.

¹⁷Aser tanishiba shiba ket nung chubai metaloka liasü, pa nem süngkhüm anüktsü pai shimtet; aser nisungtemi pa manung süngkhüm nung ajemshia jaja, aser Tsüngrem nisung shibai chuba pa dangi aludang jembi, pai ashiba ama pa asü.

¹⁸Aser Tsüngrem nisungi chuba dang jembiba ama, shekel ka yong am touzük ana, aser shekel ka yong barley touzük ka Samaria süngkhüm nung iba mapang nung alitsü;

¹⁹aser Tsüngrem nisung dang tanishiba jagi langzü, “Tang ajiang, KIBUBAi anüng nung kichibatem yanglutsüdi asüyonga aji takoktsü ama?” Pai ashi, “Ajiang, nai ne tenük agi aji angutsü, saka ibaji machitsü.”

²⁰Aji oda pa dak atalok; kechiyong nisungtemi pa manung ajemshia jaja, aser pa asü.