Read njo 2 PUTIPUYANG 11 Bible Online

2 PUTIPUYANG 11 - njo bible

2 PUTIPUYANG 11

¹Kodang Rehoboam Yirusalemi aru, pai Yihuda aser Benjamin kidongtem, meyi noklang ka ser tir teshimtet nisung, temerangertem, yimliji tanaben Rehoboam dangi bener arutsü; Israel anema raratsü, jaten.

²Saka KIBUBA O Tsüngrem nisung Shemaia dangi arua ashi,

³Solomon chir Rehoboam Yihuda chuba, aser Yihuda nung Israel aser Benjamin ajak dang jembia shiang,

⁴“Yamai KIBUBAi ashir, Nenok matutsü, mesüra nenok adianu den meraratsü; nisung shia pei kidangi meyipang; kechiyong iba mapa ni nungi lir.” Anungji parnoki KIBUBA oji anga, aser Yeroboam anema aotsü aliba nungi meyip.

⁵Rehoboam Yirusalem nung ali, aser Yihuda nung tekümzüktsü asoshi yimtitem yanglu.

⁶Pai Bethlehem, Etam, aser Tekoa yanglu,

⁷aser Beth-zur, Soko, Adullam,

⁸Gath, Maresha, Zif,

⁹Adoraim, Lakhis, Azeka,

¹⁰Zora, Aijalon, aser Hebron ya Yihuda nung aser Benjamin nung tekümzüktsü yangluba yimtitem lir.

¹¹Aser pai mitsatemji tashi ita yanglu, aser tanishirtem yangji toktsü, aser chiyungtsü rizüngdak, totzü, aser yi ayu.

¹²Aser yimti ajak nung pai jong aser nü ayu, aser parnok kanga tashi ita kümdaktsü. Anungji Yihuda aser Benjamin pa meyong liasü.

¹³Israel ajak nung alir putirtem aser Levitem parnok talidak ajak nungi pa dangi ao.

¹⁴Kechiyong Levitemi parnok chiyimdak lima aser parnok akabatem toktsü, aser Yihuda aser Yirusalemi aru: kechiyong Yeroboam aser par chirtemi, oda parnoki KIBUBA asoshi putir mapa meinyaktsüla ta aridokadok:

¹⁵ aser pai tenem tekümlemdak asoshi, aser san tepung süngyanglu, aser pai yangluba nashi chanutem asoshi putirtem shimtet.

¹⁶Shirnoki pei mulungjang nung KIBUBA Israel Tsüngrem bushitsü mulungtet, parnok Israel kidong ajak nungi Yirusalemi KIBUBA, parnok tsürabur Tsüngrem dangi tenlatsü aru.

¹⁷Parnoki Yihuda yimli tashi ita kümdaktsü, aser küm asem asoshi Solomon chir Rehoboam tekümzük nung lidaktsü, kechiaser parnoki küm asem Dawid aser Solomon lenmang nung jaja.

¹⁸Rehoboami Dawid chir Yerimot jala Mahalat kibutsü asütsü agi, shiba tetsü Yesse semchir Eliab jala Abihail liasü.

¹⁹Lai pa nem jabasotem sotsü; Yeus, Shemaria, aser Zaham.

²⁰La sülenbo pai Absalom jala Maaka agi; lai pa nem Abija, Attai, Ziza, aser Shelomit sotsü.

²¹Rehoboami pa kinungtsü aser tezüngatsü ajak dang alia Absalom jala Maaka meim. Pai kinungtsü terti aser tezüngatsü roker agi, aser jabaso metsür ti aser jala roker liasü.

²²Rebohoami pa adianu rongnung Maaka chir Abija tanishir tongtiba shimtet, kechiaser pai pa chuba kümdaktsütsü bilema liasü.

²³Aser pai shisa ka-a benshi, aser Yihuda aser Benjamin linük ajak nung, mitsa yangluba yimti ajak nung par jabasotem lemsa-a toktsü; aser pai parnok nem chiyungtsü teperi agütsü, aser parnok asoshi kibutsütem agütsü.