Read njo 2 PUTIPUYANG 30 Bible Online

2 PUTIPUYANG 30 - njo bible

2 PUTIPUYANG 30

¹Hezekiai Israel aser Yihuda ajak tajai yok, aser Efraim o Manase dangi shiti yoka, KIBUBA Israel Tsüngrem atema Süia Aoba benjong ayutsü Yirusalem nung KIBUBA kidangi arung ta zülu.

² Kechiyong chuba aser pa tongtipuri aser Yirusalem nung tesenteper ajaki, ita tanabuba nung iba benjong akatsü bangjemtet.

³Kechiyong putirtem parnok sasa nisung peria meshiteta mali nung, aser nisungtema parnok sasa Yirusalem nung sentepa malibayong iba mapang nungji ya akatsü mokoki liasü.

⁴Aser chuba aser tesenteper ajak madang mapaji shitak liasü.

⁵Anungji Beersheba nungi Dan tashi, oda parnok Yirusalem nung KIBUBA, Israel Tsüngrem asoshi Süia Aoba benjong akatsü arutsüla ta sangdonga yoktsü parnoki ozüng ka yanglu; kechiyong zülua aliba amajibo telok tulu mesentepdang.

⁶Anungji Israel aser Yihuda ajak dangi chuba aser tongtipur nungi, aser chubai melaba ama, Nenok Israel chirtem, KIBUBA, Abraham, Isak, aser Israel Tsüngrem dangi meyipang, angji Asiria chubatem ket nungi nenok jenbua alirtem dangi meyipa arutettsü ta zülua shiti benertem ao.

⁷Nenok tsürabur aser nenok adianutem ama teli, shirnoki parnok KIBUBA Tsüngrem dang temulung melemi liasü, ibayongji nenoki anguba amaji, pai parnok azüngmeyaka kümdaktsü.

⁸Nenok tsüraburtem ama tekong temerang saka nenok sasa KIBUBA nem bendanga agüjang, aser pa tenla kidangi arung, koba pai teti asoshi meshiteta lir, aser nenok nungi pa tetsübutsü ain adokba meyipa oadoktsü asoshi KIBUBA nenok Tsüngrem tenzükang.

⁹Kechiyong nenoki KIBUBA dangi meyipra, nenok adianutem aser nenok chirtem tapurtemi aochitsü, aser iba limai meyipa arutsü. Kechiyong KIBUBA nenok Tsüngrem taochi aser yimlibilem lir, aser nenoki pa dangi meyipra, pa tejak nenok nungi memeyiptsü.

¹⁰Anungji obelenertem yimti ka nungi yimti ka ajanga, Zebulun tashi ao; saka parnoki parnok menütsü aser sensatsü,

¹¹Asher, Manase, aser Zebulun nisungtem ishika dang parnok sasa ajemalu aser Yirusalemi aru.

¹²Chuba aser tongtipuri KIBUBA o agi melaba ama inyaktsü asoshi temulungjang ka parnok nem agütsütsü Tsüngrem teka Yihuda madak liasü.

¹³Nisung jenti, piyazü meinokba am benjong akatsü asoshi ita tanabuba nung Yirusalemi sentep.

¹⁴Parnoki külemi inyaktsü tenzük aser Yirusalem nung aliba tenladakji agien, aser liangmesen arongtsü asoshi tenladak aliba ajakji parnoki bener ao aser Kidron lenten nung enoktsü.

¹⁵Aser ita tanabuba anogo terpezübuba nung parnoki Süia Aoba benjong san chanuji tepset. Aser putirtem aser Levitem maksüdaktsü, anungji parnok sasa meshitet, aser KIBUBA kidangi tarongba tenla bener aru.

¹⁶Tsüngrem nisung Mosa ozüng amato parnoki pei mapa nung noktak; Levitem ket nungi agizükba azüji putirtemi rüklok.

¹⁷Kechiyong tesenteper rongnung aika pei sasa memeshitet liasü; anungji Levitemi, memerüki aliba nisung shia asoshi, aji KIBUBA madang temeshi kümdaktsütsü Süia Aoba benjong san chanuji tepset.

¹⁸Kechiyong Efraim, Manase, Issakar, aser Zebulun nungi nisung jenti memeshiteti liasü, saka zülua aliba ama mesüi Süia Aoba benjong achi. Saka Hezekiai parnok asoshi sarasadema ashi,

¹⁹“Nisung shibai KIBUBA par tsürabur Tsüngrem, pei mulungjang agi bushir, merüktettsü atema tenla ki tetuyuba ozüng amato mesüaka, tajung KIBUBAi nisung shia dang tai tokangma.”

²⁰Aser KIBUBAi Hezekia dang angashi, aser nisungtemji anebtsü.

²¹Aser Yirusalem nung alirtemi tepela tulu agi piyazü meinokba am benjongji anogo tenet amung; aser Levi aser putirtemi anogo shia, parnok tashi ajak agi KIBUBA dang tenüng asang.

²²Hezekiai Levitem shirnoki KIBUBA mapa junga tangshia inyak ajak dang ajungshia jembi. Anungji nisungtemi anogo tenet, yimjung tenla tepseta parnok tsürabur Tsüngrem KIBUBA nem tenüngsang agüja benjongji achi.

²³Idangji tesenteper ajongai ano tenetnü benjongji akatsü mulungtet, aser tenetnü tepela agi amung.

²⁴Kechiyong Yihuda chuba Hezekiai tesenteper nem nashi pungchi meyi ka aser san meyi tenet tenla asoshi agütsü, aser tongtipurtemi tesenteper nem nashi pungchi meyi ka aser san meyi ter agütsü. Aser putir aikati parnok sasa meshitet.

²⁵Aser Yihuda nungi tesenteper ajonga, aser Levi nunger aser putirtem, Israel nungi adokba tesenteper ajonga, aser Israel lima nungi arua amungertem, aser Yirusalem nung arua amungertem, pelatep.

²⁶Anungji Yirusalem nung tepela tulu liasü, kechiyong Israel chuba Dawid chir Solomon mapang nungi iba amai Yirusalem nung melidang.

²⁷Anungji putirtem aser Levitemi arameso aser nisungtem moatsü, aser parnok ola angashi, aser parnok sarasademba kotak temeshidak tashi atu.