Read njo 2 PUTIPUYANG 2 Bible Online

2 PUTIPUYANG 2 - njo bible

2 PUTIPUYANG 2

¹Tang Solomoni KIBUBA tenüng asoshi tenla ki ka aser pa asoshi chuba ki ka yanglutsü shisatet.

²Aser khu abentsü nisung meyi neter aser tenem lima nung lung atsüngtsü meyi tir, aser parnok madak reprangtsü meyi asem noklang trok, Solomoni lemzüktsü.

³Solomoni Tair chuba Hiram dangi o yok, “Nai kübu Dawid den benshiba aser pa sasa talisa ki ka yanglutsü cedar süng pa dangi yokba ama, yamaji kü den benshiangma.

⁴Ajiang, Israel asoshi teti benshitsü melaba ama, pa madang teronem tanang liangmesen arongtsü asoshi, aser KIBUBA Tsüngrem madang ayuba amtsük maneni tenlatsü aser anepdang aser nikongdang tarongba tenla asoshi, amungnütem aser ita lanutem aser KIBUBA ozü Tsüngrem asoshi benjongbentsü nung pa nem aji bendanga agütsütsü asoshi ni ki ka yanglutsüba lir.

⁵Ni yanglutsü aliba kiji tulu alitsü, kechiyong ozü Tsüngremji tsüngrem ajak madak nungi tuluba lir.

⁶ Saka anüng, oda tematiba anüngia pa masem nungji, shibai pa nem ki ka yanglutsütsü akok? Pa madang liangmesen arongdak ka dak alaka pa asoshi ki ka yanglutsütsüba nia shiba aka?

⁷Anungji tang hon, taribi, yongmenyin, aser merang, aser nakrema meremba, azü sentsü, aser anüng sentsü angdong ibala inyaker, ano noksa amenoktsü ashiba, Yihuda nung aser Yirusalem nung kü den alir tashirtem shirnok kübu Dawidi yua lir parnok den alitsü tetangshi nisung ka kü dangi yokang.

⁸Ano kü dangi cedar süng, cypress süng, aser algum süngtsük Lebanon nungi yokang, kechiyong ne tenzükertemi Lebanon nung süngtsük koma arangtsü aji ni meteter. Aser ne tenzükertem kü tenzükertem den alitsü,

⁹oda ni asoshi süngtsük jenti bendentsü, kechiyong ni yanglutsü aliba kiji tulu aser tesüngmangtsü alitsü.

¹⁰Aser ajiang ne tenzüker süng alenertem nem ni chiyungtsü tatak meyi metsü, barley tsük tatak meyi metsü, yi gallon meyi metsü, aser totzü mori tatakzük meyi metsü agütsütsü.”

¹¹Idangji Tair chuba Hirami shiti ka nung langzüa pai Solomon dangi yok: “KIBUBAi pei nübur meimba yong pai na parnok madak chuba kümdaktsü.”

¹²Hirami ano ashi, “Israel Tsüngrem KIBUBA temoatsü süang, shibai anüng aser alima yanglu, shibai Dawid chuba nem shisa taka jabaso ka agütsü, pei shisatsü amshitetba aser tangatetba sempet agütsüba agi, shibai KIBUBA asoshi tenla ki ka, aser pei asoshi chuba ki ka yanglutsü.”

¹³“Tang ni tetangshi nisung ka, tangatetba sempet aliba, Huram-abi,

¹⁴Dan jala rongnung tetsür ka jabaso yokogo, aser tebuji Tair nisung. Hon, taribi, yongmenyin, merang, lung, süng, aser nakrema meremba, anüng sentsü, aser azü sentsü angdong aser kümpa angsem, aser noksa amenokba mapa tapu ajak inyaktsü, aser pa nem inyaktsü agütsüba tapu ajak inyaktsü akokba, ner mapa mongin nisungtem den, kü kibur Dawid, nebu, par mapa mongintem den inyaktsü pai angazüka lir.

¹⁵Tang aji asünung wheat aser barley tsük, totzü aser yi, koba kü kiburi jembiogo; pai pa tenzüker dangi yokdakjang;

¹⁶aser kwika tenüngdaktsü Lebanon nungi onoki lensüktsü, aser aji rong agi tzüyim nung Yopai ne dangi bener arutsü, angji nai aji Yirusalemi bener atutsü.”

¹⁷Idangji tebu Dawidi parnok tenüng züluba ama Israel lima alir bendanger ajak Solomoni tenüng zülu; aser meyi noklang ka tenemer asem ser noklang trok liasü.

¹⁸Parnok meyi neter nem pai khu abentsü agütsü, meyi tir tenem lima nung lung angentsü, aser nisungtem mapa inyakdaktsütsü tanishir meyi asem ser noklang trok shim.