Read njo 1 PUTIPUYANG 19 Bible Online

1 PUTIPUYANG 19 - njo bible

1 PUTIPUYANG 19

¹Tang Ammon nunger chuba Nahas sür külen, par chiri pa melen chuba.

²Dawidi ashi, “Nahas chir Hanun dangi ni temulung agüja benshitsü, kechiaser tebui kü dang temulung agüja benshi.” Anungji Dawidi pa süngzükdaktsütsü tenyartem yok. Dawid tenzükertem pa süngzükdaktsütsü Ammon nunger lima nung Hanun dangi aru.

³Saka Ammon nunger tamburtemi Hanun dang ashi, “Dawidi ne dangi tesünepdaktsür yokba jagi pai nebu akhüm tsübur ta nai bilemer asü? Par tenzükertemi na laodaktsütsü aser linük lazüktsü atema ne dangi maru no?”

⁴Anungji Hanuni Dawid tenzükertem ania aru, aser parnok ku südoktsü, aser parnok süoshi tiyong nung, parnok techimi tashi rangtoktsü, aser parnok yokadok.

⁵Kodang Dawid dang nisungtem indang metetdaktsü, pai parnok lenji yok, kechiaser nisungtemji kanga maksüa liasü. Aser chubai ashi, “Nenok bangsemo madok tashi Yeriko nung liang, ajiser meyipa arung.”

⁶Kodang Ammon nungeri parnok sasa Dawid madang tetsüng metsütsüsa inyak ta ajitet, Ammon nunger Hanuni, Mesopotamia, Aram-maaka, aser Zoba nungi talungtsü aser kor temerangertem alia amshitsü taribi seret semermer touzük meyi ka yok.

⁷Parnok talungtsü meyi semer ana aser Maaka chubai par temeranger telok atema taa agütsü, shibai arua Medeba madang arü amendak yanglu. Ammon nunger parnok yimtitem nungi aniten aser tongbangi aru.

⁸Kodang Dawidi aji angashi, pai Yoab aser temeranger temeranger telok ajak yok.

⁹Ammon nunger adoka yimti amungdang taren sena noktak, aser chubatem shirnok arua ali parnok balaka moapu nung liasü.

¹⁰Kodang Yoabi tongbangji pa anema tejaklen aser tesülen lir ta angu, pai Israel nisung takutet kar shimtet, aser Siria nunger anema tongbang noktakdaktsü.

¹¹Tanüngba pa nisungtemji tenu Abishai kübok pai yutsü, aser parnok Ammon nunger anema tongbang noktak.

¹²Aser pai ashi, “Siria nungerji ni asoshi onsara tashi itra idangji nai ni yaritsü; saka Ammon nunger na asoshi onsara tashi itra, idangji ni na yaritsü.

¹³Tasü itang, aser nübur asoshi aser asen Tsüngrem yimtitem asoshi asenoki teburchi kümdi; aser KIBUBAi pa tsüngdang kechi ajung aji inyakangma.”

¹⁴Idangji Yoab aser pa den aliba nisungtemi Siria nunger anasa tongbang raratsü aru; aser parnok pa madang ajen.

¹⁵Kodang Ammon nungeri Siria nunger ajenba ajitet, parnoki yamaji Yoab tenu Abishai madang nungi ajen, aser yimti jagi ai. Idangji Yoab Yirusalemi aru.”

¹⁶Saka kodang Siria nungeri parnok Israel nunger nem kokdaktsü ta ajitet, parnoki osang benertem yok aser Siria nunger shirnoki Eufrata atena oa ali, Hadadezer temeranger telok walunir Shofak, parnok madak kibur sür adok.

¹⁷Kodang aji Dawid dang metetdaktsü, pai Israel ajak külemi aniten aser Yordan ajanga oa parnok anema temeranger telok atsüten. Kodang Dawidi Siria nunger anema tongbang noktak, parnoki pa anema rara.

¹⁸Saka Siria nungeri Israel madang nungi ajen; aser Dawidi Siria nunger talungtsü meyi tenet, tetsüng temeranger meyi lir, aser ano temeranger telok walunir Shofat tepset.

¹⁹Kodang Hadadezer tenzükertemi parnok Israel nunger nem kokdaktsü ta ajitet, parnoki Dawid den yimjung yanglu, aser pa jamir aküm. Anungji joko Siria nungeri Ammon nunger yaritsü mulunga maliasü.