Read njo 1 PUTIPUYANG 13 Bible Online

1 PUTIPUYANG 13 - njo bible

1 PUTIPUYANG 13

¹Dawidi meyi madak aser noklang madak walunir den, oda tanishir shia den o tongtep.

²Israel tanishir ajak dang Dawidi ashi, “Ya nenok dang jungra, aser ya KIBUBA asen Tsüngremi mulungba süra, Israel lima ajak nung alir asen adianutem, aser parnok denji putir aser Levi nunger chiyimdak ali akartem dangi, parnok külemi asenok dangi arutsüsa ajakleni osang yokdi.

³Aser asenoki asen Tsüngrem temeshi süngden asen dangi bener arudi; kechiyong Saul tendak asenoki aji senzüka yutsü.”

⁴Tatenshir ajaki yamaji inyaktsü mulung, kechiyong nisung ajak nükdang mapaji shitak liasü.

⁵ Anungji Kiriathjearim nungi Tsüngrem süngden bener arutsü asoshi Dawidi Israel ajak Ijip nung Shihor nungi Hamat lenmang tashi atenshidaktsü.

⁶ Dawid aser Israel ajak Baala, ibaji Yihuda meyong Kiriathjearimi Tsüngrem süngden bener atutsü, koba cherubim temalen mena aliba KIBUBA tenüng agi ja-a lir, aji agi atu.

⁷Parnoki Tsüngrem süngdenji talungtsü tasen ka nung Abinadab kidang nungi aben, aser Uzza aser Ahio nati aji ani.

⁸Dawid aser Israel ajaki ken agi, tzürang kongki, aser tawaba kongki, asem, laya aser jangzü agi lungsotepa liasü.

⁹Kodang parnok Kidon nung motsüngnem atem tonga aru, Uzzai süngdenji sottsü pa teka adok, kechiyong nashitemji metsüdak.

¹⁰KIBUBA ain adokba Uzza anema jangru aser pai pa dak azük kechiaser pai süngden dak pei teka songtok; aser pa yangji Tsüngrem madang asü.

¹¹Dawid ain adok, kechiaser KIBUBAi Uzza madaki adok; aser tanü tashi iba talidak dangji Perez Uzza ta ajar.

¹²Aser panüji Dawidi Tsüngrem tsübua liasü, aser pai ashi, “Ni Tsüngrem süngdenji koma kü dangi yimtaki bener arutettsü?”

¹³Anungji Dawidi temeshi süngdenji kidangi bener Dawid yimti-i mai, saka pila-a Git nunger Obed-edom kidangi bener ao.

¹⁴ Tsüngrem süngdenji Obed-edom kibong den par kidang ita asem liasü; aser KIBUBAi Obed-edom kibong aser pa akaba ajak moatsü.