Read njo 2 PUTIPUYANG 26 Bible Online

2 PUTIPUYANG 26 - njo bible

2 PUTIPUYANG 26

¹Yihuda nunger ajaki Uzzia agi, shiba küm ter-trok liasü, aser tebu Amazia melen pa chuba kümdaktsü.

²Tebu nunger den chubaji mejanger külen, pai Elot yanglushi aser tanaben aji Yihuda nem agütsü.

³Uzzia chubatsü tenzükdang pa küm ter trok liasü, aser Yirusalem nung pai küm tenemer ana chuba; tetsü tenüng Yirusalem nunger Yeholia liasü.

⁴Tebu Amaziai inyakba ajak ama pai KIBUBA nükdang kechi shitak aji inyak.

⁵Pai pei sasa Zekaria tendak KIBUBA bushi, aser Zekariai Tsüngrem tsübuba pa dang sayu; aser kopiga pai Tsüngrem bushi, papigaji Tsüngremi pa azükarudaktsü.

⁶Pa oa Filistia nunger anema rara, aser Gat jara, Yabine jara aser Ashdod jara raksatsü; aser Ashdod litsü nung aser Filistia nunger rongnung yimtitem yanglu.

⁷Tsüngremi Filistia nunger anema aser Gur-baal nung alir Arab nunger, aser Meun nunger anema pa yari.

⁸Ammon nungeri Uzzia nem putisü agütsü, aser pa nüngsang Ijip litsü tashi prokshia ao, kechiyong pa kanga tashi ita aküm.

⁹Ano Uzziai Yirusalem Kinük Süngkhüm nung aser Lenten Süngkhüm nung aser kinüklen lungki yanglu aser itemji noktanga yanglu.

¹⁰Aser arem nung pai lungkitem yanglu, aser tzübu aika tsüngpoka yanglu, kechiaser pa kiset shiruru jenti, Shefela aser lenten nung liasü, aser tenem nung aser tsükmenatzü lu inyakertem liasü, kechiyong pai aliji meim.

¹¹Ano Uzzia raratsü asoshi temeranger telok liasü, aser aji tezülur Yeiel aser ketdangpur Maaseia, Hanania melaba ama, aji chubar arkotong rongnung ka, parnoki yongsük yangluba amato telok telok liasü.

¹²Kidong tamburen yongsük ajanga temerangertemji meyi ana ser noklang trok.

¹³Parnok kübokji temeranger telok meyi noklang asem ser tenet aser noklang pungu, parnoki tsükchir anema chuba yaritsü tashi tulu den raratsü koka liasü.

¹⁴Aser Uzziai parnok asoshi, oda telok ajak asoshi, jong, nü, merang korang, rara sobutsü, lijak aser teyoktsü lung renemtsü.

¹⁵Yirusalem nung pai tetangshi nisungtemi puratetba lijakjang yoktsü aser lung tulu yoktsü asoshi lungki manung aser kinüklen yanglua liasü. Aser pa tenüngsang ayimsünga prokshia ao, kechiyong pa yamaji tashi ita akümtsüsa Tsüngremi pa tesüngmangtsü ka yari.

¹⁶Saka pa tashi ita akümdang pa pei tesamatsü asoshi asükümadok, aser pai pa KIBUBA pa Tsüngrem anema ozüng raksa; kechiyong pai tenladak liangmesen arongtsü KIBUBA tenla kidangi ai.

¹⁷Aser pa sülen Azaria putir ai, aser iba sülen tasü tait nisung KIBUBA putir tir tena ai;

¹⁸ aser parnoki Uzzia chuba anema noktak, aser pa dang ashi, “Uzzia KIBUBA dang liangmesen arongtsübaji ne mapa masü, saka liangmesen arongtsü bendanga agütsüba Aron chir putirtem asoshi lir; temeshidak nungi tuguang; kechiyong nai ozüng raksaogo; mesüra KIBUBA Tsüngrem nungi na pei tetushi asoshi mangutsü.”

¹⁹Idangji Uzzia ain adoka rasa; liangmesen arongtsü pa ket nung susa liasü; aser putirtem den pa rasa-a alidang, KIBUBA kidang, tenladak anasa, putirtem madang pa tenütsü nung zütsüra adok.

²⁰Aser putiunger Azaria aser putir ajaki pa dak reprang, aser ajiang, pa tenütsü nung zütsüra liasü. Aser parnoki pa yakta nungteta yok, aser pa pei sasa tugutsü ilunga liasü, kechiaser KIBUBAi pa dak azük.

²¹Aser Uzzia chuba pa asüba anogo tashi zütsüra keta liasü, aser zütsüra aket nungji ki balaka nung ali, kechiyong KIBUBA ki nungi pa aenshidakja liasü. Aser par chir Yotham chubar kibong aser nübur madak yimsü süa ali.

²²Tang tanüngba Uzzia mapa tetenzük nungi tatem tashi Amoz chir Isaia ainkari züluogo.

²³ Aser Uzzia tebu nunger den mejang, aser parnoki pa tebu nunger den chubatem aremdak li anasa arem, kechiyong parnoki ashi, “Pa zütsüra aketer.” Aser par chir Yothami pa melen chuba.