Read njo 2 PUTIPUYANG 24 Bible Online

2 PUTIPUYANG 24 - njo bible

2 PUTIPUYANG 24

¹Yoash chubatsü tenzükdang küm tenet liasü; aser pai Yirusalem nung küm lir tashi chuba; aser tetsü tenüng Zibia, Beersheba nungi liasü.

²Aser putir Yehoiada arishi piyong Yoashi KIBUBA nükdang kechi shitak aji inyak.

³Yehoiadai pa asoshi kibutsü ana agidaktsü; aser jabaso aser jala pa nungi jakzük.

⁴Iba sülen Yoashi KIBUBA ki yanglushitsü bilem.

⁵Pai putir aser Levitem külemi sentepdaktsür ashi, “Yihuda yimtitem dangi oang, aser Israel ajak nungi küm ka nungi ka tashi nenok Tsüngrem ki yanglushitsü sen bendenang, aser nenoki ilungtepa inyakang. Saka Levitemi aji ilunga meinyak.

⁶ Aser chuba jagi tongtipur Yehoiada aja aser ashi, Kechiba Yihuda aser Yirusalem nungi KIBUBA tenzüker Mosai ozüng süki asoshi saruba Levi nunger nungi nai memeshi?

⁷Kechiyong tetsür tamajung Athalia chirtemi Tsüngrem kidangi rakpoka ait; aser ano KIBUBA kidang bendanga agütsüba oset ajak Baal asoshi amshiogo.”

⁸Anungji chubai mela, aser parnoki süngden ka yanglu, aser aji KIBUBA ki kimalen ayu.

⁹Aser Yihuda aser Yirusalem ajak nung, Tsüngrem tenzüker Mosai arem nung Israel nem saru tsüktsü melaba KIBUBA asoshi bendentsü metetdaktsü.

¹⁰Aser tongtipur ajaki aser nisung ajaki pelatep, aser tatem matong tashi parnoki bener arua süngden nungji enoktsü.

¹¹Aser kodangsa Levitemi süngdenji chubar ketdangpur dangi bener aru, parnoki yangji sen jenti angudang, chubar tezüluba aser temaba putir sosang-nati süngdenji azüngtettsü, aser aji bener oa tayudakji toktsüli asü. Yamaji parnoki anogo shia inyak, aser sen jenti benden.

¹²Aser chuba aser Yehoiadai KIBUBA ki yanglushitsü merang aser yongmenyin mapa inyakertem asoshi taa agütsü.

¹³Yamaji mapa inyakertemi inyak aser parnoki mapaji parnok ket nung inyaka ao, aser parnoki Tsüngrem kiji tiptema yuja, aji tashi itdaktsü.

¹⁴Aser kodang parnoki renem, parnoki tanüngba senji Yehoiada-i chuba dangi bener aru, aser iba jagi KIBUBA ki asoshi marokenrok tekülemdang amshitsü, aser tarongba tenla asoshi, aser teronem menemtsü asoshi ausu, aser hon aser taribi marok-enrok yanglu. Aser parnoki Yehoiada arishi tepiyong maneni KIBUBA kidang tarongba tenla agütsü.

¹⁵Saka Yehoiada tambur aser arishi talang liasü aser pa asü; pa asüdang küm noklang ka ser semer liasü.

¹⁶Aser parnoki pa Dawid yimti nung chuba rongnung rema yutsü, kechiyong pai Israel nung, aser Tsüngrem aser par kibong tsütsü tajung inyak.

¹⁷Tang Yehoiada sür külen Yihuda tongtipur aru aser chuba dang apudak. Idangji chubai parnok dang anga,

¹⁸aser parnoki KIBUBA, par tsürabur Tsüngrem toktsü, aser Asherim aser süngyangluji külem; aser parnok iba tai asoshi Yihuda aser Yirusalem dangi terasaba aru.

¹⁹Aji saka parnok KIBUBA dangi ania arutsü pai parnok dangi ainkartem yok; aser parnoki parnok anema shin; saka parnoki tenarong magütsü.

²⁰ Tsüngrem tanela Yehoiada putir chir Zekaria madaki aru, aser nisungtem madak pa noktak, aser parnok dang ashi, “Yamai Tsüngremi ashir, Nenok azükaru masütsüsa kechiba nenoki KIBUBA ozüng raksar? Nenoki pa senzüka toktsü nung paia nenok senzüka yutsüogo.”

²¹Aser parnoki pa anema tasa asa, aser chubai melaba agi KIBUBA kilempok nung parnoki lung agi pa dak aon.

²²Yamai Yoash chubai tebu Yehoiadai pa dang temeim inyakba pai mebilemtet, saka par chir tepset. Pa asüdang pai ashi, “KIBUBAi ya meteta mang yangangma.”

²³Küm tatem nungbo Siria nunger temerangertem Yoash anema atu; aser parnok Yihuda aser Yirusalem anema aru, aser nisung rongnung tongtipur ajak samatsü, aser parnok nungi rakzükba ajak Damaska chuba dangi yok.

²⁴Kechiyong Siria temeranger telok tila ka dang aru; aser KIBUBAi parnok ket nung telok kanga tulu ka bendanga agütsü, kechiyong parnoki par tsürabur Tsüngrem, KIBUBA senzüka toktsü. Yamaji parnoki Yoash madak temerenshi inyak.

²⁵Kodang parnoki pa kanga yirur toktsür ao, pa kilirtemi pa anema tasa asa, kechiaser pai Yehoiada putir chir azü tokshi, aser pa yipten nung pa tepset. Anungji pa asü; aser parnoki pa Dawid yimti nung arem, saka parnoki pa chubatem leper nung marem.

²⁶Pa anema tasa asartemji Ammontsür Shimeat chir Zabad, aser Moabtsür Shimrit chir Yehozabad liasü.

²⁷Pa chirtem indang, pa anema khuret aika indang, aser KIBUBA ki yanglushiba indang chubatem kaket nung teratet agütsüba nung zülua lir. Aser pa chir Amazia pa melen chuba.