Read njo 2 PUTIPUYANG 22 Bible Online

2 PUTIPUYANG 22 - njo bible

2 PUTIPUYANG 22

¹Yirusalem nung alirtemi par chir tanubusang Ahazia pa melen chuba kümdaktsü; kechiyong nisung Arabia nunger den arur yimmakertemi tambulenbo ajak tepsetadok. Anungji Yihuda chuba Yehoram jabaso Ahaziai chuba.

²Pa chubatsü tenzükdang Ahaziai küm lir ana liasü; aser tetsü tenüng Omri jala Athalia liasü.

³Pai Ahab kinunger tsüngsü nung jaja; kechiyong tamajung inyaktsü pa tetsüi ajungshia liasü.

⁴Aser Ahab kinunger amaji, KIBUBA madang kechi majung aji pai inyak; kechiyong tebu sür külenbo, pa samatsüsa, pa sayurtemji parnok liasü.

⁵Pai ano parnoki sayuba sülen jaja, aser Israel chuba Ahab chir Yoram den, Ramoth-Gilead nung Siria chuba Hazael anema raratsü ao; aser Siria nungeri Yoram yirutsü.

⁶Aser Siria chuba Hazael anema pai raradang parnoki pa dak Rama nung yirutsüba zübu Yezreel nung anebtsü pa meyipa ao. Aser Yihuda chuba Yehoram chir Azaria Yezreel nung Ahab chir Yoram semdangi alu, kechiaser pa shiranga liasü.

⁷Tang Ahazia samatsübaji, pai Yoram dangi aoba agi, Tsüngrem nungi liasü; kechiyong kodang pa arua liasü, pai Nimshi chir Yehu anema Yehoram den ao, shibai Ahab kinunger leptokadoktsü KIBUBAi shina liasü.

⁸Kodang Yehui Ahaber kibong madak tebendangba inyaka liasü, pai Yihuda tongtipur, aser Ahazia tenur chirtemi, Ahazia tenzüka angu, pai parnok tepset.

⁹Aser pai Ahazia bushi, aser pa Samaria nung atsüka lia apu, aser parnoki pa Yehu dangi bener arua tepset; aser parnoki pa arem, kechiyong parnoki ashi, “Pa Yehoshafat semchir lir, shibai pa mulungjang ajak agi KIBUBA bushi.” Aser Ahazia kinungeri chuba yimliji sota ayutsü tashi mali asü.

¹⁰Tang Ahazia tetsü Athaliai lar chir süogo ta angashidang, lai arameso, aser Yihuda kidong chubar metsü ajak tepset.

¹¹Saka chubar jala Yehoshafati Ahazia jabaso Yoas agienadok aser tetepsettsü aliba chubar jabasotem nungi paji bener oadok, aser lai pa aser pa bentsülaji taktang ka nung ayu. Yamaji putir Yehoiada tebutsü, (kechiyong la Ahazia teyi liasü,) Yehoram chubar jala, Yehoshafati pa Athalia nungi miima ayu, anungji lai pa metepset.

¹²Aser pa parnok den Tsüngrem kidang küm trok tashi miima liasü; aser Athaliai linük madak chuba.