Read njo 1 PUTIPUYANG 22 Bible Online

1 PUTIPUYANG 22 - njo bible

1 PUTIPUYANG 22

¹Idangji Dawidi ashi, “Yangi Dawid Tsüngrem ki alitsüla aser yangi Israel asoshi tarongba tenla tenladak alitsüla.”

²Anungji Israel linük nung alir Bendangertem Dawidi külemi sentepdaktsü, aser Tsüngrem ki yanglutsü asoshi pai lung angenertem lung angenteta renemtsü inyakdaktsü.

³Dawidi ano süngkhüm kishitem asoshi aser temetenteptsü kojal asoshi merang talubosa rizüng, aser yongmenyina seret modangtettsüsa,

⁴aser cedar süngtsük mezüngdangtettsüsa renemtsü; kechiyong Sidon aser Tair nungeri cedar süng jenti Dawid dangi bener aru.

⁵Dawidi ashi, “Kü jabaso Solomon asangur aser mapa nung lanu, aser KIBUBA asoshi ki yanglutsü alibaji onsara akhüm taket, linük ajak nung nüngtugu aser sentsüwangshi asütsüla; aji asünung ni iba asoshi terenemba akatsü.” Anungji Dawidi pa masüdang oset-tsüset jenti benden.

⁶ Idangji pai par chir Solomon aja aser KIBUBA Israel Tsüngrem asoshi ki ka yanglutsü mela.

⁷Dawidi Solomon dang ashi, “Kü chir, KIBUBA kü Tsüngrem tenüng nung ki ka yanglutsü kü mulung nung liasü.

⁸Saka KIBUBA O kü dangi arua ashi, ‘Nai azü jenti tokshi aser rara tulu raraogo; nai kü tenüng atema ki ka meyanglutsüla; kechiaser nai kü madang azü jenti ali nung tokshitsüogo.

⁹Ajiang, ne nem jabaso ka sotsütsü; paji yimjung nisung ka asütsü; aser meketa pa tsükchir ajak nungi ni pa nem yimjung agütsütsü; kechiyong pa tenüng Solomon ajatsü, aser ni pa tendak Israel nem yimjung aser tesüngjem agütsütsü.

¹⁰Pai kü tenüng asoshi ki ka yanglutsü. Pa kü chir asütsü, aser ni pa tebu asütsü, aser Israel nung ni pa chuba menden teti asoshi yanglutsü.’

¹¹“Tang kü chir, KIBUBA ne den liang, aser ne indang jembiba ama, na azükarujang, aser KIBUBA ne Tsüngrem ki yangluang.

¹²KIBUBAi dang, oda kodang pai ne nem Israel madak anishitsü meladir, nai KIBUBA ne Tsüngrem ozüng amshitettsüsa ne nem shisatsü aser tangatetba agüjangma.

¹³ Nai telatet ozüngtem aser yimsü ozüngtem koba Israel asoshi KIBUBAi Mosa dang mela aji benshitsü kümdanga lira idangji na azükarutsü. Tashi itang, aser tasü itang.

¹⁴Timtem tulu agi KIBUBA ki asoshi hon seret semermer tozük meyi noklang ka, taribi seret semermer touzük million ka, yongmenyin aser merang modangtettsüsa bendentsüogo, kechiaser ibaji talubosa lir; süngtsük aser lunga ni bendentsüogo. Item dak nai bendenloktsüla.

¹⁵Na mapa inyaker jenti lir; lung angenertem, lung mistritem, süng mistritem, mapa tapu ajak nung tetangshirtem mezüngdangteti lir;

¹⁶hon, taribi, yongmenyin aser merang. Aramesoang aser sotakang! KIBUBA ne den liang.”

¹⁷Dawidi ano Israel tanishir ajak dang par chir Solomon yaritsü mela-a ashi,

¹⁸“KIBUBA nenok Tsüngrem nenok den mali no? Aser ajaklen pai nenok nem yimjung magütsü no? Kechiyong pai linük alirtem kü ket nung bendanga agütsü; aser KIBUBA aser pa nübur madang alinükji mokrema lir.

¹⁹Tang KIBUBA nenok Tsüngrem bushitsü nenok mulung aser temulungjang nung itang. Aramesoang aser nenok KIBUBA Tsüngrem temeshidak yangluang, angji KIBUBA temeshi süngden aser Tsüngrem meyong temeshi marok-ausutem KIBUBA tenüng asoshi yangluba ki kati bener aita ayutsü akoktsü.”