Read njo 1 PUTIPUYANG 16 Bible Online

1 PUTIPUYANG 16 - njo bible

1 PUTIPUYANG 16

¹Parnoki KIBUBA temeshi süngden bener ait, aser Dawidi iba asoshi yanglua alidak süki telunglen ayu; aser Tsüngrem madang parnoki tarongba tenla aser yimjung tenla agütsü.

²Kodang Dawidi tarongba tenla aser yimjung tenlaji renem, pai KIBUBA tenüng nung nüburtem moatsü.

³Israel ajak nem, tebur aser tetsür shia nem amtsük ka ka, aser shimelang tatsükba ka ka, aser tsükmenatzü amtsük ka ka lema agütsü.

⁴Ano pai Levi nunger kar KIBUBA süngden madang tenzüktsü, tepela sayutsü, aser KIBUBA Israel Tsüngrem asangtsü shimtet.

⁵Tongtibaji Asaf, aser pa den atongbaji Zekaria, Yeiel, Shemiramot, Yehiel, Mattithia, Eliab, Benaia, Obed-edom, aser Yeiel, item tzürang kongki aser tawaba kongki atemertem, Asafi laya atemtsü,

⁶aser putir Benaia aser Yahazieli maneni Tsüngremer tezüngzüktepba temeshi süngden madang jangzü aputsü.

⁷Panüji Dawidi tamasa Asaf aser pa adianutem dang KIBUBA nem tenüngsang agütsüba ken atentsü mela.

⁸KIBUBA nem tenüngsang agüjang, pa tenüng nung ja-ang. Nübur rongnung pa mapatem metetdakjang!

⁹Pa dang ken tenlokjang, pa dang tenüngsang ken tenang. Pa tesüngmangtsü mapa ajak shiang!

¹⁰Pa temeshi tenüng nung sentsüwangshiang; shirnoki KIBUBA bushir, parnok mulungjang peladakjang.

¹¹KIBUBA aser pa tashi bushiang, maneni pa tatenba bushiang.

¹²Pa tesüngmangtsü mapa pai inyakba, sayatenya pai inyakba, pai obendang kazüka yokba bilemtetang.

¹³Oh Pa tenzüker, Israel chirtem, Yakob chirtem, pa temeshitet purtem!

¹⁴Pa asen Tsüngrem KIBUBAji lir; pa obendang alima ajak nung lir.

¹⁵Teti asoshi pa tezüngzüktepba, putu meyirijang asoshi pai melaba o pai mamai lir;

¹⁶ Pai Abraham den züngzüktepba, azüngashia pai Isak dang nangzükba.

¹⁷ Koba pai Yakob dang telatet ozüng ama, aser Israel dang tatem maka tezüngzüktepba ama akangshi,

¹⁸Aser ashi, “Nenok nem Kanan lima, nenok shilem senmangtsü ka ama ni agütsütsü.”

¹⁹Kodang parnok yongsük nung ishika liasü, hau, kanga ishikadang, iba nung aenersa ali,

²⁰Kin ka nungi kin kati, yimli ka nungi tanga nübur dangi nemzüa liasü,

²¹ Pai shinga nem parnok mekangshidaktsü, parnok meji pai chubatem arütsüdakja,

²²Ashi, Ni mezüja shimtetba dak tekongshi, kü ainkartem dak tamajung teinyak.

²³KIBUBA dang ken tenang, alima ajak! Anogodok shia pa tekümtet indang shiang.

²⁴Kin rongnung pa sentsüwangshi metetdakjang, pa tesüngmangtsü mapatem nübur ajak rongnung!

²⁵Kechiyong tulusangji KIBUBA lir, aser kanga asangtsüla, aser tsüngrem ajak madak pabo tsübutsüla.

²⁶Kechiyong nüburtem tsüngrem ajakji süngyanglutem lir, saka KIBUBAi anüngtem yanglu.

²⁷Tetushi aser akhüm tulu pa madang lir; pa alidak tashi aser tepela lir.

²⁸Oh nütsüng nüburtem, KIBUBA nem agüjang, sentsüwangshi aser tashi KIBUBA nem agüjang!

²⁹KIBUBA nem pa tenüng nung tim sentsüwangshi agüjang; tenla ka bener arung, aser pa madangi arung, temeshi sobutsü sobur KIBUBA külemang.

³⁰Pa jakdang atentenang alima ajak, hau, alima akanga noktaka lir, aji marakzütsü!,

³¹Anüngtemi peladakjang, aser alima peladakjang, kin rongnung parnok nem shidakjang, “KIBUBAi chubar!”

³²Tzüyim aser idakji aliba ajaki arüdakjang, moapu, aser iba nung aliba ajak pelatepdakjang!

³³Idangji min süngdongtemi tepela agi KIBUBA jakdang ken atentsü, kechiyong alima o bendangtsü pa arur.

³⁴ KIBUBA nem tenüngsang agüjang, kechiyong pa tajung lir, kechiyong pa yimlibilem teti alir.

³⁵Nenoki ano shiang; Onok kümzükang, Oh ozü tekümtet Tsüngrem, aser kin rongnungi onok anitenang aser kümzükang, angji onoki ne temeshi tenüng nem tenüngsang agütsütsü, aser ne tenüngsang nung sentsüwangshitsü.

³⁶Israel Tsüngrem KIBUBA temoatsüba sang, tatem maka nungi tatem maka tashi! Idangji nisung ajaki ashi, “Amen” aser KIBUBA asang.

³⁷Anungji Dawidi Asaf aser pa adianutem yangji KIBUBA tezüngzüktepba temeshi süngden jakdang anogo shia tenüngdaktsü amato maneni süngden jakdang tenzüktsü toktsü;

³⁸aser ano Obed-edom aser pa adianu roker ti; ano Yeduthun chir Obed-edom aser Hosa kishi anükertem liasü.

³⁹Putir Zadok aser pa adianu putirtem KIBUBA tekülemdak süki jakdang Gibeon nung aliba tenem tekülemdak toktsü.

⁴⁰KIBUBA ozüng nung zülua aliba koba pai Israel dang mela ajak amaji tarongba tenladak manung maneni anepdang nungi aonung tashi KIBUBA nem tarongba tenla agütsütsü pai toktsü.

⁴¹Parnok den Heman aser Yeduthun, aser tanüngba shimteta alibatemji aser jangja-a tenüng agüja alirtemji KIBUBA nem tenüngsang agütsütsü liasü, kechiyong pa yimlibilem teti alir.

⁴²Heman aser Yeduthun ket nung temeshi ken asoshi ken aser kententsü oset jangzü aser laya liasü. Yeduthun chirtem kishi nung alitsü shimtet.

⁴³ Idangji nisung ajak pei kidangi senshia ao, aser Dawidi pei kibong moatsütsü kidangi shilang.