Read njo 2 CHUBATEM 9 Bible Online

2 CHUBATEM 9 - njo bible

2 CHUBATEM 9

¹Elishai ainkar chirtem ka jar ashi, “Ne nangri kangang aser iba totzü bongdang ne ket nung am-ang, aser Ramoth-Gileadi oang.

²Kodang na ajagi arudir, Nimshi chir Yehoshafater jabaso Yehu yangji ajiang, aser ia pa adianutem nungi anizükang, aser taktang telungbai pa anir iang.

³Ajiser totzü bongdangji bena arua aji pa kolak nung shilokja shiang, “Yamai KIBUBAi ashir, ‘Ni na Israel madak chuba shima mezütsüogo.’ Idangji kishi lapokang, aser jenang, aser atpisüa teli.”

⁴Anungji asangur ainkarji Ramoth-Gileadi ao.

⁵Kodang pa aru, ajiang pai temeranger telok walunirtem sentepa angu aser ashi, “Oh walunir, ni nenok dangi osang ka kar.” Aser Yehui ashi, “Onok koba dangi?” Aser pai ashi, “Ne dangi, Oh walunir.”

⁶ Anungji pa arameso aser kidangi ai; aser pai pa kolak nung totzüji shilokja ashi, “Yamai Israel Tsüngrem KIBUBAi ashir, Ni na KIBUBA nübur madak, oda Israel madak chuba asütsü mezütsüogo.

⁷Yezebel ket nung kü tenzüker ainkartem zü aser KIBUBA tenzüker ajak zü mang ayangtsüsa, nai Ahab ne kibur kibong ajonga samatsütsüla.

⁸Aser ni Ahab nungi tebur chanu shia, aser Israel nung alena aliba aser nüji tia nung tokja aliba leptokadoktsü.

⁹Aser Ahab kibong Nebat chir Yeroboam kibong ama, aser Ahija chir Baasha kibong ama kümdaktsütsü.

¹⁰ Yezreel lima nung azütemi Yezebel achitsü, aser la aremtsü shinga malitsü.” Aser pai kishi lapoka ajen.

¹¹Idangji Yehu par kibur tenzükertem dangi aru, kati pa dang asüngdang, “Ajak junga lir ma? Kechiba iba yiar nisung ne dangi aru?” Aser pai parnok dang ashi, “Nenoki nisungji aser pai jembiba kechi liasü metet.”

¹²Parnoki ashi, “Aji tiyazü, tang onok dang shiang.” Pai ashi, Yamai aser yamai pai kü dang jembia ashi, ‘Yamai KIBUBAi ashir, Ni na Israel madak chuba asütsü mezütsüogo.”

¹³Idangji parnok nisung shiai apu jenjang manung Yehu tetsüng kübok pei sobutsü yutsütsü ilunga ao, aser Yehu chuba lir ta jangzü apu.

¹⁴Anungji Mimshi chir Yehoshafater chir Yehui Yoram anema tasa asa. Tang Yoram aser Israel ajaki, Siria chuba Hazael anema Ramoth-Gilead nüka liasü;

¹⁵saka Yoram chubabo pai Siria chuba Hazael den raradang, Siria nungeri pa yirutsüba zübu anebtsü asoshi Yezreel nung meyipa oa liasü. Yehui ashi, “Ne mulung aji sürabang, nisung shinga ibaji Yezreel nung ashitsü yimtak nungi jenzüka tuodaktsü.

¹⁶Anungji Yehu talungtsü ka nung mener Yezreeli ao; kechiyong yangji Yoram ontaka liasü. Aser Yihuda chuba Ahaziai Yoram den ajuruteptsü alua liasü.”

¹⁷Tang Yezreel nung mitkarji mitsabang nung noktaka liasü, aser Yehu arudang par telok pai ngua ashi, “Ni telok ka angur.” Aser Yorami ashi, “Kor nung amener nisung ka anir arung, aser parnok lenji yokang, aser yimjung nung asü? ta pai shidakjang.”

¹⁸Anungji pa lenji kor nung nisung ka yoka ashi, Yamai chubai ashir, “Yimjung nung asü?” Yehui ashi, “Na yimjung kechi sütsüba? Na kü sülen meyipang.” Aser mitkari osang agütsü, “Osang abenerto parnok tonga ogo, saka pa tanaben marur.”

¹⁹Idangji pai tanabuba ka kor nung yok, shiba parnok dangi arua ashi, “Yamai chubai ashir, Yimjung nung asü?” Yehui langzü, “Na yimjung kechi sütsüba? Na kü sülen meyipang.”

²⁰Mitkari osang agütsü, “Pa parnok tonga ogo, saka tanaben marur, aser tanishibaji Nimshi chir Yehui anishiba mesüker, kechiyong pai mit agi anishir.”

²¹Yorami ashi, “Renemang.” Aser parnoki pa talungtsü renem. Aser Israel chuba Yoram aser Yihuda chuba Ahazia pei pei talungtsü nung Yehu ajurutsü ao, aser Yezreel nunger Nabot li nung pa angu.

²²Yorami Yehu angudang ashi, “Yehu, yimjung nung asü?” Pai langzü, “Netsü Yezebel jabujariba aser arasentsür mapa paikati lir kechi yimjung litettsü?”

²³Yorami meyiper ajen, aser Ahazia dang ashi, “Ashioktsüba mapa, Oh Ahazia.”

²⁴Yehui pa tashi ajak agi pa lijak azüa aru, aser Yoram dak pa tepen tsüngda nung kaloktsü, aser lijakjangji pa mulungjang ateta ai, aser pa talungtsü nung lao.

²⁵Idangji Yehui pa tenzüker Bidkar dang ashi, “Bena arung, aser pa Yezreel nunger Naboter li moapu nung tokjang; kechiaser ni aser na külemi tebu Ahab sülen sanger aodang koda KIBUBAi pa anema iba o jembizük, bilemtetang.

²⁶ KIBUBAi ashir, ‘Atangji ni yashi Nabot zü aser par chirtem zü nguogo; aser iba moapu nungsa ni ne nem tanaben lepa agütsütsü.Tang aji asünung KIBUBA o amato, pa bena arung aser pa ali nungji tokjang.’

²⁷Kodang Yihuda chuba Ahaziai aji angu, pai atsüki Beth-hagan atsüki leni jena ao. Aser pa sülen Yehu anitak aser ashi, “Pa talungtsü nung neploka kalokjang.” Anungji Ibleam anasa aliba Guri lenjem nung parnoki pa yirutsü. Saka pai Megiddoi ajen, aser yangji asü.

²⁸Pa tenzükertemi pa talungtsü ka nung Yirusalemi bener ao, aser Dawid yimti nung pa tebu nunger leper nung arem.

²⁹Ahab chir Yoram küm terkabuba nung Ahaziai Yihuda madak chubatsü tenzük.

³⁰Kodang Yehu Yezreeli aru, Yezebeli aji angashi, lai la nüksemo nung mozü mezü, aser la tekolak tobur junga yanglushi, aser kichiba nungi anguteta reprang.

³¹Yehui süngkhümi aidang lai ashi, “Na Zimri, ne kibur tepsetsang yimjung nung asü?”

³²Aser temalen kichibaleni pa tejak yoka ashi, “Kü tsütsü shiba lir?” Aser teyangluba nisung ana asem kati pa repranga yok.

³³Pai ashi, “La nungzüka yokang.” Anungji parnoki la nungzüka yok; aser la zü kar jara nung, aser kor dak rüklok; aser pai la dak tetsüng agi ajemshi.

³⁴Idangji pai ai aser chia ajem aser ashi, “Iba atakatem kaoba tetsür, tang reprangang, aser la remang, kechiaser la chuba jala lir.”

³⁵La aremtsü parnok ao, saka tekolak ret, tetsüng aser la tekabu dak alaka parnoki kecha mangu.

³⁶ Anungji parnoki arua pa dang ashi. Aser pai langzü, “Ibai KIBUBA O lir, koba pai pa tenzüker Tishbi nunger Elija dang, Yezreel linük nung Yezebel shi azüi achitsü ta ashi.

³⁷Yezebel tasü mangji Yezreel linük nung moapu manung rüja ama alitsü; aji asünung, ibai Yezebel ta parnoki meshitettsü.”