Read njo 2 PUTIPUYANG 15 Bible Online

2 PUTIPUYANG 15 - njo bible

2 PUTIPUYANG 15

¹Tsüngrem tanela Oded chir Azaria dangi aru; aser pai Asa den ajuruteptsü ao,

²aser pa dang ashi, “Nenoki kü dang angang, Asa, aser Yihuda aser Benjamin ajak; nenok KIBUBA den aliba mapang pa nenok den lir; aser nenoki pa bushira, nenoki pa angutsü; saka nenoki pa sentokra pai nenok sentoktsü.

³Tang mapang talang ka atangji Tsüngrem makai Israel liasü, aser sayutsü putir makai, aser ozüng makai liasü;

⁴saka kodang parnok timtem nung parnoki KIBUBA Israel Tsüngrem dangi meyip aser pa bushi, parnoki pa angu.

⁵Item mapang nung shiba odir mesüra shiba arudir pa tesünep maliasü, kechiyong alinük alir ajak makmakshishi tulu agi timtemdaktsü.

⁶Parnok anüka raksa, kini kin anema aser yimti-i yimti anema; kechiyong Tsüngremi parnok timtemtsü tapu tapu agi kangshi,

⁷saka nenok tasü ita liang, aser nenok teka tashi meiti teli; kechiyong nenok mapa ajangzüktsütsü.”

⁸Kodang Asai item o aser Oded ainkari shinba angashi, pa tasü ita aküm, aser Yihuda aser Benjamin lima ajak nungi, aser pai agiba Efraim tenem lima yimtitem nungi tesempatsütem endok; aser pai KIBUBA kilempok madang aliba KIBUBA tenladak tasen kümdaktsü.

⁹Aser Yihuda aser Benjamin ajak, aser Manase aser Simeon nungi parnok den semloka alirtem pai sentepdaktsü; kechiyong kodang parnoki KIBUBA Tsüngrem pa den lir ta ajitet Israel nungi nisung jenti pa dak semlok.

¹⁰Asa chubaba küm terpungububa ita asembuba nung parnok Yirusalem nung atenshi.

¹¹Parnoki temakzükba bener aruba nungi parnoki iba anogo nungji KIBUBA nem nashi noklang tenet aser san meyi tenet agi tenla.

¹²Aser KIBUBA par tsürabur Tsüngrem, parnok mulungjang ajak agi aser parnok tanela ajak agi bushitsü züngzüktep;

¹³aser shibaisa KIBUBA Israel Tsüngrem mebushilir, asangur chanu süaka tambur süaka, tebur süaka tetsür süaka südaktsütsü.

¹⁴Aser ola tulu agi, aser washiba agi, aser jangzü aser kornet jangzü apua parnoki KIBUBA dang azüngashi.

¹⁵Aser Yihuda ajaki tezüngzüktepba nungji pelatep; kechiyong parnoki parnok mulungjang ajak agi azüngashi, aser parnok tejangraba ajak agi pa bushi; aser parnoki pa angu; aser KIBUBAi parnok nem parnok meketa anisüngzük agütsü.

¹⁶Ano Asa chuba tetsü Maaka, chubatsür mesüdaktsütsü asoshi pai agien, kechiaser lai tesempatsü noksa Ashera asoshi yanglu; aser Asai la noksaji lepzüka yok, aser ibaji auyi kümdaktsü, aser aji Kidron ayongnu nung arong.

¹⁷Saka tenem tekümlemdakbo Israel nungi bener mao; aji saka Asa mulungjang pa anogo piyong shitak liasü.

¹⁸Tsüngrem kidangi tebui bendanga agütsüba oset, aser pai pei sasa bendanga agütsüba oset, taribi, hon aser marok-ausutem pai bener aru.

¹⁹Aser joko Asa chubaba küm semer-pungububa küm tashibo rara maliasü.