Read njo 2 PUTIPUYANG 32 Bible Online

2 PUTIPUYANG 32 - njo bible

2 PUTIPUYANG 32

¹Iba mapa aser item temulung lemtetba mapa sülen Asiria chuba Sennakerib arua Yihuda amak aser pai akoktsü ta bilema mitsa yangluba yimtitemji anema arü amen.

²Aser kodang Hezekiai Sennakerib arua Yirusalem anema raratsü asoshi lir ta ajitet,

³pai yimti temalen tzübu aliba tzüji anendaktsütsü asoshi par tanishirtem aser temerangertem den bangjemtep; aser parnoki pa yari.

⁴Aser nisung jenti sentep aser parnok tzübu ajak aser linük ajanga ayimba ayongji anendakja ashi, “Kechiba Asiria chubatemi arua tzü jenti angutsüla?”

⁵Pai mulung mulunga inyakdaktsü, aser raksa-a aliba jara ajak meso, aser iba manung lungki yangerlok, aser iba temalen pai jara tanga yanglu; aser pai Dawid yimti Millo tashi itdaktsü. Pai ano nok o nü aser jong jenti yanglu.

⁶Aser pai nübur madak arkotongtem yutsü, aser yimti süngkhüm amungdang parnok pa dangi sentepdaktsü, aser parnok sünepdakja jembia ashi.

⁷“Tashi itang aser pelashishia liang, Asiria chuba asoshi tsübua mesüra aoksa-a teli, mesüra pa den aliba telok ajakji tetsübu, kechiyong pa den aliba dang nungi asenok den aliba tashi tuluba ka lir:

⁸pa den shi nok o nü dang lir, saka asen denbo asenok yaritsü aser asen tongbang raratsü KIBUBA asen Tsüngrem lir.” Aser Yihuda chuba Hezekia o nungji nisungtemi temulung alem.

⁹Iba sülenji Asiria chuba Sennakeribi pa tenzükertem den pa Lakhis nung liasü. Pai Yihuda chuba Hezekia dangi yok, aser Yirusalem nung aliba Yihuda ajak dangi yoka ashi,

¹⁰Yamai Asiria chuba Sennakeribi ashir, “Yirusalem amakba tizüka atatsüsa nenoki kechi nung temulung alemer?

¹¹Ayawara aser tzüra agi südaktsütsüsa Asiria chuba ket nungi asen KIBUBA Tsüngremi asenok kümzüktsü ta shia Hezekiai nenok mesüzüker masü no?

¹²Iba Hezekia yagi, nenoki tenladak ka nung külemtsü, aser iba manung nenoki, liangmesen arongtsü, ta Yihuda aser Yirusalem dang mela-a pa tekülemdak tenem aser tenladak bener odaktsü masü no?

¹³Linük nübur ajak dang ni aser kübu nungeri kechi inyak nenoki memetet no? Linük nung kin tsüngremtemi kü ket nungi parnok lima kümzüktsü koka liasü ama?

¹⁴Nenok Tsüngremi kü ket nungi nenok kümzüktsüsa, kübu nungeri meshimeshia samatsütsü, kintem tsüngrem ajak rongnung kü ket nungi pei nübur kümzüktsü koka Tsüngrem shiba liasü?

¹⁵Tang anungji Hezekiai nenok tashiokdaktsü, mesüra iba amai nenok temesüzükdaktsü, mesüra nenoki pa dang tamang; kechiyong kin kecha tsüngremia mesüra yimli-i kü ket nungi, aser kübu nunger ket nungi pei nübur kümzüktsü koka maliasü süra, nenok Tsüngrem iang kechi kü ket nungi nenok kümzüktsü?”

¹⁶Aser pa tenzükertemi ano tali KIBUBA Tsüngrem anema aser Hezekia anema jembi.

¹⁷Ano pai, Israel Tsüngrem, KIBUBA sensatsütsü shiti ka zülua ashi, “Kin tsüngremtemi parnok pei nübur kü ket nungi mekümzükba amaji, yamaji Hezekia Tsüngremi pei nübur kü ket nungi mekümzüktettsü.”

¹⁸Aser parnok amok merena, aser parnok timtemdaktsütsü parnoki ola tulu agi Yihuda nunger o agi jara nung Yirusalem nunger dang, parnoki yimtiji agitsü ta ayimten.

¹⁹Aser parnoki Yirusalem Tsüngrem, nisunger teka agi inyakba mapa kümdakja jembi.

²⁰Hezekia chuba, aser Amoz chir Isaiai, iba atema sarasadem aser Tsüngrem dang ayimten.

²¹Aser KIBUBAi kotak tenyar ka yok, pai Asiria nunger tanendak tashi tulu nisung ajak, tanishirtem aser arkotongtem leptokadok. Anungji pai pei linüki akseta shilang. Aser kodang pai pei tsüngrem kidangi ait, pei chirtem kari yangji pa nok agi lepset.

²²Asiria chuba Sennakerib ket nungi, aser tangar ket ajak nungi, KIBUBAi Hezekia aser Yirusalem nübur kümzük, aser ajaklen parnok anisüngzük agütsü.

²³Aser aikati Yirusalemi, aser Yihuda chuba Hezekia dangi senti oset sempet bener aru; anungji iba mapang nungi kin ajak tsüngdang pa ulutsü.

²⁴Item anogo nung Hezekia tasütsüsa shirang; aser pai KIBUBA dang sarasadem; aser pai pa dang jembi, aser pa nem temaitsü ka agütsü.

²⁵Saka Hezekiai pa nem tajangzük agütsüba ama lepa magütsü; kechiyong pa mulungjang asüküma liasü; anungji pa madak aser Yihuda aser Yirusalem madak terasaba liasü.

²⁶Saka Hezekiai pa mulungjang asükümba nungi pa aser Yirusalem nung alirtem ajemalua aküm. Anungji Hezekia anogo nungbo Tsüngrem terasaba parnok dangi maru.

²⁷Hezekia rongsen jenti aser tetushi liasü. Aser pai item asoshi terizüngdak taribi asoshi, aser teronem menemtsü asoshi, aser jong asoshi, aser senti chipo-anpo tapu ajak asoshi yanglu.

²⁸Tsük, yi aser totzü anguba asoshi terizüngdak; aser shiruru tapu ajak aser san telok ki yanglu.

²⁹Yamaji pei asoshi yimtitem aser san telok aser nashi telok asoshi jenti yanglu; kechiyong Tsüngremi pa nem rongsen jenti agütsü.

³⁰Iba Hezekiaisa Gihon tzütem temaba tzübu noktang, aser itemji Dawid yimti anüolen jagi indang indanga mesür alu. Aser pa mapa ajak nung Hezekia azükaru.

³¹Aji saka Babilon chubar tenyartem shirnoki pa dangi linük nung temaitsü inyakba indang asüngdangteptsü yok, Tsüngremi pa mulungjang nung kechi ali ajak metettsü asoshi tendangtsü oda toktsü.

³²Tang Hezekia mapa tanüngbaji, aser pa mapa tajungji, ajiang, itemji Yihuda aser Israel chubatem kaket nung, Amoz chir Isaia ainkar mangdang nung zülua lir.

³³Aser Hezekia tebu nunger den mejang, aser parnoki pa Dawid chirtem leper leni atulen rema yutsü. Aser Yihuda aser Yirusalem alir ajaki pa asüdang tetushi sayu. Aser par chir Manase pa melen chuba.