Read njo 2 PUTIPUYANG 13 Bible Online

2 PUTIPUYANG 13 - njo bible

2 PUTIPUYANG 13

¹Yeroboam chuba küm ter-ti buba nung Abijai Yihuda nung chubatsü tenzük.

²Pai Yirusalem nung küm asem tashi chuba. Tetsü tenüng Mikaia, Gibea nunger Uriel jala liasü.

³Tang Abija aser Yeroboam tsüngda nung rara liasü. Abijai tasü tait arüshir telok anir tongbangi ao; teshimtet nübu meyi noklang pezü; aser Yeroboami tashi tulu temeranger meyi noklang ti anir pa anema tongbang noktak.

⁴Idangji Efraim tenem lima nung aliba Zemaraim tenem nung Abija noktak, aser ashi, “Kü dang angang, Oh Yeroboam aser Israel ajak!

⁵Israel KIBUBA Tsüngremi Israel madak chuba mapaji teti asoshi Dawid nem aser par chirtem nem tezüngzüktepba metsü, ka agütsü ta nenoki metettsü tim masü no?

⁶Aji saka Dawid chir Solomon tenzüker Nebat chir Yeroboami pei kibur anema noktak aser bangdak anema apuso;

⁷aser samesa nisung teseplep kari pa meketa sentep aser Solomon chir shisa agi meperiba Rehoboam anema apuso aser pai parnok anema menokdaktet.”

⁸“Tang nenoki Dawid chir ket nung KIBUBA yimli anema noktaktsü bilemer, kechiaser nenok telok tulu aser nenok nem Yeroboami hon nashi süngyanglu yanglutsüba nenok den lir.

⁹Nenoki KIBUBA putirtem, Aron chirtem, aser Levitem aridok aser tangar lima nübur mesüka nenok asoshi putirtem mayu no? Shibaisa nashi pungtu chanu ka mesüra san tepung tenet bener pei sasa bendanga agütsütsü arur kecha tsüngrem masü parnok putir ka makümer no?

¹⁰Saka onok asoshibo, KIBUBAji onok Tsüngrem lir, aser onoki pa metoktsü; onokbo Aron chirtemi aser Levitemi putir mapa agi KIBUBA dang tenzüker;

¹¹aser parnoki anepdang aser aonung shia tarongba tenla aser teronem tanang aronger, aser langbang temerük nung amtsük nangtena ayur, aser hon milendong nung milentemji aonung shia aronger, kechiaser KIBUBA onok Tsüngremi melaba onoki benshir; saka nenokibo pa toktsü.

¹²Ajiang, onok kolak nung onok den Tsüngrem lir, aser nenok anema tongbang jazüktsü putirtemi tongbang jangzü aputsü bena lir. Oh Israel chirtem, KIBUBA ne tsürabur Tsüngrem anema terara; kechiyong nenoki makoktsü.”

¹³Saka parnok madak tesülen nungi meketa Yeroboami arü amentsü yok; yamaji pa temeranger telok Yihuda tejaklen liasü, aser arümenertem parnok sülen liasü.

¹⁴Kodang Yihudai reprang, ajiang, tongbangji parnok jakdanga tesülena liasü; aser parnoki KIBUBA dang ayimten, aser putirtemi jangzü apu.

¹⁵Idangji Yihuda nisungtemi tongbang washi. Kodang Yihuda nisungtemi washi, Tsüngremi Abija aser Yihuda madang Yeroboam aser Israel ajak tamakok ngudaktsü.

¹⁶Israel nunger Yihuda jakdang jena ao, aser Tsüngremi parnok ket nung parnok agütsü.

¹⁷Abija aser par nisungtemi parnok jenti tepset; anungji Israel laoa tepsetba teshimtet meyi noklang pungu.

¹⁸Yamaji Israel nunger iba mapang nung arakmok, aser Yihuda nisungtemi akok, kechiaser parnoki KIBUBA par tsürabur Tsüngrem dak tamang ayu.

¹⁹Aser Abijai Yeroboam aria ao, aser pa nungi yimtitem agi, Bethel iba yimtitem dena aser Yeshana iba yimtitem dena, aser Efraim iba yimtitem dena.

²⁰Abija anogo nung Yeroboami pei tashi meyipa mangu; aser KIBUBAi pa dak azük, aser pa asü.

²¹Saka Abija tashi tuluba aküm. Aser pai kinungtsü terpezü agi, aser jabaso metsür ana aser jala tertrok liasü.

²²Tanüngba Abija mapa, pa jakla aser pai jembizükba, Iddo ainkar otsü nung zülua lir.