Read njo 2 PUTIPUYANG 14 Bible Online

2 PUTIPUYANG 14 - njo bible

2 PUTIPUYANG 14

¹Anungji Abija tebu nunger den mejang, aser parnoki Dawid yimti nung pa arem, aser par chir Asa-i pa melen chuba; pa tendak linük sünep sünepa küm ter liasü.

²Aser Asai KIBUBA pa Tsüngrem nükdang koba tajung aser shitak aji inyak;

³kechiyong pai bendanger tenladak aser tenem tekümlemdak agien, aser temeshi tongshitem raksatsü, aser Asherim ajemzüka yok;

⁴aser KIBUBA par tsürabur Tsüngrem bushitsü, aser ozüng aser temelaba inyaktsü mela.

⁵Ano Yihuda yimti ajak nungi pai tenem tekülemdak aser anü noksatem bener oadok; aser pa kübok yimliji anisüngzük liasü.

⁶Aser pai Yihuda nung mitsa yimtitem yanglu; kechiyong linükji süngjema liasü, aser item küm nung pa rara makai liasü; kechiaser KIBUBAi pa nem anisüngzük agütsü.

⁷Kechiyong pai Yihuda dang ashi, “Asenoki item yimti yangludi, aser itemji jara aser mitsabang, süngkhüm aser tarütangtsü agi meketbangdi; linükji ano asen meyong, kechiaser asenoki KIBUBA asen Tsüngrem bushi; asenoki pa bushi aser pai ajaklen asen nem anisüngzük agütsü.” Anungji parnoki yanglu aser azükaru.

⁸Aser Asa jongkok aser nü abener arishir telok ka liasü, Yihuda nungi meyi noklang asem; aser Benjamin nungi jong aser lijak abener, meyi noklang ana ser tir; item ajak tasü tait tashi tulu nisung liasü.

⁹Parnok anema Ethiopia nunger Zera arishir telok meyi noklang ka aser talungtsü noklang asem adok, aser Maresha tashi aru.

¹⁰Idangji pa den ajuruteptsü Asa ao, aser parnoki Maresha aser Zefatha lenten nung tongbang tareni noktak.

¹¹Asai KIBUBA pa Tsüngrem dang ayimtena ashi, “KIBUBA, na alema, tashi tulu aser tashi maiter tsüngda nung shinga mali; onok yariang. Oh KIBUBA ozü Tsüngrem, kechiyong onoki ne dak temulung alemer, aser ne tenüng nung iba telok anema onok arua lir, Oh KIBUBA, na ozü Tsüngrem, na anema item nisungi takok tungudaktsü.”

¹²Anungji KIBUBAi Asa aser Yihuda madang Ethiopia nunger akok; aser Ethiopia nunger jena ao.

¹³Asa aser pa den alirtemi parnok Gerar tashi aria ao; aser Ethiopia nunger kata taküm anünga mali tashi lao; kechiyong KIBUBA madang aser pa temeranger telok madang parnok sama; aser parnoki temakzükba oset jenti bener ao.

¹⁴Aser Gerar meketa yimti ajak parnoki amak; kechiyong KIBUBA tsübuba parnok madaki aru; aser parnoki yimti ajak amak; kechiyong temakzükba jenti item dak liasü.

¹⁵Parnoki kiset shiruru anüker sükitema amak, aser san jenti aser ut bener oadok, aser Yirusalemi shilang.