Read njo 1 PUTIPUYANG 21 Bible Online

1 PUTIPUYANG 21 - njo bible

1 PUTIPUYANG 21

¹Israel anema Satani noktak, aser Israel yongzük züngdangtsü Dawid ajioktsü.

²Anungji Dawidi Yoab aser temeranger tanishir dang ashi, “Oang, Beersheba nungi Dan tashi Israel züngdangang, aser parnok yongsük metettsü kü dangi osang bener arung.”

³Saka Yoabi ashi, “KIBUBAi pei nübur dang parnok kwi ali paikaji noklangben renlokjangma! Kü kibur chuba, parnok ajakji kü kibur tenzüker masü no? Ajangla kechiba kü kibur ya tenüngdaktsü? Kechiba pai Israel dangi tai bena arutsü?”

⁴Saka Yoabi chuba o makok. Anungji Yoabi pila-a oa Israel ajak sema ao, aser Yirusalemi meyipa aru.

⁵Aser Yoabi nisung yongsük bendenba Dawid nem agütsü. Israel ajak nung nok amertem tebur million ka meyi noklang ka, aser Yihuda nung nok amer meyi noklang pezü ser neter liasü.

⁶Saka pai Levi aser Benjaminbo yongsük makuk, kechiaser chubar temelabaji Yoabi maginüi liasü.

⁷Saka iba mapa agi Tsüngrem mepelai liasü, aser pai Israel dak azük.

⁸Dawidi Tsüngrem dang ashi, “Ni iba mapa inyakba agi temenen benshiogo; ni ne dang mepishir, ne tenzüker tai menaba bener oadokangma; kechiyong ni kanga tamashi inyakogo.”

⁹KIBUBAi Dawid ainkar Gad dang jembia ashi,

¹⁰“Oang aser Dawid dang shiang, ‘Yamai KIBUBAi ashir, ni ne nem asemsü agütsür; item rongnung ka shimtetang, angji ni ne dang inyaktsü.’

¹¹Anungji Gad Dawid dangi arua pa dang ashi, ‘Yamai KIBUBAi ashir, Koba nai aginür shimang;

¹²küm asem ayawara mesüra ne tsükchir nok nungi jenshia, ita asem ne tsükchir ajanga teraksa adokdaktsütsü, mesüra anogo asem KIBUBA nok, linük nung tashitak wara, aser KIBUBA tenyari Israel litsü ajak nung samatsütsüba süshia; tang shibai ni yok pa dangi ni kechi telangzüba abentsü lemtetang.’

¹³Idangji Dawidi Gad dang ashi. ‘Ni tejashi tulu nung lir; KIBUBA ket nungang ni tsükdakjang, kechiyong pa taochi kanga tulu; saka ni nisung ket nungbo tetsükdaktsüma.”

¹⁴Anungji KIBUBAi Israel madak tashitak wara yok; aser yangji Israel nunger meyi neter lao.

¹⁵Tsüngrem tenyar Yirusalem samatsütsü yok, saka kodang pai aji samatsütsü liasü, KIBUBAi angu, aser tamajung nungi pai temulung meyip; aser pai tesamatsüba tenyar dangji ashi, “Ojang süang; tang ne teka sotang.” Aser KIBUBA tenyarji Yebus nunger Arauna motsüngnem anasa noktaka liasü.

¹⁶Aser Dawid pei tenük temaleni repranga yok nung KIBUBA tenyarji alima aser anüng tsüngda nung noktaka angu, aser pa teka nung nok ka Yirusalem madak mekanga angu. Idangji Dawid aser tamburtem anem sü abener tejak mejiok.

¹⁷Dawidi Tsüngrem dang ashi, “Nisung züngdangtsü ni temelaba magütsü no? Shibai temenen mena aser kanga mejungi inyak aji ni lir, saka item santem, parnoki kechi inyak? Oh KIBUBA kü Tsüngrem, ni ne dang mepishir, ne teka ni anema aser kübur ki anema sangma; saka ne nübur madak temerenshi telidaktsüma.”

¹⁸Idangji KIBUBA tenyari Gad dang Dawidi KIBUBA dangi Yebus nunger Arauna motsüngnemi tua tenladak ka yangluang aser ajagi tuang ta Dawid dang ashitsü mela.

¹⁹Anungji KIBUBA tenüng nung Gadi jembiba o nungji Dawidi atu.

²⁰Tang Arauna wheat tsük netya liasü; pai meyip aser tenyarji angu, aser pa den aliba jabaso pezüji parnok sasa atsükadok.

²¹Dawid Arauna dangi aru nung, Arauni reprang aser Dawid angu aser motsüngnem nungi tugu, aser pa tejak alilen shir Dawid nem salem agütsü.

²²Dawidi Arauna dang ashi, “KIBUBA nem tenladak ka ni yanglutsüsa kü nem iba motsüngnem tesem ka agüjangma, nübur nungi temerenshiji pila-a odaktsütsüsa, iba jenjang shitak agi kü nem aji agüjangma.”

²³Idangji Arauna-i Dawid dang ashi, “Agiang; aser kü kibur chubai pa tsüngdang kechi ajung aji inyakangma; ajiang tarongba tenla asoshi nashi, aser süng asoshi tsük atepba süng, aser chiyungtsü tenla asoshi wheat tsük ni agütsür. Ni ajak agütsür.”

²⁴Saka Dawid chubai Arauna dang ashi, “Masü, saka ni aji jenjang shitak agi alitsü; kechi ne meyong lir KIBUBA asoshi ni magitsü mesüra ni kecha jenjang makai tarongba tenla magütsütsü.”

²⁵Anungji Dawidi Arauna nem iba asoshiji hon shekel noklang trok ozüka agütsü.

²⁶Yangji Dawidi KIBUBA dang tenladak ka yanglu aser tarongba tenla aser yimjung tenla agütsü aser KIBUBA dang aja, aser pai tarongba tenladak madak anüng nungi mi agi langzü.

²⁷Idangji KIBUBAi tenyar dangji mela; aser pai pa nok nokleptsü nung asem.

²⁸Iba mapang nungji, kodang Dawidi Yebus nunger Arauna motsüngmen nung pa dang KIBUBAi langzü ta angu, pai pa tetepsetba tenla yangji agütsü.

²⁹Kechiyong KIBUBA tekülemdak süki koba Mosai arem nung yanglu, aser tarongba tenla tenladakji iba mapang nung Gibeon nung tekülemdak tenem nung liasü;

³⁰saka Dawidi iba madang jagi Tsüngrem dang asüngdangtsü moutet, kechiyong pai KIBUBA tenyar tsübua liasü.