Read njo 1 PUTIPUYANG 29 Bible Online

1 PUTIPUYANG 29 - njo bible

1 PUTIPUYANG 29

¹Dawid chubai mungdanger ajak dang ashi, “Kü jabaso Solomon shiba Tsüngremi shimteta lir, pa asangur aser shisa lanu, aser mapaji tulu, kechiyong chuba kiji nisung asoshi masü saka KIBUBA Tsüngrem asoshi lir.

²Anungji kü Tsüngrem ki asoshi, ni akokba tashibo bendentsüogo, hon oset asoshi hon taribi oset asoshi taribi, yongmenyin asoshi yongmenyin, merang oset asoshi merang, süng oset asoshi süng; iba dak alema oniks aser tamenoktsü lungtem, sentsü tapu tapu, senti lung tapu ajak, aser marbel lung.

³Ano temeshi ki asoshi ni bendenba ajak dak alema, ni kü pei hon aser taribi terizüngdak aliba kü Tsüngrem ki asoshi ne temulung bendanga agütsüba yong ni aji kü Tsüngrem ki asoshi agütsür;

⁴hon seret semermer ozükba meyi asem, Ofir hon, aser taribi temeshitet seret semermer ozükba meyi tenet, ki jara manung yangloktsü asoshi,

⁵inyakshir nisungtemi inyaktsü mapa ajak asoshi hon oset asoshi hon, aser taribi oset asoshi taribi. Ajangla shibai mulungbensa pei sasa tanü KIBUBA nem bendanga agütsütsü?”

⁶Idangji tebou semchir tongtipurtemi kidong tanishirtem meyirijang madak aser noklang madak arkotongtem, aser chubar mapa madak tanishirtem parnoki temulunger tenla agütsü.

⁷Tsüngrem kidang mapa asoshi parnoki seret semermer ozükba meyi pungu aser hon sen meyi ter, seret semermer ozükba taribi meyi ter. Yongmenyin seret semermer ozükba meyi terti aser seret semermer ozükba merang meyi noklang ka.

⁸Aser shibasa senti lungtem aka KIBUBA ki terizüngdak, Gershon nunger Yahiel ket nung itemji agütsü.

⁹Idangji nisungtemi pelatep kechiaser itemi mulungbensa agütsü, kechiyong temulungjang ajongai mulungsoa KIBUBA nem agütsü; aser Dawid chuba kanga dang pela.

¹⁰Aji asünung mungdanger ajak madang Dawidi KIBUBA moaja ashi, “Oh KIBUBA, ozü tebu Israel Tsüngrem, teti tatem maka na temoatsüba sang.

¹¹Oh KIBUBA uluba aser ain, sentsüwangshi, takok, aser akhüm tuluji, ne meyong lir; kechiyong anüng nung aser alima nung aliba ajak ne meyong; Oh KIBUBA, yimliji ne meyong, aser ajak madak na tekolak ama ajongketa lir.

¹²Rongsen aser tetushi na nungi arur, aser nai ajak madak yimsü asür. Ne ket nung ain aser tashi lir; aser tulu kümdaktsütsü aser ajak nem tashi agütsütsü ne ket nung lir.

¹³Aser tang onoki ne nüng asanger, ozü Tsüngrem, aser ne sentsüwangshi tenüng asanger.

¹⁴“Saka yamai mulungbena onoki tenlatettsüsa nia shiba aser kü nüburtema kechiaka? Kechiyong oset ajak na nungi arur, aser ne meyong dang onoki ne nem agütsüogo.

¹⁵Kechiyong ozü tsürabur ajak ama onok ne madang aenertem; alima nung ozü arishi akhüm ka ama dang, aser kecha teimlatsü mali.

¹⁶Oh, KIBUBA ozü Tsüngrem, ne temeshi tenüng asoshi ne nem ki ka yanglutsü jenti onoki bendena akaba ya ajak ne ket nungi aser ajak ne meyong lir.

¹⁷Ni metet, kü Tsüngrem, oda nai temulungjang tentanger, aser tindang mulungsentsü nung pelar; kü mulungjang tindang agi item oset ajak mulungbensa agütsüogo; aser yangi aliba ne nüburtemi mulungsoa aser pelashishia ne nem agütsüba ni nguogo.

¹⁸Oh, KIBUBA, ozü tsürabur Abraham, Isak aser Israel Tsüngrem, teti asoshi nübur sentong aser temulungjang nung tebilembatem iba amai yujangma, aser parnok mulungjang ne tsütsülen yokdakjang.

¹⁹Kü chir Solomon nem ne temelabatem, ne kulitem, aser ne telatet ozüng ajak benshia, oda ni renema yutsüba agi pai chuba kiji yanglutettsü tabensa mulungjang agüjangma.”

²⁰Idangji Dawidi mungdanger ajak dang ashi, “Nenok Tsüngrem KIBUBA moajang.” Aser mungdanger ajaki parnok tsürabur Tsüngrem moatsü, aser parnok tekolak mechioka KIBUBA külem, aser chuba dang akhümtsübu sayu.

²¹Aser parnoki KIBUBA nem tetepsetba tenla agütsü aser tananü KIBUBA nem tarongba tenla, nashi pungchi meyi ka, san tepung meyi ka, aser san chanu meyi ka, parnok tajemtsü tenla, aser Israel ajak asoshi tetepsetba tenla jenti agütsü;

²²aser iba anogoji parnoki KIBUBA madang tepela tulu agi chia-ajem. Parnoki Dawid chuba chir Solomon tanaben chuba kümdaktsü, aser parnoki KIBUBA asoshi pa tanishir shim, aser Zadok putir kümdaktsü.

²³Idangji Solomon tebu Dawid melen KIBUBA chuba menden nung chuba ama amen; aser pa azükaru, aser Israel ajaki pa dang anga.

²⁴Tanishir ajak aser tashi tulu nisungtem, aser ano Dawider jabaso ajaki Solomon chuba dang pa süngpu kübok alitsü nangzük.

²⁵KIBUBAi Israel ajak tsüngdang Solomon kanga uludaktsü, aser pa nem agütsüba ama pa jakdang Israel nung shinga chuba nema chubar akhüm tulu magütsü.

²⁶Yamaji Yesse chir Dawidi Israel ajak madak chuba.

²⁷Pai Israel madak küm lir chuba; Hebron nung pai küm tenet, aser Yirusalem nung küm semerasem chuba.

²⁸Idangji pa kanga sar, arishia lir, rongsen, aser tetushi ngur asü; aser par jabaso Solomon pa melen chuba.

²⁹Tang Dawid chuba mapatem, mezüngbuba aser tesübuba, ajiang tangur Samuel otsü nung, aser ainkar Nathan otsü nung, aser tangur Gad otsü nung;

³⁰pa chubaba ajak indang aser pa tashi, aser pa madak aser Israel madak, aser alima yimli ajak madak atalokba itemji zülua lir.