Read njo 2 PUTIPUYANG 1 Bible Online

2 PUTIPUYANG 1 - njo bible

2 PUTIPUYANG 1

¹Dawid chir Solomoni pei sasa pei yimli yanglu, aser KIBUBA pa Tsüngrem pa den liasü aser onsara uludaktsü.

²Aser Israel ajak nung meyirijang madak aser noklang madak walunir dang, obendangertem, aser Israel nung lenir ajak tebou semchir rongnung tambusang dang Solomoni jembi.

³Idangji Solomon aser pa den telok ajak, Gibeon nung aliba tekülemdak tenemi ao; kechiyong Tsüngrem sentep süki koba KIBUBA tenzüker Mosai arem nung yanglu, aji yangji liasü.

⁴ Saka Tsüngrem temeshi süngden Kiriath-jearim nungi Dawidi iba asoshi renema alidaki bener atua liasü, kechiyong Yirusalem nung iba asoshi pai süki yanglua liasü.

⁵ Ano Hur chir Uri jabaso Bezaleli yongmenyin tenladak yanglua alibaji, yangji KIBUBA tekülemdak süki madang liasü. Solomon aser tesentepertemi KIBUBA bushi.

⁶Aser KIBUBA madang yongmenyin tenladaki Solomon atu, aji sentep süki nung liasü, aser iba manung tarongba tenla meyi ka tenla.

⁷Paonungji Solomon dangi Tsüngrem adok, aser pa dang ashi, “Ni ne nem kechi agütsütsüar asüngdangang.”

⁸Aser Solomoni Tsüngrem dang ashi, “Nai kübu Dawid dang mechiokba temeim tulu sayuogo, aser pa melen ni chuba kümdaktsüogo;

⁹Oh KIBUBA Tsüngrem, kübu Dawid dang ne tenangzükba tang atalokjangma, kechiyong alijak nung lisem kwika, paika nübur madakji nai ni chuba kümdaktsü.

¹⁰Iba nübur madang ni adokli yili ta asütsü shisa taka aser temetetba shisatsü dang kü nem agüjangma, kechiyong shibai ne nübur paika madakji yimsü sütettsü?”

¹¹Tsüngremi Solomon dang langzü, “Ibai ne mulungjang nung ali nungji, aser nai rongsen, sen, khonang, mesüra na sempartem taküm memeshi, aser oda arishi talang memeshi, saka kü nübur shir madak ni na chuba kümdaktsü parnok madak nai yimsü sütettsü na asoshi shisatsü aser temetetba ang meshi.

¹²Shisatsü aser temetetba ne dang melaogo. Ni ano senti oset, rongsen, aser khonang, chubatem shinga ne tejaklen makaba mesüra ne sülena shinga ibala makatsüba ne nem agütsütsü.”

¹³Anungji Gibeon tekülemdak tenem nungi aser sentep süki nungi Solomon Yirusalemi aru, aser pai Israel madak chuba.

¹⁴ Solomoni talungtsü aser kor temeranger külemi aniten; pa talungtsü noklang terpezü liasü aser kor temeranger meyi terana liasü, parnok pa talungtsü yimtitem nung aser Yirusalem nung chuba den lidaktsü.

¹⁵Aser chubai taribi aser hon Yirusalem nung lung ama bulua talubosa kümdaktsü, aser pai cedar süngdong Shefela nung mungu süngdong ama jenti kümdaktsü.

¹⁶ Aser Solomoni kortem Ijip aser Kue nungi bena aru, aser chubar shishirtemi itemi Kue nungi jenjang talang agüja ali.

¹⁷Parnoki Ijip nungi talungtsü ka taribi shekel noklang trok agi alia aben, aser kor ka nung noklang ka ser tenem agütsü; yamaji parnok ajanga itemi Het chuba ajak aser Siria chubatem dangi yok.