Read njo 2 PUTIPUYANG 10 Bible Online

2 PUTIPUYANG 10 - njo bible

2 PUTIPUYANG 10

¹Rehoboam Shekemi ao, kechiyong Israel ajak pa chuba kümdaktsütsü Shekemi arua liasü.

²Kodang Nebat chir Yeroboami aji angashi, kechiyong pa Ijip nung Solomon chuba tsüngdang nungi ajagi jena oa liasü, Yeroboami Ijip nungi meyipa aru.

³Parnoki yok aser pa aja; aser Yeroboam aser Israel ajak aru, aser parnoki Rehoboam dang jembia ashi,

⁴“Nebui onok süngra taret kümdaktsü; tang aji asünung nebu mapa tasakji, aser onok madak pa süngra taretji tepungbaba kümdakjang, aser onoki na tenzükdi.”

⁵Aser pai parnok dang ashi, Anogo asem lir tanaben kü dangi arung aser nisungtemji senshi.

⁶Solomon taküm alidang pa madang noktakba tamburtem den Rehoboam chubai asüngdangtepa ashi, “Iba nübur nem telangzüba meyipa agütsütsü nenokia kechi tebilemba kü nem agütsür?”

⁷Aser parnoki pa dang ashi, “Nai iba nübur dang meima benshira aser parnok peladaktsüra aser parnok dang o tajung jembira, idangji teti parnok ne tenzükertem asütsü.”

⁸Saka tamburtemi pa nem agütsüba oji pai sentokadok, aser pa madang noktaker pa den yinteter asangurtem denang o lemtep.

⁹Aser pai parnok dang ashi, “Iba nübur nem telangzüba agütsütsü nenokia kechi tebilemba kü nem agütsür?” Parnoki kü dang, “Nebui onok dak benloktsüba süngra tepungpaba kümdakjang,” ta ashir.

¹⁰Aser pa den yinteter asangurtemi pa dang ashi, “Ne dang, nebui onok süngra taret kümdaktsüogo, saka nai aji onok nem tepungpaba kümdakjang, ta jembiba nisungtem dang nai yamai shiang, Kübu teperem dang nungi kü temeyong chanula temelemba lir.

¹¹Aser tang kübui nenok dak süngra tasak apudaktsü süra, ni nenok nem süngra taliang apudaktsütsü; kübui tareptsü agi nenok merenshi, saka nibo nenok jepja agi merenshitsü.”

¹²Anungji asemnübuba nung arung, ta chubai ashiba ama Yeroboam aser nisung ajak Rehoboam dangi tasemnübuba aru.

¹³Aser chubai parnok dang sashia langzü; aser Rehoboam chubai tamburtem o sentoktsü,

¹⁴aser asangurtem o amaji Rehoboam chubai parnok dang jembia ashi, “Kübui nenok süngra taret apudaktsü, saka ni iba dak tali enloktsütsü; kübui nenok tareptsü agi merenshi; saka nibo jebja agi merenshitsü.”

¹⁵Anungji chubai nisungtem dang manga; kechiyong KIBUBAi pei o atalokdaktsütsü atema Nebat chir Yeroboam dang Shilo nunger Ahija ket agi pai koba jembi aji Tsüngrem nungi adoktsüba liasü.

¹⁶ Kodang Israel ajaki chubai parnok dang manga ta ajitet, nisungtemi langzüa ashi, “Dawid dak onok kechi shilem aka? Yesse chir dak onok senmang maka; nisung shia pei süki bushiang; tang na Dawid, pei ki reprangang.” Anungji Israel ajak pei süki bushia senshi.

¹⁷Saka Yihuda nung aliba Israel chirtem asoshibo, parnok madak Rehoboam chuba.

¹⁸Idangji Rehoboam chubai mapa anishir Hadoram yok; aser Israel chirtemi lung agi aon nung pa asü. Aser Rehoboam chubai Yirusalemi ajentsü, pei talungtsüi atutsü ilunga ao.

¹⁹Anungji Israeli tanü tashi Dawid kidong anema apusoa aru.