Read njo 1 PUTIPUYANG 15 Bible Online

1 PUTIPUYANG 15 - njo bible

1 PUTIPUYANG 15

¹Dawidi pei asoshi Dawid yimti[5] nung ki yanglu, aser Tsüngrem Ozüng Süngden ayudak ka yanglua aji süki agi sübang.

² Idangji Dawidi ashi, “Levi nunger dak alema shingaia Tsüngrem temeshi süngden mabentsü, kechiyong KIBUBAi parnokji Tsüngrem süngden abentsü aser teti asoshi pa dang tenzüktsü shimtet.”

³KIBUBA süngden, pai teti asoshi renema akadaki bener atutsü asoshi Dawidi Israel ajak Yirusalem nung atenshidaktsü.

⁴Dawidi Aron chirtem aser Levi nunger külemi atenshidaktsü;

⁵Kohat chirtem, tongtipur Uriel, aser pa adianu noklang ka ser metsü;

⁶Merari chirtem, tongtipur Asaia, aser par adianu noklang ana ser metsü,

⁷Gershom chirtem, tongtipur Yoel, aser par adianu noklang ka ser semer;

⁸Elizafan chirtem, tongtipur Shemaia, aser par adianu noklang ana;

⁹Hebron chirtem, tongtipur Eliel, aser par adianu tir;

¹⁰Uzziel chirtem, tongtipur Amminadab, aser par adianu noklang ka ser terana.

¹¹Idangji Dawidi Zadok aser Abiathar putirtem, aser Levi nunger Uriel, Asaia, Yoel, Shemaia, Eliel, aser Amminadab aja,

¹²Parnok dang ashi, “Levi kinunger tanishirtemji nenok lir; oda KIBUBA, Israel Tsüngrem süngdenji, ni iba asoshi renemja alidaki nenoki bener atutettsüsa, nenok sasa, nenok aser nenok adianutem meshiteta liang.

¹³Nenoki mezüngben aji mabenbayong, KIBUBA asen Tsüngremi asen madaki anir adok, kechiaser asenoki yimsü ozüng amato anebalu masü.”

¹⁴Anungji putirtem aser Levitemi KIBUBA, Israel Tsüngrem temeshi süngden bener atutsü parnok sasa meshitet.

¹⁵ Aser KIBUBA O amato Mosai melaba ama Levitemi Tsüngrem süngdenji parnok tapubang nung süngra agi aben.

¹⁶Ano Dawidi Levi nunger tongtipur dang, tepela ola adoktsü, tzürang kongki, tawaba kongki, laya ola tulu adoka ken atentsü pur parnok adianutem shimtettsü mela.

¹⁷Anungji Levitemi Yoel chir Heman aser pa adianu Berekia chir Asaf shimtet; aser pa adianu Merari chirtem, Kushiai chir Ethan;

¹⁸aser parnok den par adianu tanabubaren, Zekaria, Yaaziel, Shemiramot, Yahiel, Unni, Eliab, Benaia, Maaseia, Mattithia, Elifeli, Miknaia, aser kishinüker Obed-edom aser Yeiel.

¹⁹Ken tener Heman, Asaf, aser Ethan parnoki laya atemtsü;

²⁰Zekaria, Aziel, Shemiramot, Yahiel, Unni, Eliab, Maaseia, aser Benaia, parnoki Almot amaji tzürang kongki atemtsü;

²¹saka Mattithia, Elifele, Mikneia, Obed-edom, Yeiel, aser Azazia, parnoki Sheminit amaji tawaba kongki agi anitsü.

²²Levi nunger rongnung ken tanishir Kenaniai ken anishitsü, kechiyong pai aji angatet.

²³Berekia aser Elkana süngden asoshi kiküm anükertem liasü.

²⁴Shebania, Yoshafat, Nethanel, Amasai, Zekaria, Benaia, aser Eliezer, putirtemi Tsüngrem süngden jakdang jangzü aputsü. Obed-edom aser Yehia süngden asoshi kiküm anükertem asütsü.

²⁵Anungji Dawid aser Israel tamburtem, aser meyi madak walunirtem Obed-edom kidang nungi KIBUBA tezüngzüktepba süngden bener atutsü pelatepa ao.

²⁶KIBUBA tezüngzüktepba süngden bener aor Levi nunger Tsüngremi yari nungji, parnoki nashi pungchi tenet aser san tepung tenet tenla agütsü.

²⁷Dawid sobutsü kümpa sü tanük agi sobua liasü, aser yamaji süngden abener Levi nunger ajak kentenertem, aser ken tener tanishir Kenania sobutsü abena liasü; Dawida kümpa sü putir temeshi sobutsü abener liasü.

²⁸Yamaji Israel ajaki KIBUBA tezüngzüktepba süngdenji, tezü, jangzü, aser laya ola madak ayimtena, tzürang kongki aser tawaba kongki ken ola tulu adoka bener adok.

²⁹KIBUBA tezüngzüktepba süngdenji Dawid yimti jagi arudang, Saul jala Mikali kichiba nungi repranga yok, aser Dawid chuba tsüngsanga lungsotepa angu; aser lai la mulungjang nung pa sensatsü.