Read njo 2 PUTIPUYANG 20 Bible Online

2 PUTIPUYANG 20 - njo bible

2 PUTIPUYANG 20

¹Iba sülen Moab nunger, Ammon nunger, aser parnok den Meun nunger, Yehoshafat anema tongbang rarai aru.

²Aser kar arua Yehoshafat dang ashi, “Na anema telok tulu ka tzüyim atena or Siria nungi arudar; aser ajiang, parnok Hazazon-tamar, aji Engedi, nung lir.”

³Aser Yehoshafati tsübu, aser pa sasa KIBUBA bushitsü apuso; aser Yihuda ajonga nung lumitsü ayimoktsü.

⁴Aser KIBUBA nungi teyari bushitsü asoshi Yihuda külemi sentep; oda Yihuda yimti ajak nungi parnoki KIBUBA bushitsü aru.

⁵Yihuda aser Yirusalem mungdang nung, KIBUBA kidang, kilempok nung Yehoshafati noktak;

⁶aser ashi, “Oh KIBUBA, ozü tsürabur Tsüngrem, kotak nung na Tsüngrem masü no? Aser kintem yimli ajak madak na yimsüsür masü no? Ne ket nung ain aser tashi lir, anungji shingai na anema menoktakteter.

⁷ Oh ozü Tsüngrem, iba linük alirtem ne nübur Israel madang aridoker ne tembar Abraham metsü nem teti asoshi agütsü masü no?

⁸Aser parnok yangji ali, aser ne tenüng asoshi iba nung temeshidak ka yanglua ashi,

⁹‘Onok madak lendong arura, nok, obendangba, tashitak wara, mesüra ayawara arura, onoki iba ki madang aser ne madang noktaktsü, kechiyong iba kidang ne tenüng lir, aser onok timtem nung ne dang ayimtentsü, aser nai angashitsü aser nai kümzüktsü.’

¹⁰Aser tang Amon, Moab, Seir tenem nisungtem ajiang, shirnok Ijip nungi arudang nai Israel nem memakdaktsü aser parnoki paidok aser mesamatsü.

¹¹Ajiang, nai onok nem senmangtsü agütsüba, ne meyong nungi onok aridoktsü arua onok nem parnoki ajangzüktsüdi asür.

¹²Oh ozü Tsüngrem, nai parnok madak o mebendangtsü no? Kechiyong onok anema aruba iba telok tulu anema onok tashi maka. Kechi inyaktsü onoki memetet, saka onok tenük ne madak lir.”

¹³Yihuda ajak KIBUBA madang, parnok tilatem, kinungtsütem, aser parnok chirnur dena noktak.

¹⁴Idangji sentepa alir rongnung Zekaria chir Yahazeil, Asaf chirtem Levi nunger madaki KIBUBA tanela aru.

¹⁵Aser pai ashi, “Angang, Yihuda aser Yirusalem alir ajak, aser na Yehoshafat chuba. Yamai KIBUBAi nenok dang ashir, nenok tetsübu, mesüra iba telok tulu asoshi temulung makai teli; kechiyong tongbangji nenok meyong masü, saka KIBUBA meyong lir.

¹⁶Asüng nenoki parnok anema luang; ajiang, parnok Ziz leni atuba lenmangi arutsü, aser Yeruel arem anüdoklen lenten tatembang nung nenoki parnok angutsü.

¹⁷Iba tongbang nung nenoki raratsü tenüngdaktsü malitsü; pei noktakdak liang, marakzüi noktakang, aser nenok den KIBUBA tekümzükji ajiang, Oh Yihuda aser Yirusalem; tetsübu, mesüra temulung makai teli; asüng parnok anema oang; kechiyong KIBUBA nenok den lir.”

¹⁸Yehoshafati pei tejak alilen mechioka alu; aser Yihuda aser Yirusalem alir ajak KIBUBA madang apudaka külem.

¹⁹Levi nunger, Kohat chirtem, Kora chirtemi ola tashi agi KIBUBA Israel Tsüngrem tenüng asangtsü noktak.

²⁰Parnok anepdang yakta shishi aser Tekoa aremi ao; aser parnok aodang Yehoshafat noktaka ashi, “Kü dang angang, Oh Yihuda aser Yirusalem alirtem; KIBUBA nenok Tsüngrem dak amangang, yangji nenok kümzüktsü; pa ainkar dak amangang, yangji nenok takok ngudaktsütsü.”

²¹Aser pai nisungtem den o tongteper külen, temeranger telok jakdang, temeshi sobutsü sobur KIBUBA dang ken atentsü aser tenüng sanga, “KIBUBA nem tenüngsang agüjang, kechiyong pa yimlibilem teti alir,” ta parnok aodang ashitsü pai shimtet,

²²aser kodang parnoki ken atentsü aser tenüng asangtsü tenzük, parnok anema aruya aliba Amon, Moab, aser Seir tenem chirtem anema KIBUBAi arü mena atadaktsü, angji parnok tongbang chirepdaktsü.

²³Kechiyong Ammon aser Moab chirtemi Seir tenem alirtem anema noktak, parnok ajonga tepsettsü aser samatsütsü asoshi; aser kodang parnoki Seir alirtem temshia tatem kümdaktsütsü nisung shiai kati ka, katia ka samatsütsü yari.

²⁴Kodang Yihuda arem mitsa jagi aru, parnoki telokti tsütsü reprang; aser ajiang, parnokji ali nung laoa aliba tasü mangtem liasü, kata jena mao.

²⁵Kodang Yehoshafat aser par nisungtemi parnok nungi temakzükba rongsen agitsü aru, aser parnoki nashi jenti den osettem, süoshi aser senti osettem koba parnoki pei asoshi joko mebenmatsüsa benden; aser oset benden dang parnok asemnü tashi liasü; aser osettemji onsara liasü.

²⁶Aser pezünübuba nung parnoki parnok sasa Beraka lenten nung sentep; kechiyong parnoki yangji KIBUBA tushi; aji asünung iba linük dang tanü tashi Beraka lenten ta ajar.

²⁷Idangji parnok Yirusalemi tanaben pelatepa aotsü, parnok jakdang Yehoshafat tamaser Yihuda aser Yirusalem nisung shia meyipa ao; kechiyong KIBUBAi parnok tsükchir madak parnok pelatepdaktsü.

²⁸Aser parnok Yirusalemi KIBUBA kidangi tawaba kongki, tzürang kongki aser jangzü bener aru.

²⁹Aser kodang Israel tsükchirtem anema KIBUBAi rara ta angashi, alinük chuba yimli ajaki Tsüngrem tsübu.

³⁰Anungji Yehoshafat yimlibo yimjung nung liasü; kechiyong pa meketa Tsüngremi yimjung agütsü.

³¹Yehoshafati Yihuda nung chuba; aser pa chubatsü tenzükdang küm semer pungu liasü; aser Yirusalem nung pai küm metsür pungu chuba; aser tetsü tenüng Azuba, Shilhi jala liasü.

³²Aser pai tebu Asai jajaba lenmang nung jaja, aser KIBUBA nükdang kechi tajung aji inyaka iba nungi pila-a mao.

³³Aji saka tenem tekümlemdakjibo bener mao; mesüra nisungtemi par tsürabur Tsüngrem dak temulung agüja maliasü.

³⁴Tang Yehoshafat mapa, tetenzük nungi tatem tashi Hanani chir Yihu otsü, koba Israel chubatem otsü nung enoka lir, yangji item zülua lir.

³⁵Iba sülen Yihuda chuba Yehoshafat Israel chuba Ahazia shibai mejungi inyak, pa sasa pa den aden.

³⁶Aser pai pa den Tarshisi aotsü rong yangluba nung aden; aser parnoki Eziongeber nung rongtemji yanglu.

³⁷Idangji Maresha nunger Dodavahu chir Eliezeri Yehoshafat anema shina ashi, Ahazia den nai ne sasa aden nungji, KIBUBAi ne mapa nung teraksa adokdaktsütsü. Aser rongtemji raksadok, aser parnok Tarshisi moutet.