Read njo 1 PUTIPUYANG 17 Bible Online

1 PUTIPUYANG 17 - njo bible

1 PUTIPUYANG 17

¹Tang kodang Dawid pei kidang liasü, Dawidi ainkar Nathan dang ashi, “Ajiang, ni cedar süng ki nung alir, saka KIBUBA tezüngzüktepba süngdenbo süki nung lir.”

²Nathani Dawid dang ashi, “Ne mulungjang nung kechi ali ajak inyakang, kechiyong Tsüngrem ne den lir.”

³Saka paonungjisa KIBUBA O Nathan dangi aru,

⁴Oang aser kü tenzüker Dawid dang shiang, Yamai KIBUBAi ashir, “Nai kü nem talitsü ki meyanglutsütsüla,

⁵kechiyong ni Israel anitetba anogo nungi tanü tashi ni ki nung malir, saka ni süki ka nungi süki kati aser talidak ka nungi talidak ka tashi ni senzüogo.

⁶Ni kongsa Israel ajak den jaja ajakleni ni Israel o bendangertem, shirnok dang kü nübur san anüktsü ni mela, parnok dang, kechiba nenoki kü nem cedar süng agi ki ka meyanglutsür ta ni jembi ama?

⁷“Tang anungji yamai nai kü tenzüker Dawid dang shiang, Temeranger KIBUBAi yamai ashir, Ni na chiyimdak nungi san sülen anidakba nungi kü nübur Israel madak tanishir asütsü ania aruogo.

⁸Aser kolenisa na ao, ni ne den dena liasü, aser ne jakdang tsükchir ajak leptoktsüogo; aser ni na asoshi alima nung tulurtem tenüng mesüka tenüng ka adokdaktsütsü.

⁹Aser kü nübur Israel asoshi ni alinük ka shimtsü, aser parnok pei talidak litettsü aser joko maenshitsüsa ni parnok atemtsü.

¹⁰Aser kü nübur madak ni obendanger shimtetba mapang nungi mezüng amato joko tamajungba chirtemi parnok makoksadaktsütsü; aser ni ne tsükchir ajak tekübok ayutsü. Iba dak alaka KIBUBAi ne nem ki ka yanglutsütsü ta ni ne dang metetdaktsür.

¹¹Nebu nunger den alitsü kodang ne anogo adokdir, ne sülen ni ne chir adokdaktsütsü, ne chir rongnung ka, aser ni pa yimli amentetdaktsütsü.

¹²Pai kü nem ki ka yanglutsütsü, aser ni pa chuba menden teti asoshi amentetdaktsütsü.

¹³ Ni pa tebu asütsü aser pa kü chir alitsü; aser ne dang tama shiba liasü pa dang nungi ni bener aoba amato ni pa nungi yimlibilem kecha bener maotsü,

¹⁴saka ni kü kidang aser kü yimli nung teti asoshi pa akangshidaktsütsü aser pa chuba menden teti asoshi yanglutsütsü.”

¹⁵Item o ajak, aser iba mangdang ajak Nathani Dawid den jembi.

¹⁶Idangji Dawid chuba ai aser KIBUBA jakdang amen, aser ashi, “Oh KIBUBA Tsüngrem, nai ni papigati anir arutsüba ya nia aser kinungera kechiaka?

¹⁷Oh Tsüngrem, ibai ne nükdangbo tila ka liasü; saka nai ano ne tenzüker kibong indang tarutsü mapang talang lia jembiogo, aser kü nem tarutsü pututem sayuogo, Oh KIBUBA chuba!

¹⁸Ne tenzüker tushiba asoshi ne dang Dawidi ano kechi ashitsü akoktsü? Kechiyong nai ne tenzüker meteter.

¹⁹Ne tenzüker meji, Oh KIBUBA aser na pei mulungjang ama, item mapa tulu ajak metetdaktsütsü nai iba mapa tulu inyak.

²⁰Na mesüka shinga mali, Oh KIBUBA, onok tenarong agi angashiba ajak agi na alema Tsüngrem mali.

²¹Ne nübur Israel, shir dangi pei nübur asütsü Tsüngremi alangtsü ao, nai Ijip nungi shirnok alangzük parnok jakdang kintem aridokba agi, ne sasa tenüng tulu aser tetsübutsü kümdaktsü, parnok mesüka alima nung kechi kin lir?

²²Aser nai ne nübur Israel teti asoshi ne nübur asütsü kümdaktsü; aser na Oh KIBUBA, parnok Tsüngrem aküm.”

²³“Tang, Oh KIBUBA, nai ne tenzüker indang aser par kibong indang jembiba oji teti asoshi lidakjangma, aser nai jembiba ama inyakangma.

²⁴Aser ne tenüng teti asoshi amentetdaktsütsü aser uludakja ashitsü, Temeranger KIBUBA Israel Tsüngremji, Israel Tsüngrem lir, aser ne tenzüker Dawid kin ne jakdang amenteta alitsü.

²⁵Kechiyong na, kü Tsüngrem, ne tenzüker dang pa asoshi ki ka amentetdaktsütsü ta jungkai adokdaktsüogo; anungji ne tenzükeri ne madang sarasademtsü tasü aiter.

²⁶“Tang, Oh KIBUBA, na Tsüngrem lir, aser nai iba mapang tajung ne tenzüker dang nangzükogo;

²⁷aser tang ne madang teti asoshi maneni litettsüsa, yimlibilema ne tenzüker kibong moajangma; kechiyong Oh KIBUBA, nai kechi moatsü aji teti asoshi moatsüogo.”