Read njo 2 PUTIPUYANG 21 Bible Online

2 PUTIPUYANG 21 - njo bible

2 PUTIPUYANG 21

¹Yehoshafat tebu nunger den mejang, aser Dawid yimti nung tebu nunger den arem; aser par chir Yehoram pa melen chuba.

²Pa tenu nunger Yehoshafat chirtem liasü; Azaria, Yehiel, Zekaria, Azaria, Maikel aser Shefatia: ya ajak Israel chuba Yehoshafat chirtem liasü.

³Aser parnok tebui parnok nem sempet tulu, taribi, hon, aser Yihuda nung jara yoka aliba yimtitem dena agütsü; saka yimlijibo pai Yehoram nem agütsü, kechiaser pa mezüng jabaso liasü.

⁴Tang kodang Yehoram tebu yimli manung ain, aser pa sasa tashi ita aküm, pai tenu nunger ajak aser Yihuda tongtipur kar nok agi lepset.

⁵Yehoram chubatsü tenzükdang küm semer ana liasü; aser pai Yirusalem nung küm ti tashi chuba.

⁶Aser Ahab kinungeri inyakba ama, pai Israel chubatem lenmang nung jaja, kechiyong pa kibutsü asütsü Ahaber jala agi; aser KIBUBA tsüngdang kechi majung aji pai inyak.

⁷ Aji saka KIBUBAi Dawid kidong mesamatsü, kechiaser pai Dawid den tezüngzüktepba ka yanglua, aser pai pa nem aser par chir nem teti milen ka agütsütsü nangzüka liasü.

⁸ Pa tendak Edomi Yihuda yimli anema apuso, aser par chuba ka ayu.

⁹Idangji Yehorami par arkotongtem aser talungtsütem pa den anir ajanga ao; aser aonung pa shishi, aser pa meketa aliba Edom nunger, aser talungtsü madak arkotong tepset.

¹⁰Anungji tanü tashi Yihuda yimli anema Edomi noktaka lir. Iba mapang nungji Libnaia pa yimli anema noktak, kechiaser pai tebu nunger Tsüngrem, KIBUBA senzüka toktsü.

¹¹Talisa, pai Yihuda tenem lima nung tenem tekülemdak yanglu, aser Yirusalem alirtem jabujaria kümdaktsü, aser Yihuda mashileni anir ao.

¹²Aser Elija ainkar nungi pa dangi shiti ka arua ashi, “Yamai KIBUBA, nebu Dawid Tsüngremi ashir, Nebu Yehoshafat tsüngsü nung mesüra Yihuda chuba Asa tsüngsü nung nai mejaja nungji,

¹³aser Israel chubatem tsüngsü nung jaja nungji, aser Yihuda o Yirusalem alirtem Ahab kinungeri inyakba mesüka, jabujaria odaktsü nungji, aser nebu chirtem ne dang nungi tajungba aliba nenu nunger nai tepset nungji;

¹⁴ajiang, KIBUBAi ne chirtem, ne kinungtsütem, aser na akaba ajak dak temerenshi tulu ka agi merenshitsü;

¹⁵aser ne sasa tashitak tamajung ka ne tepok tashitak, oda anogo shia tashitak agi ne poknüng madok tashi merenshitsü.”

¹⁶Yehoram anema KIBUBAi Filistia nunger, aser Arab nunger, Ethiopia nunger anasa alirtem ajungmesoa ain adokdaktsü;

¹⁷aser Yihuda anema parnok atu, aser rakpoka ajagi ait, aser chubar kidang aliba rongsen ajak bener oadok, par jabasotem aser kinungtsüa dena; aji asünung tanubusang Ahazia dak alema pa jabaso kata anünga maliasü.

¹⁸Aser ya ajak sülenji KIBUBAi pa tepok nung kodanga manepba tashitak ka temdaktsü.

¹⁹Mapang tatong nung, küm ana lir külen, tashitak agi pa poknüng sazüka alua, tekangshi tulu nung asü. Tebu nunger asoshi mi apuba ama par nüburi pa atema tushia mi mapu.

²⁰Pa chubatsü tenzükdang küm semer ana liasü, aser pai Yirusalem nung küm ti chuba; aser shingaia mesasai pa pila-a ao; aser parnoki pa Dawid yimti nung arem, saka chubatem leper nung marem.