Read njo 2 PUTIPUYANG 17 Bible Online

2 PUTIPUYANG 17 - njo bible

2 PUTIPUYANG 17

¹Par chir Yehoshafati pa melen chuba, aser Israel anema tashi itshi.

²Aser mitsa yangluba Yihuda yimti ajak nung pai temeranger ayu, aser Yihuda lima nung, aser Efraim yimtitem koba tebu Asai agi, yangji temeranger tanüker telok ayu.

³Aser KIBUBA Yehoshafat den liasü, kechiaser pai tebu Dawid mezüng jajaba lenmang nung jaja, aser Baal tsüngrem mebushi;

⁴saka tebu Tsüngrem bushi, aser pa temelaba nung jaja, aser Israeli inyakba sülen mao.

⁵Anungji pa ket nung KIBUBAi yimli akangdaktsü; aser Yihuda ajaki Yehoshafat dangi sempet bener aru aser pa rongsen aser khonang jenti liasü.

⁶Aser KIBUBA lenmang nung pa mulungjang tasü ita liasü; aser talisa Yihuda nungi pai tenem tekümlemdak aser Asherim agiendaktsü.

⁷Ano pa chubaba kümsembuba nung tanishirtem, Benhail,Obadia, Zekaria, Nethanel, aser Mekaia Yihuda yimtitem nung tesayur mapa atema yok,

⁸aser parnok den Levi nunger Shemaia, Nethanea, Zebadia, Ashael, Shemiramot, Yehonathan, Adonija, Tobija aser Tob-adonija; item Levi nunger den Elishama aser Yehoram putirtem yok.

⁹Aser parnoki KIBUBA ozüng kaket nungi Yihuda yimtitem ajaklen sayu, parnoki Yihuda yimti ajak sema nüburtem dang sayu.

¹⁰Yihuda meketa aliba yimli ajak madak KIBUBA tsübuba liasü, anungji Yehoshafat anema parnoki merara.

¹¹Aser Filistia nunger karibo Yehoshafat nem sempet bener arutsü, aser putisü asoshi taribi agütsü; aser Arabia nungeria pa nem san tepung meyi tenet ser noklang tenet aser nabong tepung meyi tenet ser noklang tenet bener aru.

¹²Yehoshafat kanga ulua aküm; aser pai Yihuda nung lungki aser terizüngdak yimtitem ulura yanglu.

¹³Aser Yihuda yimtitem nung pa mapa jenti liasü, aser Yirusalem nung tashi tulu sarirtem liasü.

¹⁴Aser tebu semchirtem züngdangba yamai liasü; meyirijang madak tanishir Yihuda; Adna arkotong, aser pa den tashi tulu rarar nisung meyi noklang asem;

¹⁵pa den atongbaji Yehohanan, arkotong, aser pa den meyi noklang ana ser tir;

¹⁶aser pa den atongba Amasia, Zikhri chir, shibai pei sasa KIBUBA nem mulungbena agütsü; aser pa den temeranger nisung meyi noklang ana;

¹⁷Benjamin nungi Eliadas temeranger nisung ka, pa den lijak aser jong abener meyi noklang ana;

¹⁸aser pa den atongba Yehozabad den meyi noklang ka ser tir raratsü terenem.

¹⁹Mitsa yangluba yimtitem nung Yihuda ajak nung chubai toktsüba dak alaka itemi chubar mapa nung liasü.