Read njo 1 PUTIPUYANG 23 Bible Online

1 PUTIPUYANG 23 - njo bible

1 PUTIPUYANG 23

¹Kodang Dawid tambur aser tasa liasü, pai par chir Solomon Israel madak chuba kümdaktsü.

²Dawidi Israel tanishir, aser putir aser Levi nunger ajak atenshidaktsü.

³Levi nungerji küm semer aser temalen züngdang, aser nisung meyi semerti liasü.

⁴Item rongnung meyi metsür pezübo, KIBUBA kidang mapa nung ketdang asütsü, meyi trok yimsüsür aser o bendanger asütsü,

⁵meyi pezü süngkhüm anüker, aser meyi pezü tenüngsang agütsütsü ta Dawidi ashi.

⁶Levi chirtem apir Dawidi parnok telok telemsa: Gershon, Kohat aser Merari.

⁷Gershon chirtemji Ladan aser Shimei.

⁸Ladan chirtem: Yehiel tongtiba, Zetham, aser Yoel, par asem.

⁹Shimei chirtem: Shelomot, Haziel, aser Haran, par asem. Itemi Ladan tebou semchir tongtipur liasü.

¹⁰Shimei chirtem: Yahat, Zina, Yeus, aser Beria. Item pezüi Shimei chir liasü.

¹¹Yahatji tongtiba liasü, aser Ziza tanabuba; saka Yeus aser Beria jabaso aika maliasü, aji asünung parnok tebou ka semchir ama yongsük nung akuk.

¹²Kohat chirtem: Amram, Izhar, Hebron, aser Uzziel par pezü.

¹³ Amram chirtem: Aron aser Mosa. Aron aser par chirtemi KIBUBA madang teti asoshi liangmesen arongtsü asoshi, aser pa dang tenzüktsü aser teti asoshi pa tenüng nung temoatsü agütsütsü asoshi, temeshitiba osettem bendanga agütsütsü asoshi Aron pila-a ayu.

¹⁴Saka Tsüngrem nisung Mosa chirtembo Levi kin rongnung züngsem.

¹⁵Mosa chirtem: Gershom aser Eliezer.

¹⁶Gershom chirtem: Shebuel tongtiba.

¹⁷Eliezer chirtem: Rahabia tongtiba: Eliezer techir tanga mali asü, saka Rehabia chirtem kanga jenti liasü.

¹⁸Izhar chirtem: Shelomit tongtiba.

¹⁹Hebron chirtem: Yeria tongtiba, Amaria tatongbuba, Yahaziel tasembuba, aser Yekammeam pezübuba.

²⁰Uzziel chirtem: Mika tongtiba aser Ishia tatongbuba.

²¹Merari chirtem: Mahli aser Mushi. Mahli chirtem: Eleazar aser Kis.

²²Eleazar techir mali asü, saka jalatem dang liasü; aser parnok sosem, Kis chirtemi parnok agi.

²³Mushi chirtem: Mahli, Eder, aser Yeremot, par asem.

²⁴Itemi tebou semchir agi Levi chirtem liasü, tebou semchir tongtipur parnok küm metsü tain nungi temalen, pei pei tenüng züluba, KIBUBA ki mapa asoshi parnoki inyaktsü liasü.

²⁵Kechiyong Dawidi ashi, “KIBUBA Israel Tsüngremi pei nübur nem yimjung agütsü; aser pa Yirusalem nung teti asoshi alir.

²⁶ Joko Levi nunger tekülemdak süki mesüra idakji oset tenzükba kecha mapa atema bener mesenzütsü.”

²⁷Kechiyong Dawid tatembang o agi itemi Levi nunger küm metsü aser temalen yongsük nung liasü.

²⁸ Kechiyong parnok mapaji Aron jabasotem KIBUBA kidang mapa asoshi yaritsü, kilempok aser taktangtem anebalutsü, aser kechi temeshi ajakji, aser Tsüngrem kidang tenzükba mapa asoshi merükmejutsü;

²⁹ano Tsüngrem madang ayuba amtsük, chiyungtsü tenla, asoshi amzü, piyazü meinokba amtsük, mesüra amtsük yangluba tenla, totzü den meyoktepba tenla, aser tatakzük aser tasazük ajak nung yariteptsü.

³⁰Aser anepdang shia parnoki KIBUBA nem tepela aser tenüngsang agüja, aser aonunga yamaji alitsü.

³¹Kodangsa tarongba tenlatem amungnü KIBUBA nem agütsüdir, ita lanu, aser benjong anogotem, KIBUBA madang maneni parnok indang yimsü-ozüng liasü.

³²Yamaji parnoki sentep süki aser temeshidak reprangtsü, aser KIBUBA kidang mapa asoshi aser parnok adianu Aron jabasotem yaritsü.