Read njo 2 PUTIPUYANG 12 Bible Online

2 PUTIPUYANG 12 - njo bible

2 PUTIPUYANG 12

¹Kodang Rehoboam yimli akanga aser tashi ita aküm, pai KIBUBA ozüng sentokadok, aser pa den Yihuda ajak dena liasü.

²Aser Rehoboam chuba küm pungububa nung, parnoki KIBUBA dang temulung malem nung, Ijip chuba Shishak Yirusalem anema,

³talungtsü noklang terana aser kor temeranger meyi roker atu. Aser pa den arurtem Ijip nungi Libya, Sukkim, aser Ethiopia nunger mezüngdangteti liasü.

⁴Pai Yihuda mitsa aliba yimtitem agi aser Yirusalem tonga aru.

⁵Idangji ainkar Shemaia Rehoboam dangi aser Yihuda tamarenertem dangi aru, Parnok Yirusalem nung Shishak anema sentepa liasü, aser parnok dang ashi, “Yamai KIBUBAi ashir, Nenoki ni toktsü, anungji ni nenok Shishak ket nung toktsü.”

⁶Idangji Israel tamarenertem aser chubai parnok sasa ajemalua aküm aser ashi, “KIBUBA shitak lir.”

⁷Kodang KIBUBAi parnok sasa ajemalu ta angu, KIBUBA O Shemaia dangi aru; “Parnoki pei sasa ajemaluogo; ni parnok mesamatsütsü, saka ni parnok nem tekümzük kar melatsü, aser Yirusalem madak Shishak ket agi kü terasaba memeküploktsütsü,

⁸aji saka parnok pa tenzükertem asütsü, angji parnoki kü mapa aser alima yimlitem mapa metettsü.”

⁹ Anungji Ijip chuba Shishak Yirusalem anema atu; pai KIBUBA kidang terizüngbatem aser chubar ki rongsen bener oadok; pai kechisarena ajak bener oadok. Pai ano Solomoni yangluba jongtem bener oadok.

¹⁰Aser Rehoboam chubai item melena yongmenyin jongtem yanglu, aser itemji chubar ki kishi anüker bangdakpur ket nung agütsü.

¹¹Aser kwiben chubaji KIBUBA kidangi odir, tanüker jagi itemji arua bener oli, aser meyipa tanüker taktang jagi bener aruli asü.

¹²Kodang pai pa sasa ajemalua aküm, KIBUBA terasabai, oda pa meshimeshiabo mesamatsü aser Yihuda nung tia tajungba liasü.

¹³Anungji Rehoboam chubai pa sasa Yirusalem nung akangshi aser chuba Rehoboam pai chubatsü tenzükdang küm lir ka liasü, aser pai Yirusalem nung küm tertenet chuba; iba yimti KIBUBAi Israel kidong ajak nungi pa tenüng yangji ayutsü shimteta liasü. Tetsü tenüng Naama, Ammontsür liasü.

¹⁴Aser pai tamajung inyak, kechiyong pai KIBUBA bushitsü pa mulungi mait.

¹⁵Tang Rehoboam mapa tetenzük nungi tatem tashi, itemji ainkar Shemaia aser Iddo ainkar putipuyang kaket nung zülua mali no? Yeroboam aser Rehoboam tsüngda nung rara maneni liasü.

¹⁶Aser Rehoboam pa tsürabur den mejang aser Dawid yimti nung arem; aser par jabaso Abija pa melen chuba.