Read njo 2 PUTIPUYANG 23 Bible Online

2 PUTIPUYANG 23 - njo bible

2 PUTIPUYANG 23

¹Küm tenetbuba nung Yehoiadai pei sasa tashi itshi, aser noklang madak tanishir, Yeroham chir Azaria, Yehohanan chir Ishmael, Obed chir Azaria, Adaia chir Maaseia, aser Zikri chir Elishafat, den züngzüktep.

²Aser parnok Yihuda ajakleni oa aser Yihuda yimti ajak nungi Levi nunger aniten, aser Israel tebu semchir tambutem aniten, aser parnok Yirusalemi aru.

³Aser Tsüngrem kidang tesenteper ajaki chuba den tezüngzüktepba ka yanglu. Aser pai parnok dang ashi, “Ajiang, Dawid chirtem indang KIBUBAi jembiba amato, chubar chiri yakta chubatsü.

⁴Nenok inyaktsü mapa ya; nenok putirtem aser Levi nunger shirnok amungnü teinyaktsü mapa temer arudir, shilem asem nung kabo kikümbang anüktsü,

⁵aser shilem asem nung ka Kimung Süngkhüm nung alitsü, aser nisung ajak KIBUBA kilempok alitsü,

⁶Putirtem aser tenzükertem Levi nunger dak alema shinga KIBUBA kidangi teidaktsü; parnokbo aitsü akok, kechiyong parnok temeshi lir, saka nisung ajaki KIBUBAi melaba benshitsüla.

⁷Levi nunger nisung shia pei nok o nü bener chuba meketa alitsü; aser shibasa aitdir lepsettsü. Pa kodang aitdir, aser kodang adokdir, nenok chuba den liang.”

⁸Levi nunger aser Yihuda ajaki putir Yehoiadai melaba ama ajak inyak. Parnok shiai, shirnok amungnü nung mapa atemtsü, shirnok amungnü nung mapa tenzüktsü, parnok denji pei nisungtem anir aru; kechiyong putir Yehoiadai telemsaji senshia meyoki liasü.

⁹Aser putir Yehoiadai noklang madak tanishirtem nem nü, jongkok aser jongtem, Dawid meyong Tsüngrem kidang aliba bendanga agütsü.

¹⁰Aser pai nisung shia pei ket nung nok o nü bener, ki tajichilen nungi ki tabelen tashi, chuba meketa, tenladak aser ki anasa toktsü.

¹¹Idangji parnoki chubar chir anir adok, aser pa dak chuba korang semtsü, aser pa nem kuliji agütsü, aser pa chuba kümdaktsü; aser Yehoiada aser pa chirtemi pa dak totzü mezütsü; aser parnoki ashi, “Tsüngremi chubaji kümzükang.”

¹²Kodang Athaliai nisung asümtepba aser chuba tenüng asangba ola angashi, lai nisungtem dangi KIBUBA kidangi aru;

¹³lai reprang, aser ajiang, chubaji pei tongshi anasa lenjang nung noktaka ali, aser arkotong aser jangzü apurtem chuba anasa; aser linük nisung ajak pelatep aser jangzü apu, kentenertemi ano kongki tema tenüngsang ken tena anishi. Idangji Athaliai pei süoshi shisa aser ashi, “Ashioktsüogo, ashioktsüogo.”

¹⁴Aser Yehoiada putiri tesenteper madak aliba noklang madak arkotongtem anir adok aser parnok dang ashi, “La tulurtem tetsüngda jagi anir adokang; aser la sülen shiba anitakdir, pajia nok agi lepsetang; kechiyong putir jagi ashi, KIBUBA kidangbo la tetepset.”

¹⁵Anungji parnoki la dak teka ai; aser la Kor Süngkhüm ajanga chubar ki jagi ao; aser yangji parnoki la tepset.

¹⁶Aser Yehoiadai pa aser nisung ajak aser chuba na tsüngda nung, oda parnok KIBUBA meyong nübur asütsü ta tezüngzüktepba ka yanglu.

¹⁷Aser nisung ajak Baal kidangi ao aser aji raksatsü, aser pa tenladak aser pa nela noksa anüka raksatsü, aser Baal putir Mattan tenladak madak tepset.

¹⁸Aser KIBUBA ki asoshi Levi putirtemi tuyuba ama, Mosa ozüng nung zülua aliba ama, pelatepa aser ken tena, Dawidi melaba ama, Dawidi KIBUBA kidang lemsaja aliba ama, KIBUBA nem tarongba tenla agütsütsü, Yehoiadai tanükertem shim.

¹⁹Aser KIBUBA ki kiküm nung langka nung memerüki lira shinga maitsü asoshi kiküm anükertem pai yutsü.

²⁰Aser pai noklang madak arkotongtem, aser tamarenertem, aser nisungtem madak governortem, aser linük alir ajak anir KIBUBA kidang nungi chubaji kiküm ajanga chubar kidangi miner aru, aser chubaji yimli chuba menden manung mendaktsü.

²¹Anungji linük nisung ajaki pelatep, aser yimtiji tiptema liasü; kechiyong parnoki Athalia noklang nok agi tepset.