Read njo 2 CHUBATEM 8 Bible Online

2 CHUBATEM 8 - njo bible

2 CHUBATEM 8

¹ Tang tetsür shiba jabaso Elishai taküm kümdaktsü, la dang Elishai ashi, “Aramesoang, na aser ner kibong oang, aser kongsa na anentsü kokdir anenang, kechiyong KIBUBAi ayawara ka jaoka lir; aser aji ano küm tenet linük madak arutsü.”

²Aser tetsür jagi aramesoa Tsüngrem nisung o amato inyak, aser lar kibong oa Filistia linük nung küm tenet ali.

³Küm tenet tatem nung tetsürji Filistia nunger linük nungi meyipa aru, aser lai lar ki aser lar ali asoshi chuba dang mepishitsü ao.

⁴Tang chubai Tsüngrem nisung tenzüker Gehazi dang yamai jembia liasü, “Yimlibilema Elishai mapa tulu inyakba ajak kü dang shiangma.”

⁵Elishai koma tasür taküm kümdaktsü aji chuba dang shia alidang, oda ajiang, tetsür shiba jabaso pai taküm kümdaktsü, lai lar ki aser lar ali asoshi chuba dang mepishi. Aser Gehazi-i ashi, “Kü kibur, Oh chuba, tetsürji ibai, aser Elishai taküm shia arudaktsüba lar jabasoji ibai lir.”

⁶Kodang chubai tetsürla dang asüngdang, lai pa dang ashi. Anungji chubai la asoshi tenzüker ka shim aser ashi, “Lai ali toktsür aoba anogo nungi tanü tashi la meyong ajak aser ali nungi adokba ajak la nem meyipa agüjang.”

⁷Elisha Damaskai aru, aser Siria chuba Ben-hadad shiranga liasü, aser pa dang ashi, “Tsüngrem nisung ileni arua lir.”

⁸Aser chubai Hazael dang ashi, “Ne ket nung sempet kar benang aser Tsüngrem nisung lenji oang, aser pa ajanga KIBUBA dang asüngdangang, ‘Iba shirangba nungi ni ajungtsü asü?’ ta asüngdangang.”

⁹Anungji pa den ajuruteptsü Hazaeli sempet bener ao, oda Damaska nung oset ajak ut khu lir aser pa dangi arua noktaka ashi, “Ne chir Siria chuba Ben-hadadi, ‘Iba shirangba nungi anebtsü asü?’ ta shia ne dangi ni yok.”

¹⁰Elishai pa dang ashi, “Oang, pa dang shiang, Atangji na anebtsü; aji saka pa atangji asütsü ta KIBUBAi kü dang sayuogo.”

¹¹Aser pa akseta maküm tashi pai marakzüi pa dak rangeta reprang. Aser Tsüngrem nisungi ajeb.

¹²Aser Hazaeli ashi, “Kibur na kechiba ajeber?” Aser pai langzü, “Kechiaser nai Israel chirtem dang tamajung inyaktsü ta ni metet; parnok mitsa nung nai nok agi tepsettsü, aser parnok tilatem anük anüka ajasatsütsü, aser parnok mashisa aliba tetsürtem rangpoktsü.”

¹³ Aser Hazaeli ashi, “Saka ne tenzüker azü kaji kechi, oda iba mapa tulu pai inyaktsü no?” Elishai langzü, “Na Siria madak chuba ta KIBUBAi kü dang sayuogo.”

¹⁴Idangji pai Elisha nungi aenshia oa pa kibur dangi aru, kibur jagi pa dang ashi, “Elishai ne dang kechi ashi?” Pai langzü, “Pai atangji na anebtsü ta ashi.”

¹⁵Tasüngji pai yipten sü temaba bena arua aji tzü nung jenok, aser aji agi tejak ambang, idangji pa asü aser pa melen Hezaeli chuba.

¹⁶Israel chuba Ahaber jabaso Yoram küm pungububa nung, Yihuda chuba Yehoshafater jabaso Yehorami chubatsü tenzük.

¹⁷Pa chuba akümdang küm semer liasü, aser Yirusalem nung pai küm ti chuba.

¹⁸Aser Ahab kibongi inyakba amato, pai Israel chubatem lenmang nung jaja, kechiaser Ahaber jala pa kibutsü aküm, aser KIBUBA tsüngdang kechi majung aji pai inyak.

¹⁹ Aji saka pai Dawid dang par chirtem asoshi teti milen ka pa nem agütsütsü ta nangzük nungji, chuba asoshi KIBUBAi Yihuda mesamatsü.

²⁰ Pa tendak Edomi Yihuda yimsüsüba anema apuso aser parnok madak chuba ka shim.

²¹Idangji Yorami pa talungtsü ajak pa den anir Zairi ao; aser aonung shishi, aser parnok meketbanga aliba Edom nunger pa aser par talungtsü tanishirtemi akok; aser nisungtem parnok süki bushia ajen.

²²Anungji tanü tashi Edomi Yihuda yimsüsüba anema adoker. Iba amaji iba mapang nungjisa Libnia anema apuso.

²³Tanüngba Yehoram mapa, aser pai inyakba ajak, Yihuda chubatem putipuyang kaket nung zülua melika ma?

²⁴Yehoram pei tebu nunger den mejang aser Dawid yimti nung tebu nunger den arem, aser pa melen par jabaso Ahaziai chuba.

²⁵Israel chuba Ahaber jabaso Yehoram küm teranabuba nung Yihuda chuba Yehoramer jabaso Ahaziai chubatsü tenzük.

²⁶Ahaziai chubatsü tenzükdang pa küm metsür ana liasü; aser pai Yirusalem nung küm ka chuba. Pa tetsü tenüng, Israel chuba Omri jala Athalia liasü.

²⁷Ahab kibongi inyakba amato, pai Ahab kibong lenmang nung jaja, aser koba KIBUBA madang majung aji inyak, kechiyong pa Ahaber kibong tanük liasü.

²⁸Ramoth-Gilead nung Siria chuba Hazael anema Ahaber jabaso Yoram den pai raratsü ao, aser Siria nungeri Yoram yirutsü.

²⁹Siria chuba Hazael den raradang Rama nung Siria nungeri pa yirutsüba Yezreel nung anebtsü asoshi Yoram chubai meyipa ao. Aser Yihuda chuba Yoramer jabaso Ahaziai, Yezreel nung Ahab jabaso Yehoram den ajuruteptsü alu, kechiaser pa shiranga liasü.