Read njo 2 PUTIPUYANG 28 Bible Online

2 PUTIPUYANG 28 - njo bible

2 PUTIPUYANG 28

¹Ahaz chubatsü tenzükdang küm metsü liasü; aser pai küm tertrok tashi Yirusalem nung chuba; aser pa tebu Dawid ama mesüi KIBUBA nükdang kechi tajung ibaji meinyak.

²Saka pai Israel chubatem lenmang nung jaja, aser ano temulusaba Baaltem noksa yanglu.

³Ano pai Hinnom chir lenten nung liangmesen arong, aser KIBUBA Israel chirtem madang aridokba limapur kintem tesempatsü mapa amato pei chirtem mi nung arong.

⁴Aser pai tetepsetba tenla agütsü aser tenem tekülemdak nung, ungsem nung aser süngdong tajem ajak kübok liangmesen arong.

⁵ Aji asünung KIBUBA Tsüngremi Siria nunger ket nung pa bendanga agütsü; aser parnoki pa akok, aser telok jenti pur ao, parnok Damaskai bener arua Israel chuba, shibai pa madak jenti tepseta takok angu, pa ket nung agütsü.

⁶Kechiyong Remalia chir Pekai Yihuda nung anogo ka nung meyi noklang ka ser metsü tepset, parnok ajakji tasü tait nisungtem; kechiaser parnoki KIBUBA, par tsürabur Tsüngrem senzüka toktsü.

⁷Aser Efraim nunger tashi tait nisung ka Zikri-i, chubar chir Maaseia, chubar kidang tanishisang Azrikam, aser chuba den atongba Elkana tepset.

⁸Israel chirtemi par adianu meyi noklang ana, tetsürtem aser jala-jabasotem, pur ao aser parnok nungi oset jenti rakzüka bener ao, aser aji Samariai bener aru.

⁹Saka yangji KIBUBA ainkar ka, tanüng agi Oded liasü; aser Samariai aruba telok lenji ao, aser parnok dang ashi, “Ajiang, KIBUBA nenok tsürabur Tsüngrem, Yihuda den ain adoka alibayong, pai nenok ket nung parnok agütsü, aser nenoki mit adoka parnok tepsetba kotak tonga tuogo.

¹⁰Tang nenoki Yihuda aser Yirusalem chirtem alar aser alatsür kümdaktsütsü atonger; saka nenok rongnunga KIBUBA nenok Tsüngrem anema tai menaba mali no?

¹¹Anungji tang nenoki kü dang angang, aser nenok adianutem nenoki pur aortemji meyipa yokang; kechiyong KIBUBA tetsübutsü terasaba nenok madak lir.”

¹²Idangji rara nungi arurtem anema Efraim tanishirtem Yohanan chir Azaria, Mishillemot chir Berekia, Shallum chir Yehizkia, aser Haldai chir Amasa, parnok noktak, aser parnok dang ashi,

¹³“Nenoki yagi tepuokertem bener marutsüla; kechiyong tang aliba onok temenen aser tai dak tali bendenloktsüba nenoki KIBUBA anema onok dak tai bena arutsü atonger; kechiyong onok tai tulu lir, aser Israel anema tetsübutsü terasaba lir.”

¹⁴Anungji nok o nü abenertemi pur arurtem aser terakzükba osettem tongtipur aser sentepa aliba telok madang toktsü.

¹⁵Aser tenüng teta ashiba nisungtemji arameso aser tapurtemji ania aru, aser terakzükba oset nungi parnok rongnung mangsa alir ajak abendaktsü, parnok nem tsüngsem semdaktsü, chiyungtsü aser tajemtsü bena arutsü, aser totzü mezütsü, aser parnok rongnung tashi maiter ajak gado nung mendaktsü, parnoki pei adianu dangi, asangdong aliba Yeriko yimti-i anir aru. Ajiser parnok Samariai meyipa ao.

¹⁶Iba mapang nung Ahaz chubai Asiria chubatem dangi pa yaritsü asoshi yok.

¹⁷Kechiyong Edom nungeri tanaben arua Yihuda amak, aser nisungtem pur ao.

¹⁸Filistia nungeria lenten yimtitem, aser Yihuda anüolentip amak aser Beth-shemes, Aijalon, Gederot, Soko iba yimtsüngtem, Temna aser iba yimtsüngtem aser, Gimzo aser iba yimtsüngtem agi, aser parnok yangji ali.

¹⁹Kechiyong Israel chuba Ahaz meji KIBUBAi Yihuda ludaktsü, kechiyong pai Yihuda dak taochi makai inyak aser KIBUBA anema kanga mejungi tai mena.

²⁰Aser Asiria chuba Tigath-pileser pa dangi aru, aser tashi itdaktsütsü melen lendong agütsü.

²¹Aser KIBUBA kidang nungi aser chuba ki aser tongtipur ki nungi shilem ka agitet, aser aji Asiria chuba nem putisü agütsü; saka aji agi pa meyari.

²²Ano iba ama lendong nung Ahaz chubai taliang KIBUBA dak tamang makateti aküm.

²³Kechiyong Damaska tsüngremtem kobai pa akok, parnok nem tetepsetba tenla agütsü; aser pai ashi, “Siria chubatem tsüngremtemi parnok yari, anungji ni parnok nem tetepsetba tenla, ni yaritsü asoshi agütsütsü.” Saka itemji pa aser Israel ajak asoshi tesamatsü liasü.

²⁴Aser Ahazi Tsüngrem kidang marok-ausutem külemi benden, aser Tsüngrem kidang aliba marok-ausutem anüka lepsatsü, aser KIBUBA ki kishi shibanga yutsü; aser pai Yirusalem kinük ajaklen tenladak yanglu.

²⁵Aser KIBUBA, par tsürabur Tsüngrem jashidakja, Yihuda yimti shia nung pai tangar tsüngrem dang liangmesen arongtsü tenem tekülemdak yanglu.

²⁶Tang tanüngba pa mapa, aser pa sentong ajak, tetenzük aser tatem, ajiang, itemji Yihuda aser Israel Chubatem kaket nung zülua lir.

²⁷ Aser Ahaz tebu nunger den mejang, aser parnoki pa yimti nung, oda Yirusalem nung arem, kechiyong parnoki pa chubatem leperi bener maru, aser par chir Hezekiai pa melen chuba.