Read njo 1 PUTIPUYANG 10 Bible Online

1 PUTIPUYANG 10 - njo bible

1 PUTIPUYANG 10

¹Tang Filistia nungeri Israel anema rara, aser Israel nunger Filistia nunger madang ajen, aser Gilboa tenem nung aika tepset.

²Filistia nungeri Saul aser par chirtem menep, aser Filistia nungeri Saul chirtem, Yonathan, Abinadab, aser Malkishua tepset.

³Saul madak tongbang jagi sashia anung, aser lijak amertemi pa angu, aser lijak amertemi pa yirutsü.

⁴Idangji Sauli pa nok o nü abenba dang ashi, “Item memejeptokertem arua kü dak sensamasaja inyaka lir, ne nok atsütetang, aser aji kü dak ateta setokjang.” Saka pa nok o nü abensangi manga, kechiyong pai kanga tsübu. Anungji Sauli pei nok am, aser pei sasa tsüngset.

⁵Pa nok o nü abensangi Saul süogo ta angudang pa-a pei nok manung laoa asü.

⁶Yamaji Saul asü, aser par chir asem, par kibong ajak külemi asü.

⁷Kodang Israel nisung lenten nung alir ajaki temeranger telok ajenba aser Saul aser par chirtem sür angu, parnoki pei yimti toktsü aser ajen; aser Filistia nunger arua iba nungji ali.

⁸Tasüngji kodang Filistia nunger mangjok meyipi aru, parnoki Saul aser par chirtem Gilboa tenem nung laoa angu.

⁹Aser parnoki pa süoshi luzük aser pa tekolak atang, aser pa nok o nü agi, aser parnok süngyanglutem aser nübur dangi osang tajungji abentsü, Filistia nunger limai osang benertem ayimsünga yok.

¹⁰Aser parnoki pa nok o nü parnok tsüngremtem tenla ki nung ayu, aser pa tekolak Dagon tenla ki nung sentaka ayu.

¹¹Saka kodang Yabesh-gilead ajaki Filistia nungeri Saul dak inyakba ajak angashi,

¹²tasü taiter ajak arameso, aser Saul mang aser par chirtem mang bener oa Yabeshi bener aru. Aser parnoki parnok teret Yabes nung sülemdong kübok arem, aser anogo tenet lumi.

¹³ Yamaji Saul pei temulung malemba asoshi asü, pai KIBUBA dang temulung malem, aser KIBUBA temelaba mebenshi, aser ano teyari bushia arasentsür temezünger den asüngdangtep,

¹⁴aser KIBUBA nungi teyari mebushi. Anungji KIBUBAi pa tepset, aser chuba yimliji Yesse chir Dawid nem meyipa agütsü.