Read njo 1 PUTIPUYANG 20 Bible Online

1 PUTIPUYANG 20 - njo bible

1 PUTIPUYANG 20

¹ Chubatem tongbangi aoba mapang, metsü tsüngkhüm nung, Yoabi temeranger telok anir ao, aser Ammon nunger linük amak, aser arua Rabba lungbang. Saka Dawid Yirusalem nung ali. Aser Yoabi Rabba akok, aser aji atsüngdok.

²Dawidi parnok chuba korang parnok kolak nungi agi; pai aji odangba hon seret semer ozükba ka angu, aser iba nung senti lung liasü; aser aji Dawid kolak nung sema liasü. Aser pai yimti terakzükba oset jenti bener adok.

³Aser iba nung alirtem pai anir adok, aser süngrangtsü aser merang taju aser po amshia mapa inyakdaktsü; aser yamaji Dawidi Ammon nunger yimtitem dang inyak. Ajiser Dawid aser nisung ajak Yirusalemi meyipa ao.

⁴Iba sülen Filistia nunger den Gezer nung rara adok; idangji Hushat nunger Sibekai, aso tulutem nungi jakzükba ka, Sippai tepset; aser Filistia nunger pa kübok ayu.

⁵ Aser ano Filistia nunger den rara liasü; aser Git nunger Goliat, shiba nüdong sütaker alem ama liasü, tenu Lahmiji Jair chir Elhanani tepset.

⁶Ano Gat nung rara liasü, yangji asoajen tulu ka liasü, shiba teka shia nung temeyong trokrok liasü, aser tetsüng shia nung temesüla trokrok liasü, ajak agi metsür pezü; aser ano pa aso tulu nungi jakzükba liasü.

⁷Kodang pai Israel anema apuso, Dawid tenu Shimea jabaso Yonathani pa tepset.

⁸Itemi Gat nung aso tulutem nungi jakzükba liasü; aser parnok Dawid ket nung aser pa tenzükertem ket nung lao.