Read njo 2 PUTIPUYANG 35 Bible Online

2 PUTIPUYANG 35 - njo bible

2 PUTIPUYANG 35

¹Yosiai Yirusalem nung KIBUBA asoshi Süia Aoba Benjong amung; aser parnoki ita mezüngbuba anogo terpezü buba nung Süia Aoba Benjong san chanuji tepset.

²Aser pai putirtem parnok pei mapa nung shimtet aser KIBUBA kidang mapa nung parnok ajungshi.

³Aser Levitem shirnoki Israel ajak sayu aser shirnok KIBUBA dang temeshi liasü parnok dang pai ashi, “Temeshi Süngdenji Dawid chir Solomon, Israel chubai yangluba kidang yuang; joko nenok tapu nung aputsü tenüngdaktsü mali. Tang KIBUBA nenok Tsüngrem aser pa nübur Israel tenzükang.

⁴ Israel chuba Dawidi züluba amato aser par chir Solomoni züluba amato nenok sasa nenok tebu semchir-ren agi telemsa renemang.

⁵Aser nenok adianu chirtem tebou semchir ren agi lemsaba amaji temeshidak noktakang, aser Levitem tebou semchir shia shilem ka lemzükjang.

⁶Süia Aoba Benjong san chanu tepsetang, aser nenok sasa meshitetang, aser nenok adianutem asoshi Mosa ajanga KIBUBA o amato renemang.”

⁷Yosiai nüburtem chirtem nem tenla san chanutem, nabong chanutem shiruru telok nungi meyi semer, aser nashi pungchi meyi asem agütsü; itemji chubar meyong nungi liasü.

⁸Aser par tongtipuri mulungben agi nisungtem nem, putirtem nem aser Levitem nem agütsü. Hilkia, Zekaria, aser Yehiel, Tsüngrem kidang tongti ketdangpurtemi putirtem nem Süia Aoba Benjong asoshi san chanu aser nabong chanu meyi ana noklang trok aser nashi pungchi noklang asem agütsü.

⁹Ano Kanania, aser par adianu Shemaia aser Nethanel, aser Hashabia aser Yeiel aser Yozabal, Levi nunger tongtipuri, Levitem nem Süia Aoba Benjong tenla san chanu aser nabong chanu meyirijang pungu aser nashi pungchi noklang pungu agütsü.

¹⁰Yamaji mapa renem, aser putirtem pei talidak noktak, aser Levitem chubai melaba ama pei telemsa amato noktak.

¹¹Aser parnok Süia Aoba Benjong san chanu tepset, aser parnok ket nung agizükba azü putirtemi rüklok aser Levitemi itemji teküp asa.

¹²Aser Mosa kaket nung zülua aliba ama, KIBUBA nem tenlatsü asoshi oda itemji parnoki chirnur tebou semchirtem telemsa nem lemsa-a agütsütsü asoshi parnoki tarongba tenlatemji bendanga ayu. Parnoki nashi pungchitemjia yamaji lemsa.

¹³ Aser yimsü amato parnoki Süia Aoba Benjong san chanuji mi nung awang; aser temeshi tenlatemji chipo nung, kerapo nung, aser susa nung meta, aser yakta telokti dangi bener ao.

¹⁴Tesülen parnoki pei asoshi, aser putirtem asoshi renem, kechiaser Aron chir putirtem aonung matong tashi, tenla sabang nung temo aser tarongba tenla asoshi mazüngi liasü; anungji Levitemi parnok asoshi aser Aron chir putirtem asoshi renem.

¹⁵ Dawidi melaba ama kentenertem Asaf chirtem pei talidak liasü, aser Asaf, Heman, aser Yeduthun chubar tanishir, aser kiküm anükertem süngkhüm shia nung liasü; parnok pei mapa nung toktsür aotsü tenüngdaktsü maliasü, kechiyong parnok adianu Levitemi parnok asoshi renem.

¹⁶Anungji KIBUBA mapa ajak anogo kasa nung, Süia Aoba Benjong amungtsü, KIBUBA tenladak tarongba tenla agütsütsü Yosia chubai melaba ama inyak.

¹⁷ Aser tarurtem Israel chirtemi iba mapang nung Süia Aoba Benjong, aser piyazü meinokba am benjong tenetnü amung.

¹⁸Aser Samuel ainkar anogo nungi Israel nung iba amajibo Süia Aoba Benjong malidang; mesüra Yosiai amungba amaji Israel chuba katia Süia Aoba Benjong, putirtem, aser Levitem, aser Yihuda aser Israel ajak, aser Yirusalem alir tatenertem lia memungdang.

¹⁹Yosia chubaba küm tertibuba nung iba Süia Aoba Benjong amung.

²⁰Item ajak sülenji, kodang Yosiai tenla ki renema liasü, Ijip chuba Neko Karkhemis anema raratsü Eufrata leni atu; aser Yosia pa anema ao.

²¹Saka pai pa dangi otongdartem yoka ashi, “Na Yihuda chuba, ni ne den kechi inyaktsü? Tanü ni na anema aru masü, saka koba kin den ni rarar iba anema lir; aser Tsüngremi ilungang ta kü dang melaogo. Tsüngrem, shiba kü den lir, pai na samaja lir pa anema menoktaki anenang.”

²²Aji saka Yosiai pa nungi tejak memeyip saka pa den raratsü asoshi pa sasa miimshia inyak, aser Tsüngrem bang nungi aruba, Neko otemji manga, aser Megiddo lenten nung raratsü aru.

²³Aser lijak ameri Yosia chuba dak aka; aser chubai pei kilirtem dang ashi, “Ni ajongnenang, kechiyong ni kanga yiruogo.”

²⁴Anungji pa kilirtemi pa talungtsü tanabuba nungji yutsü, aser Yirusalemi pa bener aru; aser yangji pa asü, aser tebou nunger leper nung pa arem. Aser Yihuda aser Yirusalem ajaki Yosia asoshi mang ayim.

²⁵Aser Yerimiai Yosia asoshi mang ayim; aser ken tener tetsür-tebur ajaki tanü tashi Yosia indang mang yima jembir aser parnoki Israel nung itemi yimsü ozüng ka kümdaktsü; aser ajiang, itemji Aiatai nung zülua lir.

²⁶Tang Yosia mapa tanüngbaji, tetenzük aser tatem, aser pa mapa tajungtemji KIBUBA ozüng nung zülua aliba ama,

²⁷ajiang, itemji Israel aser Yihuda Chubatem kaket nung zülua lir.