Read njo 2 PUTIPUYANG 31 Bible Online

2 PUTIPUYANG 31 - njo bible

2 PUTIPUYANG 31

¹Tang kodang ya ajak renem, dena alir Israel ajak Yihuda yimtitem bushia ao aser temeshi tongshitem lensüka yok aser tekülemdak tenem aser tenladak Yihuda aser Benjamin, Efraim aser Manase ajak nung parnoki ajakji mesamatsü tashi raksatsü. Idangji Israel ajak pei yimtitemi, nisung shia pei akaba bushia shilang.

²Hezekiai putirtem aser Levitem telemsa shimtet, nisung shia pei telemsa mapa balala, putirtem aser Levitem tarongba tenla aser yimjung tenla asoshi, KIBUBA tanendak aser süngkhüm tenzüktsü aser tepela aser tenüngsang agütsütsü.

³ Chubai pa akaba nungi tenlabaji tarongba tenla asoshi liasü; anepdang aser nikongdang tarongba tenla, aser amungnü asoshi tarongba tenla, ita tasen, benjongbentsü telemtet, KIBUBA ozüng nung zülua aliba ama inyak.

⁴ Pai Yirusalem nung alir dang putirtem aser Levitem nem parnok shilem agütsütsü mela, aji oda parnokia KIBUBA ozüng nung tashi aittsüsa aser nendaka tenzüktsü.

⁵Temelaba ozüngji prokshidang, Israel nungeri mezüng atangba tsük jenti, yi, totzü, ninang mojitzü, aser alu nungi adokba ajak sempet agütsü; aser parnoki kechisarena nung ter shilem[1] jenti bener aru.

⁶Aser Yihuda yimtitem nung aliba Israel aser Yihuda nübur nashi aser san ter shilem aser KIBUBA parnok Tsüngrem nem bendanga agüja aliba oset bener aru, aser itemji nangtena toktsü.

⁷Ita tasembuba nung parnoki bendena alibaji telong küma tenzük aser itemji ita tenetbuba nung renem.

⁸Kodang Hezekia aser pa tongtipuri nangtena alibaji angu, parnoki KIBUBA aser par Israel moatsü.

⁹Aser Hezekiai putirtem aser Levitem dang bendena aliba indangji asüngdangtep.

¹⁰Temaba putir Azaria shiba Zadok kidong nungi liasü, pai pa dang langzü, “Parnoki KIBUBA kidangi tenla bener aruba mapang nungi asenoki chiogo aser periogo, aser jenti anüngogo; kechiyong KIBUBAi pei nübur moatsüogo, aji asünung asenok jenti anünga kar.”

¹¹Idangji Hezekiai parnok dang KIBUBA kidang taktang renemtsü mela, aser parnoki renem.

¹²Aser parnoki temulung agüja tenla, ter shilem, aser bendanga agütsüba osettem bener aru. Item madak ketdangpur tongtibaji Levi nunger Konania liasü, aser tenu Shimei tanabuba liasü;

¹³Yehiel, Azazia, Nahat, Asahel, Yerimot, Yozabad, Elil, Ismakhia, Mahat, aser Banaia itemji, Hezekia chuba aser Tsüngrem kidang par tongtiba Azaria shimtetba amato, Konania aser tenu Shimei kübok teyaritepertem liasü.

¹⁴Aser Levi nunger Imna chir Kare, anüdoklen süngkhüm anüksangji Tsüngrem nem temulunger tenla agütsüba madak kibur liasü, KIBUBA asoshi rizünga aliba tenla aser temeshitiba osettem lemsatsütsü.

¹⁵Eden, Miniamin, Yeshua, Shemaia, Amaria, aser Shekania parnoki temulung agüja yimtitem nung putir parnok adianutem shilem lemsaja, tain aser tanur kasa, telemsa balala agi,

¹⁶kidong otsü agi zülua alir dak alema, teburtem küm asem nungi temalen, shirnok KIBUBA kidangi anogo shia pei mapa ama aitdir, parnok pei mapa amato tenzüktsü asoshi, parnok telemsa telemsa ama, yaria liasü.

¹⁷Putirtem tenüng zülubaji parnok tebu nunger ren nungi liasü; Levi nungerji küm metsü tain aser tamalen pei mapa amato telemsa telemsa agi liasü.

¹⁸Putirtem parnok pei tanur tilatem, parnok kibutsütem, parnok jabasotem, aser parnok jalatem, teloki ajonga tenüng zülua liasü, kechiyong parnok sasa meshiteta temulung lema liasü.

¹⁹Aser Aron jabasotem, putirtem, shirnok yimli nung liasü parnok meyong yimtitem nung liasü, yimti ishika nung putir rongnung tebur shia aser Levi rongnung shirnok tenüng zülua liasü parnok nem shilem agütsütsü tenüng agüja liasü.

²⁰Yamaji Hezekiai Yihuda ajak nung inyak; aser KIBUBA pa Tsüngrem madang kechi tajung aser shitak aser temulung alemba liasü aji inyak.

²¹Aser Tsüngrem ki mapa nung pai anitakba mapa ajak, ozüng aser temelaba amato, pa aser Tsüngrem bushiba nung pai amtakba mapa shia pai pa mulungjang ajak agi inyak aser azükaru.