Read njo 2 PUTIPUYANG 29 Bible Online

2 PUTIPUYANG 29 - njo bible

2 PUTIPUYANG 29

¹Hezekiai chubatsü tenzükdang pa küm metsür pungu liasü, aser pai Yirusalem nung küm metsür tuku tashi chuba; aser tetsü tenüng Zekaria jala Abija liasü.

²Aser KIBUBA nükdang kechi shitak liasü, tebou Dawidi inyakba ajak amato, pai inyak.

³Pai pa chubaba küm mezüngbuba nung, mezüngbuba ita nung KIBUBA ki kishitem lapok, aser itemji yanglushi.

⁴Aser pai putirtem aser Levitem anir ait, aser anüdoklen tesademdak sentepdaktsü, aser parnok dang ashi,

⁵“Kü dang angang, nenok Levitem; tang nenok sasa meshitetang, aser KIBUBA nenok tsürabur Tsüngrem ki meshitetang aser temeshidak nungi memerükba oset bener oang.

⁶Kechiyong asen tsüraburi tai mena, aser KIBUBA asen Tsüngrem madang kechi majung aji inyak, aser pa senzüka toktsü, aser parnok tejak KIBUBA alidak nungi meyipa oadok, aser parnok tesülen shitsü.

⁷Aser kilempok kishitem shibangadok, aser milen remsepadok, aser liangmesen marong, mesüra Israel Tsüngrem nem temeshidak tarongba tenla magütsü.

⁸Aji asünung KIBUBA terasaba Yihuda aser Yirusalem madak liasü, aser paji parnok asoshi tetsübutsü aser taoksatsü ka aser temokongtsü ka liasü, nenoki pei tenük agi anguba amaji, pai parnok bendanga agütsü.

⁹Kechiyong, angang, asen tsürabur nok agi lao-ogo, aser asen jabaso-jalatem aser asen kinungtsütem iba asoshi tepuokdak lir.

¹⁰Tang KIBUBA Israel Tsüngrem den, oda pa tetsübutsü ain adokba asenok nungi oadoktsü asoshi tezüngzüktepba ka yanglutsü kü mulungjang nung lir.

¹¹Kü chirtem, tang temulung magütsüi teli; kechiyong KIBUBAi nenok pa madang noktaktsü, aser nenok pa tenzükertem asütsü, liangmesen arongtsü shimtetogo.”

¹²Idangji Levitem arameso, Amasai chir Mahat, Azaria chir Yoel, Kohat nunger chirtem, aser Merari chirtem, Abdi chir Kish, Yahallel chir Azaria, aser Gershom nunger, Zimma chir Yoa, Yoa chir Eden.

¹³Elizafan chirtem Shimri aser Yeuel; Asaf chirtem, Zekaria aser Mattania;

¹⁴aser Heman chirtem, Yehuel aser Shimei; Yeduthun chirtem Shemaia aser Uzziel.

¹⁵Aser parnoki par adianutem jaten, aser parnok sasa meshitet aser KIBUBA o chubai melaba amato, KIBUBA ki telungbai aji meshitettsü ai,

¹⁶aser putirtemi KIBUBA ki telungbai aji meshitettsü ai, KIBUBA ki kimaleni bener adok. Aser Levitemi aji Kidron ayongi bener aotsü bena aru.

¹⁷Tang mezüngbuba ita mezüngnü meshitettsü tenzük, aser ita tinübuba nung parnoki KIBUBA kilempoki aru; aser parnoki tinü nung KIBUBA ki meshitet; aser mezüngbuba ita anogo ter trokbuba nung parnok tatem atem.

¹⁸Idangji parnok chuba ki kilung nung Hezekia chuba dangi ai, aser ashi, “Onoki KIBUBA ki ajak meshitetogo, aser tarongba tenladak, amtsük langbang aser yangji aliba marok-ausu ajak,

¹⁹ano Ahaz chubai pa chuba dang pai tai mena-a endokba marok ausu ajak onoki renemogo aser meshitetogo; aser ajiang, itemji KIBUBA tenladak madang lir.”

²⁰Idangji Hezekia chuba yakta shishi, aser yimti tongtipur sentepdaktsü, aser KIBUBA kidangi atu.

²¹Aser nashi pungchi tenet, san tepung tenet, san chanu tenet, aser nabong tenet, yimli asoshi temenen tenla asoshi aser temeshidak asoshi aser Yihuda asoshi parnoki bener aru. Aser pai Aron chir putirtem dang KIBUBA tenladak itemji tenlatsü mela.

²²Anungji parnoki nashi pungchitemji tepset, aser putirtemi azüji agizük, aser aji tenladak rüklok: aser parnoki san tepungtem tepset, aser azüji tenladak rüklok; aser parnoki ano san chanutem tepset, aser azüji tenladak rüklok.

²³Aser temenen tenla asoshi parnoki nabong tepungji chuba aser sentepa alir telok madangi anasa bener aru, aser item dak parnok teka agi nemet;

²⁴aser putirtemi parnok tepset, aser parnoki tenladak manung azü mezüja Israel ajak asoshi temenen pungitsü tenla; kechiyong chubai Israel ajak asoshi tarongba tenla aser temenen tenla agütsütsü tim ta ozüng agütsü.

²⁵KIBUBA kidang Levitem laya, tawaba kongki, aser tzürang kongki, Dawidi melaba ama, aser chubar tangur Gad, aser Nathan ainkar pai yutsü; kechiyong pa ainkartem agi temelabaji KIBUBA nungi liasü.

²⁶Aser Levitemi Dawid kongkitem aser ainkartemi jangzü amer noktak.

²⁷Aser Hezekiai tenladak tarongba tenla agütsütsü mela. Aser tarongba tenlaji tenzükdang, KIBUBA nüng asangtsü tenzüka jangzü aser Israel chuba Dawid kongkitem den tenzük.

²⁸Aser tesenteper ajaki külem, kentenertemi aten, aser jangzü apurtemi apu; ya ajak tarongba tenla merenem tashi maneni ali.

²⁹Kodang parnoki tenla agütsüba atem, chuba aser pa den dena alir ajaki apudak aser külem.

³⁰Ano Hezekia chuba aser tongtipuri Levitem dang Dawid ken aser tangur Asaf otem agi KIBUBA tenüng asangtsü mela. Aser parnoki tepela agi ken aten, aser parnoki tekolak mechioka külem.

³¹Idangji Hezekiai ashi, “Tang nenok pei sasa KIBUBA nem bendanga agütsüogo, anasa arung aser tetepsetba tenla aser tenüngsang tenla bener KIBUBA kidangi arung.” Aser kwikati temulung nung mulungteta liasü tarongba tenla bener aru.

³²Aser tesenteper teloki bener aruba tarongba tenlatemji nashi pungchi neter, san tepung noklang ka, aser san chanu noklang ana; item ajak KIBUBA nem tarongba tenla liasü.

³³Aser temeshitet osettemji nashi pungchi noklang trok, aser san meyi asem.

³⁴Saka putirtemji ishikadang liasü, anungji tarongba tenla ajakbo parnoki merongtemtet; anungji mapaji matem tashi, aser putirtem parnok sasa memeshitet tashi, parnok adianu Levitemi parnok yari; kechiyong putirtem dang nungi Levitem temulungjang nung meshitettsü atema tali temetongba liasü.

³⁵Tarongba tenla jenti aliba dakji alema, yimjung tenla temo, aser tarongba tenla asoshi tajemtsü tenla liasü. Yamaji KIBUBA mapaji tiptema ayu.

³⁶Aser Tsüngremi nisungtem asoshi renemtsüba asoshi Hezekia aser nübur ajaki pelatep; kechiyong mapaji ajongbena atalok.