Read njo 2 PUTIPUYANG 19 Bible Online

2 PUTIPUYANG 19 - njo bible

2 PUTIPUYANG 19

¹Yihuda chuba Yehoshafat Yirusalem nung par kidangi yimjung nung shilang.

²Aser ainkar Hanani chir Yehu pa lenji ao, aser Yehoshafat chuba dang ashi, “Nai tamajunger yaritsü, aser KIBUBA sempar ang meimtsü no? Iba mapang asoshi KIBUBA madang nungi ne madak terasaba arua lir.

³Aji saka ne dak tajung kar ni ngua lir, aji, nai linük nungi Ashera endoktsüogo, aser Tsüngrem bushitsü ne mulungjang agüja lir.”

⁴Yehoshafat Yirusalem nung ali, aser pai Beersheba nungi tenem lima Efraim tashi nisungtem rongnung oli aruli ta senzüa, aser parnok tanaben par tsürabur Tsüngrem, KIBUBA dangi anir aru.

⁵Aser atsübanga aliba Yihuda yimti ajak linük nung o bendangertem dang ashi,

⁶“Nenoki kechi inyaker shisadangang; kechiyong nisung asoshi masü, saka KIBUBA asoshi nenoki o bendanger, aser pa nenok den o bendangba nung lir.

⁷Anungji tang KIBUBA tsübuba nenok den liang; kümdangang, kechiyong asen Tsüngrem dak tai menaba, mesüra nisung jak reprangba, mesüra süpokrem agiba kecha mali.”

⁸Ano Yehoshafati Yirusalem nung Levi nunger aser putir aser Israel kidong tambur kar KIBUBA asoshi aser mangatettep nung obendang agütsütsü shim. Aser Yirusalem nung arua parnok ali.

⁹Aser pai parnok dang mela-a ashi, “Yamai nenoki temulung ajak agi, temulung lemteta, aser KIBUBA tsübuba nung inyaktsüla.

¹⁰Kodangsa nenok adianutem parnok yimli nung alirtem nungi azü tokshiba indang, ozüng mesüra temelaba indang, telatet ozüng mesüra tatakzük ozüng indang, nenok dangi rongronga arudir, oda KIBUBA madang parnok tai memenatsü aser nenok madak aser parnok madak terasaba marutsü nenoki parnok dang tekümdangtsü sayuang; yamaji inyakang aser nenok tai memenatsü.

¹¹Aser ajiang, KIBUBA mapa ajak nung nenok madak puti-unger Amaria lir; aser Ishmael chir Zebadia, Yihuda kidong yimsüsür chubar mapa ajak nung ketdang lir; aser nenok jakdang ketdangpursa Levi nungeri tenzüktsü. Tasü ita inyakang, aser tajung pur den KIBUBA liangma.”