Read njo 1 PUTIPUYANG 18 Bible Online

1 PUTIPUYANG 18 - njo bible

1 PUTIPUYANG 18

¹Iba sülen Dawidi Filistia nunger akok aser parnok pa kübok ayu, aser pai Gat aser iba yimtsüngtem Filistia nunger ket nungi agi.

²Ano pai Moab akok, aser Moab nunger Dawid tenzükertem aküm aser putisü bener arua agütsü.

³Ano Dawidi Hadadezer, Zoba chuba Hamat tsütsü aliba, Eufrata nung pai pei nüngshi noksa ayutsü aodang akok.

⁴Dawidi pa nungi talungtsü meyi ka, kor temeranger meyi tenet, aser tetsüng temeranger meyi metsü agi; aser Dawidi talungtsü kor ajak tepi tezü lepzüka yok saka talungtsü noklang ka asoshi teperi toktsü.

⁵Kodang Siria nunger Damaska nungi Zoba chuba Hadadezer yaritsü aru, Dawidi Siria nunger nisung meyi metsür ana tepset.

⁶Idangji Dawidi Siria nung aliba Damaska nung temeranger miter telok toktsü; aser Siria nunger Dawid tenzükertem aküm, aser putisü bener arutsü. KIBUBAi Dawid nem pa aolen ajak nung takok agütsü.

⁷Hadadezer tenzükertemi abenba hon jongtemji Dawidi agi, aser itemji Yirusalemi bener aru.

⁸Aser Hadadezer yimtitem Tibbat aser Kun nungi, Dawid yongmenyin tzüyim aser tongshitem aser yongmenyin marok-enrok yanglu.

⁹Kodang Hamat chuba Toui Zoba chuba Hadadezer temeranger telok ajonga Dawidi kokogo ta angashi,

¹⁰pai par chir Hadoram Dawid chuba dangi, pa nem salem agütsütsü aser takok tenüngsang agütsütsü yok, kechiaser pai Hadadezer anema rara aser pa akok; kechiaser Hadadezer aiben Tou den rara liasü. Aser pai hon, taribi, aser yongmenyin oset, tapu ajak yok.

¹¹Itemia ano Dawid chubai KIBUBA nem bendanga agütsü, pai kin ajak nungi, Edom, Moab, Ammon, Filistia, aser Amalek nungi pai bener arua aliba hon aser taribi den külemi agütsü.

¹² Zeruia chir Abishai-i Metsü Lenten nung Edom nunger meyi terti tepset.

¹³Pai Edom nung miter temeranger telok ayu; aser Edom nunger ajak Dawid tenzüker aküm. Aser KIBUBAi Dawid nem pa aolen ajak nung takok agütsü.

¹⁴Anungji Dawidi Israel ajak madak chuba; aser pai ochi o bendang aser nisung ajak madang kasasa benshi.

¹⁵Zeruia chir Yoab temeranger telok madak liasü; aser Ahilud chir Yehoshafat tezülur liasü;

¹⁶Ahitub chir Zadok aser Abiathar chir Abimelek putirtem liasü; Shavsha tezülur liasü;

¹⁷Yehoiada chir Benaia Keret nunger aser Pelet nunger madak liasü: aser Dawid chirtem chuba mapa nung tongtipur liasü.