Read njo 1 PUTIPUYANG 12 Bible Online

1 PUTIPUYANG 12 - njo bible

1 PUTIPUYANG 12

¹Tang Kis chir Saul alibayong Dawid sadema mesenzüteti alidang, Ziklag nung Dawid dangi item nisung aru; aser parnoki rara nung pa yarir tashi tulu nisung rongnungi liasü.

²Parnok lijak amshir nisung, aser lijakjang aser lung lijak tajichi mesüra tabelen teka agi yokteta liasü; parnok Benjamin nunger Saul sosem liasü.

³Tongtibaji Ahiezer, iba sülen Yoas, anaprong Gibea nung Shema chirtem; ano Azmavet chirtem Yeziel aser Pelet: Beraka, Anathot nunger Yehu,

⁴Gibeon nunger Ishmaia, semer rongnung tashi tulu nisung ka, aser semer madakji tanishir; Yerimia, Yahaziel, Yohanan, Gederat nunger Yosabad,

⁵Eluzai, Yerimot, Bealia, Shemaria, Haruf nunger Shefatia;

⁶Elkana, Yesia, Azarel, Yoezer, aser Yashobeam, Kor nunger;

⁷aser Gedor nungi Yeroboam chirtem Yoela aser Zebadia.

⁸Gad nunger tashi tulu aser nokinketer, jong aser nü nung mongin, shirnok tejak molusongzü ama liasü, aser shirnok tenem nung shio ama tekara, parnok Dawid dangi arem nung mitsa leni ao.

⁹Tongtibaji Ezer, tanabubaji Obadia, tasembubaji Eliab,

¹⁰Pezübubaji Mishmanna, pungububaji Yerimia,

¹¹trokbubaji Attai, tenetbubaji Eliel,

¹²tibubaji Yohanan, tukububaji Elzabad,

¹³terbubaji Yerimia, terkabubaji Makbannai,

¹⁴itemji Gad chirtem temeranger telok arkotongtem liasü, tekübok purji noklang madak aser temaba purji meyi madak.

¹⁵Parnoki mezüngbuba ita nung Yordan iba tzüküm moshia yima alidang ajang, aser lenten nung alir ajak anüdoklen aser anüoleni jenshidaktsü.

¹⁶Benjamin aser Yihuda nisungtem kar Dawid mitsa jagi aru.

¹⁷Dawidi parnok nguyui adok aser parnok dang ashi, “Nenok kü den tembar küma ni yaritsü aru süra, kü mulungjang nenok den ka akümtsü; saka kü ket nung tamajung meliaka, kü anemertem dang ni ashioktsütsü aru süra, idangjibo asen tsürabur Tsüngremi reprangtsü aser nenok arüjang.”

¹⁸Idangji semer madak tongtiba Amasai dangi Tanela aru, aser pai ashi. Onok ne meyong, Oh Dawid, Aser ne den lir, Oh Yesse chir! Ne dangi yimjung, yimjung, Aser pa yarirtem dangi yimjung! Kechiyong ne Tsüngremi na yarir. Idangji Dawidi parnok agizük aser pa temeranger lokti madak parnok tanishir kümdaktsü.

¹⁹Manase nisung kar a Dawid Filistia nunger den Saul anema tongbangi arudang toktsür Dawid dangi aru. Aji saka pai parnok meyari. Kechiyong Filistia nunger kiburtemi bangjemteper pa yokadok, aser ashi, “Asen tanishir lendongi aitsüsa pai pei kibur Saul dangi oadoktsü.”

²⁰Pa Ziklagi aodang Manase nisung itemi pa dangi jena aru: Adna, Yazabad, Yediael, Maikal, Yozabad, Elihu, aser Zillethai, Manase nunger meyi madak arkotongtem.

²¹Yimaker telok anema parnoki Dawid yari. Kechiyong parnok ajak tashi tulu nisung tasü tait liasü, aser temeranger telok nung arkotongtem liasü.

²²Kechiyong anogodok shia Dawid dangi nisungtem, temeranger telok tulu ka, Tsüngrem temeranger telok ama maküm tashi arujen aru.

²³KIBUBA O ama, Dawid nem Saul yimli agütsütsü asoshi Hebron nung Dawid dangi arurtem, raratsü asoshi renema alir tongtipurtemji ya lir.

²⁴Yihuda chirtem jong aser nü abener meyi trok ser noklang ti, raratsü terenem liasü.

²⁵Simeon chirtem nungi tashi tulu nisung tashi taiter, raratsü asoshi meyi tenet aser noklang ka.

²⁶Levi chirtem meyi pezü ser noklang trok,

²⁷aser Aron kidong nungi Yehoiadaji tanishir liasü, aser pa den meyi asem ser noklang tenet liasü,

²⁸Zadok, asangur ka tasü tait tashi tulu aser par kinunger nungi arkotong metsür ana.

²⁹Benjamin nunger Saul sosem, meyi asem, shirnok rongnung timbai tang tashi Saul kidong nung dena aru.

³⁰Efraim nunger meyi metsü noklang ti, tashi tulu tasü tait nisungtem, par kinunger rongnung nüngtugu nisungtem.

³¹Manase tesadang kin nungi meyi ter shirnok arua Dawid chuba kümdaktsütsü tenüng teta liasü.

³²Issakar nisungtem, shirnoki mapang indang tangatet aser Israeli kechi inyaktsü tim aji metet, par tongtipur noklang ana, aser par sosem ajak parnok ozüng kübok.

³³Zebulun nungi takutet sarir telok meyi tenem. Dawid yaritsü asoshi nükjidong ka agi, tongbang asoshi rara nok o nü, tabensa terenem.

³⁴Naftali nungi arkotong meyi ka, parnok den nisung meyi semer tenet, jong aser nü bener.

³⁵Dan nunger nungi nisung meyi metsürti ser noklang trok, tongbang asoshi terenem.

³⁶Asher nungi tongbang asoshi terenem takutet sarir telok meyi lir.

³⁷Reuben, Gad, aser Yordan atena oa aliba Manase kidong tesadang nungi rara nok o nü tabensa bener nisung meyi noklang ka ser metsü.

³⁸Item ajak sarirtem, tongbang sobutsü tak ta sobur, Israel ajak madak Dawid chuba kümdaktsütsü mulungteter Hebroni aru; yamajisa tanüngba Israel ajak Dawid chuba kümdaktsütsü temulung ka liasü.

³⁹Yangji parnok Dawid den anogo asem, chiyunga jema liasü, kechiyong par adianutemi parnok asoshi renemja liasü.

⁴⁰Ano parnok kiyongertem, oda Issakar, Zebulun, aser Naftali tashi nungia, gado nung, ut nung, kor aser nashi nung, chiyungtsü talubosa mungozünu amtsük, tsükmenatzü tejep, yi aser totzü, nashi aser san bener aru kechiyong Israel nung tepela liasü.