Read njo 1 PUTIPUYANG 28 Bible Online

1 PUTIPUYANG 28 - njo bible

1 PUTIPUYANG 28

¹Yirusalem nung Israel tanishir ajak, kintem tanishir, chuba tenzüker telemsa tanishirtem, meyirijang madak arkotong, noklang madak arkotong, chuba aser par jabasotem rongsen aser kiset shiruru telok madak ketdangpur, chuba ki tanishirtem, temeranger nisungtem, aser takutet nokinketertem külemi Dawidi sentepdaktsü.

² Idangji Dawid chubai aramesoa noktaka ashi, “Kü dang angang, kü adianutem aser kü nüburtem. Ni kü mulung nung KIBUBA tezüngzüktepba temeshi süngden ayutsü asoshi, aser asen Tsüngrem tetsüng ajemetdak ki ka yanglutsü bilema liasü; aser ki yanglutsü ni renemja lir.

³Saka Tsüngremi kü dang ashi, ‘Nai kü tenüng asoshi ki ka meyanglutsü, kechiyong na raraba nisung aser azü tokshiogo.

⁴Aji saka KIBUBA Israel Tsüngremi Israel madak teti chuba asütsü kübu ki nungi ni shimtet; kechiaser pai Yihuda kin tanishir shimtet, aser Yihuda kin nung aser kübu kidong aser kübu jabaso rongnungi pai Israel ajak madak chuba asütsü pai kü dak saklok.

⁵Aser kü jabaso ajak rongnung,” kechiyong KIBUBAi kü nem jabaso jenti agütsü,” pai kü jabaso Solomon Israel madak KIBUBA yimli chuba menden nung amentsü shimtet.’

⁶Pai kü dang ashi, ‘Kü ki aser kü o bendangba ki yanglutsübaji ner jabaso Solomon asütsü, kechiaser ni pa kü chir asütsü shimtetogo, aser ni pa tebu asütsü.

⁷Pai kü temelabatem aser yimsü ozüngtem maneni, tanü amai, benshia lira ni pa yimli teti asoshi yanglutsütsü.

⁸Tang aji asünung KIBUBAr mungdang nung, Israel ajak madang, aser asen Tsüngremi angashia, KIBUBA nenok Tsüngrem temelabatem ajak benshiang aser bushitetang; angji nenoki iba lima tajung ya agitettsü, aser nenok sülen teti asoshi nenok chirtem nem senmangtsü asoshi agütsütsü.’

⁹“Aser na, kü chir Solomon, nebu Tsüngrem metetang, aser temulungjang ajonga aser mulungso agi pa tenzükang; kechiaser KIBUBAi temulungjang ajak bushir, aser tasa aser tebilemba shia angateter. Nai pa bushira nai pa angutsü; saka nai pa sentokra, pai na teti asoshi jentokadoktsü.

¹⁰Tang kümdangang, kechiyong temeshidak asoshi ki ya yanglutsü KIBUBAi na shimtetogo, tashi itang, aser aji inyakang.”

¹¹Idangji Dawidi par chir Solomon nem tenla ki asameyangba, aser iba terizüngdak, iba temaba taktangtem, telung taktangtem, aser taochi menden asoshi taktang asameyangba agütsü.

¹²KIBUBA ki nung obendangdak ki asoshi pa mulung nung aliba asameyang ajak, mekettepa aliba taktangtem, Tsüngrem kidang terizüngdak, aser bendanga agütsüba sempet asoshi terizüngdak;

¹³putirtem aser Levitem telemsatem asoshi, aser KIBUBA kidang tenzükba mapa ajak; KIBUBA kidang mapa asoshi marok-ausu ajak asoshi;

¹⁴mapa shia asoshi hon chipo-anpo ajak asoshi hon touzük,

¹⁵hon milendong aser milentem touzük mapa shia asoshi taribi chipo-anpo touzük, hon touzük milendong shia mapa nung milendongtem shia asoshi tenüngdaktsü yari,

¹⁶Tsüngrem madang ayuba amtsük asoshi langbang shia hon touzük, taribi langbang asoshi taribi,

¹⁷aser shi atuba chisang chikok asoshi hon temeja, susatem, aser maroktem; hon susatem asoshi aser iba shia touzük; taribi susa aser iba shia touzük;

¹⁸temeshitet hon agi yangluba liangmesen tenladak asoshi, aser iba touzük, ano KIBUBA tezüngzüktepba temeshi süngden cherubim tashikang sarar nembanga aliba cherubim hon talungtsü asoshi pa asameyang.

¹⁹Dawidi ashi, “Item ajak ya inyaktsü asoshi KIBUBAi inyaktsü angatetdakja züluogo.”

²⁰Idangji Dawidi par chir Solomon dang ashi, “Tashi itang aser tasü itang, aser aji inyakang. Tetsübu, temulung makai teli; kechiaser KIBUBA Tsüngrem, oda kü Tsüngrem, ne den lir. KIBUBA ki mapa ajak merenem tashi pai na mechioktsü mesüra na mejentoktsü.

²¹Aser ajiang, Tsüngrem kidang mapa ajak asoshi putirtem aser Levitem telemsa lir; aser ne den mapa ajak nung temulunger nisung shia shiba mapa kar asoshi tetangshir lir pa dena alitsü; ano tanishirtem aser nisung ajak ne temelaba kübok lir.