Read njo 2 PUTIPUYANG 33 Bible Online

2 PUTIPUYANG 33 - njo bible

2 PUTIPUYANG 33

¹Manase chubatsü tenzükdang pa küm terana liasü; aser pai Yirusalem nung küm tenemer pungu tashi chuba.

² Aser Israel chirtem madang nungi KIBUBAi aridokba tesempatsü kintem mapa amaji, kechi KIBUBA madang majung itemji inyak.

³Kechiyong tebu Hezekiai raksatsüba tenem tekülemdakji pai tanaben yanglushi; aser Baaltem asoshi pai tenladak yanglu, aser Ashera yanglu, aser anüng nung aliba ajakji külem, aser parnok tenzük.

⁴ “Yirusalem nung kü tenüng teti alitsü” ta KIBUBAi shia aliba KIBUBA kidang pai tenladak yanglu.

⁵Aser KIBUBA ki kilempok anasa pai anüng nung aliba telok ajak asoshi tenladak yanglu.

⁶Aser Hinnom chir lenten nung pai pei chirtem mi nung tenla asoshi rongdaktsü; arasentsür tetakzükba aser atakatema sarasademba inyak, aser arasentsür mapa inyak, arasentsür tanela alir dangi, aser sangmongbi dangi ao; pai KIBUBA tsüngdang pa ain adokdaktsütsü tamajung jenti inyak.

⁷ Aser pai yangluba noksa Tsüngrem kidang ayu iba tenla ki indang Tsüngremi Dawid aser Solomon dang ashi, “Iba kidang aser Yirusalem nung koba Israel kin ajak nungi ni shim, ni kü tenüng teti ayutsü,

⁸aser Israel puri dang ozüng ajak, telatet ozüng aser Mosa ajanga agütsüba yimsü ozüng ni parnok dang melaba ajak kümdanga inyakdi süra, joko ni nenok tsürabur nem agütsüba lima nungi Israel tetsüng magiendaktsütsü.”

⁹Manase-i Yihuda aser Yirusalem alir mesüzük aji asünung Israel jakdang KIBUBAi kintem shirnok samatsü parnok dang nungi tali tamajungba inyak.

¹⁰KIBUBAi Manase aser pa nübur dang jembi, saka parnoki temulung magütsü.

¹¹Anungji KIBUBAi parnok madaki Asiria temeranger walunirtem anir aru, aser parnoki Manase teni nung jui enoktsü aser pa alener Babiloni bener aru.

¹²Aser kodang pa timtem tejashi nung liasü, pai KIBUBA pa Tsüngrem yimli angutsü mepishi aser pa tsürabur Tsüngrem madang kanga ajemalua aküm.

¹³Pai pa dang sarasadem, aser Tsüngremi pai mepishiba agizük aser pa sarasadem angashi, aser tanaben pa yimli Yirusalemi anir aru. Idangji ang Manase-i KIBUBAji Tsüngrem ta metet.

¹⁴Tesülen pai Gihon anüolen Dawid yimti nung Ango Süngkhümi ailen jara temaba yanglu, aser aji Ofel tashi yanglua ao, aser aji kanga ojia yanglu; pai ano Yihuda mitsa aliba yimti ajak nung walunirtem ayu.

¹⁵Aser KIBUBA kidang nungi pai bendanger tsüngremtem aser süngyangluji bener ao, aser Yirusalem aser KIBUBA ki tenemtem nung pai yangluba tenladak ajakji, pai yimti tezülen itemji endokadok.

¹⁶Pai ano KIBUBA tenladak yanglushi aser iba manung yimjung tenla aser tenüngsang tenla tepseta tenla; aser pai Yihuda dang KIBUBA Israel Tsüngrem tenzüktsü mela.

¹⁷Aji saka nisungtemi ano tenem tekülemdak nung tenla agütsü, saka aji KIBUBA parnok Tsüngrem dang liasü.

¹⁸Tang tanüngba Manase mapa, aser Tsüngrem dang pai sarasademba, aser KIBUBA Israel Tsüngrem tenüng nung pa den tangurtemi jembiba otem, ajiang, itemji Israel chubatem putipuyang nung zülua lir.

¹⁹Aser pai sarasademba, aser koda Tsüngremi pa temepishiba agizük, aser pa temenen, temulung alemba; aser pa sasa ajemalua makümdang pai tenem tekülemdak yangluba, Asherim aser süngyanglu noksa ayuba, ajiang, itemji putipuyang kaket nung zülua lir.

²⁰Manase pa tsürabur den mejang, aser parnoki pa par kidang arem, aser par chir Amoni pa melen chuba.

²¹Amon chubatsü tenzükdang küm metsür ana liasü, aser pai Yirusalem nung küm ana tashi chuba.

²²Pai KIBUBA tsüngdang kechi majung liasü tebu Manase-i inyakba amato inyak. Tebu Manase-i yangluba süngyanglu ajak nem tenla agütsü, aser parnok tenzük.

²³Tebu Manase pei sasa ajemaluba amato pai KIBUBA madang pa sasa ajemalua maküm, saka iba Amon yagi tali taliang tai bendenlok.

²⁴Aser pa kilirtemi pa anema tasa asa aser par kidang pa tepset.

²⁵Saka linük alirtem shirnoki Amon chuba anema tasa asa, parnokji tepset; aser nüburtemi par chir Yosia pa melen chuba kümdaktsü.