Read njo 2 PUTIPUYANG 18 Bible Online

2 PUTIPUYANG 18 - njo bible

2 PUTIPUYANG 18

¹Tang Yehoshafat rongsen aser tetushi jenti liasü; aser pai Ahab den lungjem.

²Aser küm ishika lir pa Ahab dangi Samariai alu. Aser Ahabi san aser nashi jenti pa asoshi, aser pa den alir asoshi tepset, aser pa den Ramoth-Gilead anema atutsü ajongmeso.

³Aser Israel chubai Yihuda chuba Yehoshafat dang ashi, “Na kü den Ramoth-Gileadi atutsü asü?” Pai pa dang langzü, “Ni na ama dang, aser kü nübur ne nübur ama dang lir; aser onok ne den rara nung adentsü.”

⁴Yehoshafati Israel chuba dang ashi, “Ni mepishir, tanü KIBUBA O asoshi asüngdangang.”

⁵Idangji Israel chubai putirtem sentepdaktsü, nisung noklang pezü liasü, aser pai parnok dang ashi, “Onok Ramoth-Gilead tongbangi atutsü asü mesüra ni atasatsü?” Aser parnoki ashi, “Tuang, kechiyong Tsüngremi chuba ket nung aji agütsütsü.”

⁶Saka Yehoshafati ashi, “KIBUBA ainkar tanga ka asenoki asüngdangtsü kata mali no?”

⁷Israel chubai Yehoshafat dang ashi, “KIBUBA dang asüngdangtsü asoshi ano nisung ka, Imla chir Mikaia lir; saka ni pa sempar, kechiyong pai kodanga kü indang tajung meshinür, saka teti tamajung dang shinür.” Yehoshafati ashi, “Chubai yamai teshima.”

⁸Idangji Israel chubai tanishir ka jar ashi, “Imla chir Mikaia yakta anir arung.”

⁹Tang Israel chuba aser Yehoshafat chuba, sobutsü sobur, chuba menden nung mena liasü; aser Samaria süngkhümi ailen motsüngnem nung parnok mena liasü; aser parnok madang ainkar ajaki shina liasü.

¹⁰Aser Kenaana chir Zedekiai pei sasa merang agi tezü yanglua ashi, “Yamai KIBUBAi ashir, Item yagi nenoki Siria nunger mesamatsü tashi nenoki nungtoktsü.”

¹¹Aser ainkar ajaki yamaji shina ashi, “Ramoth-Gileadi tuang aser takok nguang; KIBUBAi aji chuba ket nung bendanga agütsütsü.”

¹²Mikaia ajai aoba osang abensangi ashi, “Ajiang, ainkar ajaki chuba asoshi o tajung kasa dang lir; ne o-a parnok o ama sang, aser ojung jembiang.”

¹³Saka Mikaiai ashi, “KIBUBA taküm ali nungji, kü Tsüngremi kechi ashir, aji ni jembitsü.”

¹⁴Kodang pa chuba dangi aru, chubai pa dang ashi, “Mikaia, onok Ramoth-Gileadi rarai atutsü asü mesüra ni atasatsü?” Aser pai langzü, “Tuang aser takok nguang; parnok ne ket nung agütsütsü.”

¹⁵Saka chubai pa dang ashi, “Ni kwiben ne dang KIBUBA tenüng nung atangji dang jembiang ta na azüngashia shidaktsütsü?”

¹⁶ Aser pai ashi, “Ni Israel ajak tenem nung sannüker mali ama prokshia nguogo; aser KIBUBAi ashi, ‘Itemi kibur mali, yimjung nung pei kidang ajak meyipa odakjang.’ ”

¹⁷Israel chubai Yehoshafat dang ashi, “Ni ne dang kü indang pai tamajung alema kecha tajung meshintsü ta meshika ma?”

¹⁸Aser Mikaiai ashi, “anungji KIBUBA O angang, ni KIBUBA chuba menden nung mena, aser kotaker telok ajak pa tajichi aser tabelen noktaka nguogo;

¹⁹aser KIBUBAi ashi, ‘Shibai Israel chuba Ahab, pa Ramoth-Gilead nung tuagi laodaktsütsü asoshi mesüzüktsü.’ Aser kati ka dang ashi, aser tangar kati tanga ka dang ashi.

²⁰Idangji tanela ka tejakleni arua KIBUBA madang noktaka ashi, ‘Ni pa mesüzüktsü.’ Aser KIBUBAi pa dang ashi, ‘Kechi tasa agi?’

²¹Aser pai ashi, ‘Ni aotsü, aser par ainkartem tebang ajak nung tiyazü tanela enoktsütsü.’ Aser pai ashi, ‘Nai pa mesüzüktsü, aser nai takok angutsü; oang aser yamaji inyakang.’

²²Anungji tang ajiang, KIBUBAi item ne ainkar tebang nung tiyazü tanela enoktsüogo; KIBUBAi ne indang tamajung jembiogo.”

²³Idangji Kenaana chir Zedekia anasa aru aser Mikaia tenibung nung züka ashi, “KIBUBA tanelai koba lenmangi kü dak nungi ne dangi jembitsü ao?”

²⁴Mikaiai ashi, “Ajiang, ne sasa atsüka alitsü asoshi taktang telungbai aiba anogo nung nai angutsü.”

²⁵Aser Israel chubai ashi, “Mikaia pua arung, aser yimti nung governor Amon dangi aser chuba chir Yoas dangi anir oang;

²⁶aser shiang, yamai chubai ashir, ‘Iba nisung tepuokdak yuang, aser ni yimjung nung meyipa maru tashi, chi terara aser tzü terara agi mesüang.’”

²⁷Mikaiai ashi, “Na yimjung nung meyipa arura KIBUBAi kü den mejembi. Aser pai ashi, Nenok nübur ajak angang.”

²⁸Anungji Israel chuba aser Yihuda chuba Yehoshafat Ramoth-Gileadi atu.

²⁹Aser Israel chubai Yehoshafat dang ashi, “Ni kü sasa miimshia tongbangi aitsü, saka nabo ne sobutsü sobuang.” Aser Israel chubai pa sasa miimshia sobutsü sobu; aser parnok tongbangi ao.

³⁰Tang Siria chubai pa talungtsütem madak arkotongtem dang mela-a ashi, “Tila mesüra tulu den terara, saka Israel chuba den dang rara-ang.”

³¹Aser kodang talungtsü arkotongtemi Yehoshafat ngua parnoki ashi, “Ibai Israel chuba lir.” Anungji pa anema raratsü parnoki meyip, aser Yehoshafati ayimten, aser KIBUBAi pa yari, aser Tsüngremi parnok pa nungi aenshidaktsü,

³²kechiyong kodang talungtsütem arkotongi aji Israel chuba masü ta metet, pa aria aoba nungi parnoki meyip.

³³Saka nisung kati pei lijak züzüa ka atsüa aru aser Israel chuba dak tapu teloktep nung kaloktsü; anungji pai pa talungtsü anisang dang ashi, “Meyipang, aser tongbang nungi ni bener oang, kechiyong ni yiruogo.”

³⁴Aser iba anogo tongbang sashia aküm, aser Israel chubai pa talungtsü nung tua mener Siria nunger tsütsü shir akpur meshi tashi ata-a ali; aser anü talui pa asü.